Barua ya Vafilipi 3 - MMA SHIYYA

¹ Lya ifurumia, vanavamae vakwa, fureń fulya mukee va Nndumi. Imutisiṛia kirero ikyo kimwi da kishaareesaa ndi, kake kimwelekaa ini mukukaarise.

² Kusembekeń makite, kusembekeń vatana fikasha, kusembekeń Vaisiraeli valya vakusurie urini lwa kivvili weni.

³ Amu varine va dede — (nkimwi na vana va Iṛuva va dede) — ni ise tiiṛundiaa Iṛuva tiworwa mMumuyo tikakuṅinisa, fulya tikee va Kristo Yesu, ana titakusuranaa na findo fa wooṛo fa kivvili,

⁴ lla kasa niń niimakii ikusura findo fa mikae ii. Kwakooya eefo nndu na kava i ankulolia sheeli amakii ikusura findo fo, nniń kya mmwasi.

⁵ Niń narinwa nkonu wa nyaanyi, nkee nndu wa uṛiti lwa Isiraeli, wa ufwari lwa kwa Benyamin, Mwebrania muni, mwindia mavavaso kwa mikae ya kifarisayo.

⁶ Nava nsanduru wa ivina siṛi, kya usumani luukie mavavasoń eefo nndu andelolia kikasha kwakwa ndi.

⁷ Kake filya nndekooya mfa mbusha kwakwa, nafitaala fikava ureti kiimba kya Kristo.

⁸ Nkya dede nkee ikusaṛia sheeli findo foose mfa kitani, amu imanya Nndumi wakwa Yesu Kristo nkinini kita foose. Na kwa kiimba kyamwi ye nndetia-wo foose na ifiaṛua nkiṛi-nda, amu wware Kristo muni.

⁹ Llolike nkee wamwi ntakikee na usumani lua luukie mavavasoń, kake usumani lwakwa noore llua luukie ikusureń lya ikusura Kristo llua nndu akee iniingwa ni Iṛuva kammukusura.

¹⁰ Nań nimmanye ye na imanya imakii lya iṛuka lyamwi na ilungana na mavaviso amwi, amu wakaniswa nae, na akwaa ni ufu lwakwa luvakane na lwamwi,

¹¹ nuutie-wo ifika maṛukioń a vafu.

¹² Nta nkee irera ifi sheeli nammaa ifiwara ndi ana sheeli nammaa isongovika ndi. Wode! Kake nkee ifisaṛikia akwaa mmakii ifiwara, mfulya nndewarwa nKristo Yesu.

¹³ Vanavama, nta nkee ikukusaṛia shi muni sheeli nammaa ifiwara ndi. Kake kimwi nkee itana tubu: Nanrekio̱ filya fikee numa niisaṛikiaa filya fikee mbele.

¹⁴ Nkee isaṛika mfikie mmando niiomulwaa ni uvingo lua Iṛuva andeshiluvaangia eeshifingiaa Kristo Yesu.

¹⁵ Kyasia ise tammaa yawutia tikumbue ifo na mirima yeru yoose. Na akwaa kiifo kingi mukee ikusaṛasaṛa, ikyo nakyo Iṛuva amurambuyaa.

¹⁶ Kake io tamfika, yengeṛia teengeṛie kuro da.

¹⁷ Vanavama, shivakeń mu woose mwillaa iwo vakee yenda weendo sha ilu mukee ilolia kweru.

¹⁸ Amu veefo veengi vakee yengeṛia yenda iwo neemmaa imuia keengi mboni tawo, na alli nkee imuia na masoru, sheeli wasua nsalaba wa Kristo.

¹⁹ Mmando wawo ni ureti, ndewu yyo Iṛuva wawo, tikisi yawo iveendee usutu, wo kita findo fa isanga vakee ikusaṛia.

²⁰ Kake ise kyeń kweru ni ifo iṛuvewu, lingi kuuka ifo tiveree Nndumi Yesu Kristo ashe akee Nkiṛa.

²¹ Ye eelashaa mivili yeru ya utanyari, amu ivakani na wili wamwi wa unini kisumani na imakii lia akee nalyo, llyo imakii lirwaa findo foose five kwa si yamwi.