Barua ya Timoteo ya kavili 4 - MMA SHIYYA

¹ Narambua mbele ya Iṛuva na mbele ya Kristo Yesu ulya asheumisiaa veefo na muu na vamfwe niirambuaa sheeli ashaa lingi aseṛeese umangi lwamwi.

² Kwanisa kirero kyo, kukudeerie kwakooya vandu vakundaa ana kwakooya vatakundaa. Kuvakandare na ivanaya na ivaikimba na ulalamboo loose na miloshie minuru yoose.

³ Amu kishaa kyeeri valeaa miloshie ya ikiṛa mirima, kake vairikiaa ilanga lyawo veni, vakuṛuiyaa valosha vawo mbumbu, fulya marwi a wo afurie.

⁴ Nawo veewukaa vataite filya fikee fa dede na yaṛukia sumu ta wongo.

⁵ Kake iwe ṛangua findoń foose. Sisiria ngatara. Kwanisa mboni shinuru ya ikia. Awutia uṛundi lwafo.

⁶ Amu niń kyanshishea iva kirasio na nkonu wa yawulwa lyakwa wansha kufui.

⁷ Nammaa ikabana fira shinuru, nammaa imarisia weendo lwakwa, nanringa ikusura.

⁸ Kiseere ni uvingo lwa usumani mfisie lua Nndumi mwumisia nsumani ashiniingaa nkonu ulya, ana nniń shi muni ndi, kake wandu woose valya vaveree isha lyamwi.

⁹ Kutomarise kufike kwakwa ree.

¹⁰ Amu Dema anshirea ankunda isanga li lya alli kaenda Tesalonike. Kiresike ameenda Galatia. Tito ameenda Dalimatia.

¹¹ Ulya akee ia andu emwi nań lLuka ye muni. Imboo Mariko kushe andu emwi nae, amu ashiviaa mwelekia uṛundiń.

¹² Kake Tikiko nndenruma Efeso.

¹³ Ili kushaa sheendie ikoti lia nndelirea Karipo ifo Tiroa, kunnde na fitabu filya, mmwasi filya fa shoni.

¹⁴ Alekisandero mfuru ulya nkaba minya andeshitania fikasha fiingi. Nndumi antaa kisumani na mitanie yamwi.

¹⁵ Na akwaa ni iwe kuringe kiimba kya nndu uu, amu andeila nnu firero feru.

¹⁶ Ifo mbooko ya mwaandu wakwa nta umwi andekaa taari yakwa, woose vandeshirea. Vatataalio̱ teve kiimba kya ikyo.

¹⁷ Kake Nndumi andeshisalalia kashiniinga finya. Kikava kuro, amu mikwanisie ya nrumi shisha imarisio̱ nniń, vayavaṛumu woose vaikooye. Nań nakiṛwa kaniń ka miiso.

¹⁸ Nndumi eengeṛiaa ishiuta mitambweń yoose mikasha na ishikiṛa eeshifitaa umangiń lwamwi lwa iṛuvewu. Ye eetikiswa miṛeṛe na miṛeṛe! Amen.

¹⁹ Shiisania Pirisika na Akwila na valya va numba ya Onesiforo.

²⁰ Erasto asaa Korinto, Tirofimo nanrea kulya Mileto alole.

²¹ Kutomarise isha kitaare kyeeri kya mbioo kyamfika. Eubulo akwisana na Pudensi na Lino na Kilaudia na vanavamae woose.

²² Nndumi akaa na nrima wafo! Uwoo lukaa neeni!