Barua ya Vafilipi 1 - MMA SHIYYA

¹ Ise Paulo na Timoteo tikee maketi a Kristo Yesu. Teesana vasongori woose va ifo Filipi vakuwore na Kristo Yesu. Teesana na vashili na vaṛundi va siṛi.

² Uwoo lukaa neeni na unambwe fuukie kwa Iṛuva Nde yeru na kwa Nndumi weru Yesu Kristo.

³ Nkee yaana Iṛuva wakwa kyeeri mmukumbue,

⁴ na fiterewoń fakwa nkee imuterevia ini mwoose na ifura matika woose.

⁵ Fulya muwore ilungana limwi lya mboni shinuru kuuka nkonu ulya mwabooka na kumande alli.

⁶ Nań nkusurie sheeli Iṛuva andebooka ma-shoṛa manuru ngooń tanu aamarisiaa kumande nkonu ulya Yesu Kristo ashaa lingi.

⁷ Kwa ikyo kishisumani mmukusaṛie ifi ini mu woose, fulya mukee ngooń yakwa. Amu mukee itaṅaṛia andu emwi nań uwoo ilo nndeavio̱ ni Iṛuva, kwakooya nkee kifingioń ana kwakooya nkee mashoṛeń a ikabania nrumi shisha na iirambua.

⁸ Amu Iṛuva eeshi sheeli niń mmuworie nnu mire ini mu woose, nayo imilie ikundeń lia sheeli Kristo akee nalyo.

⁹ Nakyo nkyo nkee itereva Iṛuva mwengeṛio̱ ikunda na uṛango na imanya lyoose

¹⁰ lya yelelia kilya kikee kinuru, amu muve vasongori na vandu vatawore ilomi kumande nkonu ulya Yesu Kristo ashaa nato

¹¹ na iishuṛwa usha lua lukee yuka kwa Yesu Kristo na iṅinisa nalo Iṛuva.

¹² Kake vanavama, mfurie mumanye sheeli mwaandu ulya wakwa wameendee nrumi shisha mbusha.

¹³ Amu kyammanyika kwa varingi valya va Kaisari woose na kwa valya vengi woose sheeli nkee mfinge kiimba kya Kristo dede.

¹⁴ Na vanavamae veengi valungani na Nndumi vakautia-wo finya ya ikaṛia ikwanisa kirero kya Iṛuva kiimba kya ifingwa lyakwa vatawore weṛei.

¹⁵ Kari kawo veefo kiindi vakee ikwanisa mboni ta Kristo kiimba kya iiria iriso na sua. Kake veefo na vengi vakee ikwanisa na makusaṛo manuru.

¹⁶ Iwo vakee itana kuro veeshikundaa wo veeshi sheeli nnderawa, amu vve mukabania nrumi shisha.

¹⁷ Iwo vengi va iiria iriso vakee ikwanisa Kristo na ngoo sheelwa ndi veekusaṛaa sheeli veengeṛiaa mavaviso a ifingwa lyakwa.

¹⁸ Kake kiwore mwaandu ki? Llolie sheeli Kristo akee ikwaniswa kwa shia toose, na akwaa nna numa ana akwaa iteefo numa. Nakyo nkyo kikee ishiniinga ifura. Nań neengeṛiaa ifura.

¹⁹ Amu niishi namanya, kindo kyakwa kasa kikai alli kyaṛukaa kive ikia lyakwa kiimba kya kiterewo kyanu kya ishiterevia na yelekio̱ mMumuyo wa Yesu Kristo.

²⁰ Nań nkee ikuwara na ikusura na ba, kundo ntasukaa kutu, kake nkaa na usuro sheeli niikee nalo matika woose, amu Kristo aṅiniswa na wili wakwa kive kya muu wakwa ana kya ufu lwakwa.

²¹ Amu iki kyanshivia muu ni Kristo na ifwa llyo lishiviaa mbusha.

²² Kake kwakooya kirikaa na muu kunu isangeń, kyashiwara ivika nunda ta mashoṛa, nań niishi kilya nsauaa ndi.

²³ Nsisirio̱ mfindo fivili: Llangie nnu yenda nndekaa na Kristo, amu nkinuru nnu deń.

²⁴ Kake ikaa na muu kunu kitinye nnu kiimba kyanu.

²⁵ Nań nankusaṛa ifo niishi sheeli nkaa na muu andu emwi neeni mukooye ikaarisio̱ ikusura na yengeṛio̱ ifura lya ikusura,

²⁶ amu mumakii yengeṛia ikushomba kiimba kyakwa mukuvavie na Kristo, ili nkaa nshe lingi kwanu.

²⁷ Kake weendo lwanu lusongove sheeli kisumani na nrumi ya Kristo, amu kwakooya nshaa na imulolia ini ana kitaare niiyo niite mboni tanu, sheeli muselele na utomari na ngoo imwi mwikabaniaa nrumi shisha na ikusura kwa nrima umwi.

²⁸ Ana manya mutae-ṛeeswa mfituva fanu nta kwa kindo kimwi. Kwawo iwo kyavavia iki myorusie ya ireka, kake kwanu ini kyamuvia myorusie ya ikiṛwa lyanu, nakyo nkya mifurie ya Iṛuva.

²⁹ Fulya ini mukee valunganise na Kristo mwamaavio̱ uwoo lwa Iṛuva, amu nta mukusure Kristo da ndi, kake na akwaa mutuṛulwa kiimba kyamwi.

³⁰ Ngabanu ii mundelolia kwakwa na iita, sheeli nkee nayo kumande alli.