Luka 1 - MMA SHIYYA

¹ Veefo vandu veengi vandeimboo maako vasańiṛie mboni ta findo filya findeawutio kunu kweru andu emwi,

² sheeli tindefitio warambua valya vandelolia Kirero kilya na miso awo wo veni na ikiṛundia.

³ Kiimba kya iki nań namfukya nduye mboni tilya na walio kuuka mbooko na itisununda, nkutisiṛie, Teofilo wakwa,

⁴ amu kumanye kisumani kya mboni tilya kundefundwa, sheeli tikee ta dede deń.

⁵ Kyeeri kilya Herode akee mangi ya Yudaya eeifoo nkohani umwi, irina lyamwi ni Sakaria, akee wa ikamba lya Abia. Na nka wamwi akee wa ufwari lwa Aron, irina lyamwi ni Elisabeti.

⁶ Nawo ve vavili veekee vandu vakusurie Iṛuva vakasoṛa mavavaso woose na miṛaṛikie ya Nndumi liteefo ilomi.

⁷ Nawo veeworee mwana ndi, amu Elisabeti eekee kyuumba. Na woose vali vavili veenkuaa.

⁸ Kyasia eekee iṛunda mashoṛa a ukohani mbele ya Iṛuva kisumani na ikamba lyamwi.

⁹ Na mikae ya vakohani ni ikaba wuuku, nalo lukawwoya lwa yaka ifo numba ya Nndumi, amu andekoṛia-fo findo fa kisaamu.

¹⁰ Na isyamu lyoose lya vandu veeterevaa wooṛo kyeeri kyo kya ikoṛa findo fa kisaamu.

¹¹ Kakworuswa mmalaika wa Nndumi aselele taari ya uko usha lwa kiraa kya ikoṛia findo fa kisaamu.

¹² Ili Sakaria andellolia kataṛaaka kawarwa wweṛei.

¹³ Malaika ulya kamwia: Kuteeṛee Sakaria, amu kiterewo kyafo kyamiitiwa, na nka wafo Elisabeti akwiriaa mwana wa womi. Na irina lyamwi kuvvaangaa Yohane.

¹⁴ Nawe kuvaa na ifura na ikyesa na vandu veengi vasenywaa ni iwonika lyamwi.

¹⁵ Fulya akaa ave nnini mbele ya kisangu kya Nndumi, nta atanwaa mfinyo ana kindo kya inanga. Nae eeshuṛwaa Mumuyo Nsongori kuuka ndewuń ya mae.

¹⁶ Na veengi va Isiraeli avawiiṛaa kwa Nndumi Iṛuva wawo.

¹⁷ Nae yye muni amwiriaa mbele akee na Mumuyo wa Elia na finya yamwi, amu aaṛue ngoo ta vaande va vandu tiuiye vana vawo, na iwo vawore nkuushu awaṛuaa vakooye iwara makusaṛo a valya va usumani, naamu amakii ideeṛia Nndumi vandu vamwi vammaa isongoviswa.

¹⁸ Sakaria kaia malaika ulya: Mmanyaa are kirero ki? Amu niń nankua na nka wakwa ni nkyeku wa mikonu miingi.

¹⁹ Malaika kamwaṛua kamwia: Nniń Gaburieli, nsalalaa mbele ya Iṛuva. Nań nanrumwa nrere nawe, nkufitie mboni ii shinuru.

²⁰ Nawe lla te! Kufwaa uṛoo kulemwa irera, kumande nkonu ulya ifi foose filolikaa. Fulya kitaare kwairikia firero fakwa. Nafo faawutio̱o̱ kyeeri kyayo.

²¹ Na vandu valya veeveriee Sakaria vakariika kiimba kya isinda lyamwi kulya numba ya Iṛuva.

²² Ili andesomuka, nta imakii irera nawo. Nawo vakamanya sheeli amooruswa kindo ifo numba ya Iṛuva. Nae kavatukiatukia uko kakaa akee mfu uṛoo.

²³ Ili mikonu ya ikamba lyamwi indesia, kakwimboo kaenda kyeń kwamwi.

²⁴ Numa ya mikonu ilya nka wamwi Elisabeti kakufinga kakufisa andu a miiri iraanu. Kanumbua:

²⁵ Nkuro Nndumi andeshitania mikonu yo andeisaua, ashuute usutu lwakwa niikee nalo kunu vanduń.

²⁶ Mwiri wa karindaru malaika Gaburieli karumwa ni Iṛuva aende kumande muṛiń wa Galilaya uvaangwa Nasareti,

²⁷ kwa mwana wa sambuṛa kilana eefingio̱o̱ ni nseṛo avaangwa Yosefu, akee wa ufwari lwa kwa Davidi. Na irina lya kilana ito mMaria.

²⁸ Ili andeaka kwamwi kamwia: Nakwisana iwe kukee llilie. Nndumi akee nawe!

²⁹ Nae kataṛaaka nnu kiimba kya firero famwi. Kakusaṛa ngooń yamwi: Iisana li llya mikae ki?

³⁰ Malaika kamwia: Kuteeṛee Maria, amu kwankooya isekye ifo kwa Iṛuva.

³¹ Lla te kukufingaa na iira mwana wa womi, na irina lyamwi kuvvaangaa Yesu.

³² Ito avaa nnini, avaangwaa mwana wa ito akee ule ya findo foose. Na Nndumi Iṛuva anniingaa kifumbi kya umangi lwa Davidi ndee wamwi.

³³ Nae ashiliaa numba ya Yakobo kumande miṛeṛe na umangi lwamwi lwiraa mmando ndi.

³⁴ Maria kaia malaika ulya: A kirero ikyo kivaa are, nań kitaare nankwania na nndumi?

³⁵ Malaika kamwaṛua kamwia: Ni Mumuyo Nsongori akwolokiaa na finya ya ulya akee kwa ule ya findo foose ikusikiaa sha kiṛishwe. Kiimba kya ikyo ikyo kisongori kiiriwaa ni iwe kivaangwaa Mwana wa Iṛuva.

³⁶ Lingi lla te mfwari wafo Elisabeti nae akufingie na mwana wa womi, lla kasa ankua. Na mwiri uu wamwi wwa karindaru. Nae andevaangwa kyuumba.

³⁷ Ainu kiifo kindo kilemikaa kwa Iṛuva ndi.

³⁸ Maria kanumbua: A uu niń nkee isinga lya Nndumi, kishivień sheeli kwanumbua! Kyasia malaika ulya kakwimboo kaenda.

³⁹ Kyasia Maria kakwimboo mikonu ilya kaenda ngyuroń kulya muṛiń wa Yuda.

⁴⁰ Kaira na kulya numba ya Sakaria kaisana Elisabeti.

⁴¹ Kikava ili Elisabeti andeita iisana lya Maria, kimwana kilya kinnya kika ta vana simiń ya mae. Na Elisabeti kaishuṛwa Mumuyo Nsongori.

⁴² Karosa ununga lwa finya kanumbua: Iwe kwanniingwa mboṛa kari ka vaka. Na ito akaa simiń yafo ni nniinge mbora!

⁴³ Kyashuukia na kwi kirero ki, kumande mae wa Nndumi wakwa ashishee niń?

⁴⁴ Amu ili ununga lwa iisana lyafo lwaaka marwiń akwa, Uyo kimwana kyo kyakiliakilia na ifura kunu simiń yakwa.

⁴⁵ Ngoma iwe kundekusura, amu ikyo kundeio̱ ni Nndumi kyawukiaa.

⁴⁶ Maria kanumbua: Nrima wakwa waṅinisa Nndumi,

⁴⁷ na ngoo yakwa yankesia Iṛuva Nkiṛa wakwa.

⁴⁸ Fulya amilla utanyari lwa iketi lyamwi. Amu kuuka alli fishuku foose fishivaangaa wa ngoma.

⁴⁹ Amu muni finya anshitania finini. Na irina lyamwi ni isongori.

⁵⁰ Na ililia lyamwi likaa kwa valya vamweṛee fishuku na fishuku.

⁵¹ Atana fa finya na uko lwamwi kanyanyata iwo vakee ikuṅinisa ifo makusaṛoń a mirima yawo.

⁵² Na iwo vanini kavateṛua fifumbiń fawo kaṅinisa valya vakee vatanyari.

⁵³ Valya vaworwa nsoto avawuurusa na fisha. Na masimba kavatia kya ruu.

⁵⁴ Ankumbua ililia kaelekia iketi lyamwi Isiraeli,

⁵⁵ sheeli andeia vaande yeru, ni Aburaamu na fishuku famwi kumande miṛeṛe.

⁵⁶ Maria kakaa nae kiṛengo kya miiri iraru, numa kauya kyeń kwamwi.

⁵⁷ Neeli mikonu ya Elisabeti indefika ya iira mwana, kaira mwana wa womi.

⁵⁸ Vakyungu vamwi na vafwari vamwi vakaita sheeli Nndumi amwengeṛia ililia lyamwi vakafura andu emwi nae.

⁵⁹ Ili indefika mikonu nyaanyi, vakasha vanderina mwana ulya. Vakafura ivvaanga irina lya ndee Sakaria.

⁶⁰ Llyo mae aaṛua kanumbua: Wode. Nkuro ndi, avaangwaa Yohane!

⁶¹ Vakamwia: Eefo nta nndu wa ufwari lwafo avaangwaa irina li ndi.

⁶² Vakasinia ndee vaka-mwuṛa irina afurie imfukiya.

⁶³ Nae kafura iwe lya itisiṛa. Katisiṛa-wo kanumbua: Irina lyamwi ni Yohane. Vakariika woose.

⁶⁴ Lia eni kana kamwi kakaruuka na ulumi lwamwi. Kabooka irera eeṅinisaa Iṛuva.

⁶⁵ Valya woose vakee kufui nawo vakawarwa wweṛei. Na mboni ti toose tikakwaniswa kulya ngyuroń ta Yudaya koose.

⁶⁶ Na woose vandeita vakawara na ngoo tawo vakanumbua: A mwana uu avaa wa mikae ingai? Amu uko lwa Nndumi lukee andu emwi nae.

⁶⁷ Na Sakaria vaava wamwi kaishuṛwa Mumuyo Nsongori kaauya kanumbua:

⁶⁸ Eetikiswa Nndumi Iṛuva wa Isiraeli, fulya ansengera vandu vamwi na ivakiṛa.

⁶⁹ Katiseṛeesia wembe lwa ikiṛwa kari ka numba ya iketi lyamwi Davidi.

⁷⁰ Sheeli arera na kana ka vaauya fisuku vamwi vasongori kuuka ilyo kala,

⁷¹ amu tikiṛwa misa eru na yutwa maakoń a valya woose vatisule.

⁷² Katana kuro alilie vaande yeru na ikumbua mma yamwi shisongori,

⁷³ ni ikite lia andefiya nde yeru Abraamu sheeli:

⁷⁴ atiniingaa ise tikie maakoń a fituva feru na indundia titawore weṛei,

⁷⁵ tikaa-fo tikee na usongovisi na usumani kisanguń kyamwi mikonu yoose ya muu weru.

⁷⁶ Nawe kimwana, kuvaangwaa mwauya wa ulya akee ule. Amu kwiriaa Nndumi mbele kunsongosie shia tamwi,

⁷⁷ na iṛangusa vandu vamwi vamanye ikiṛwa lyawo fikee lya itio̱ mareko a wo.

⁷⁸ Fulya Iṛuva antililia. Kwa ikyo tanshewa llanga yuka ule,

⁷⁹ amu imulikie valya vakee llemiń na kiṛishweń kya ufu na yorusa marende eru shia ya unambwe.

⁸⁰ Na mwana ulya kaṅina na yengeṛio̱ finya nrimiń. Kakaa ṅṅaloń kumande nkonu ulya andekworusa Isiraeli na baa.