Barua ya Timoteo ya kavili 3 - MMA SHIYYA

¹ Kake manya kirero ki sheeli mikonu ya ifurumia fivaa-fo feeri fa ngatara.

² Amu vandu vakukundaa wo veni vakava vakunda mbesa vakava vakuṅinisi na vakufumbisi na varuma na vateendia vasuṛi vawo vatawore waanu, vataaṛie Iṛuva sonu.

³ Vatafurie va kwawo, vatafurie iitaniswa ni nndu, vakee vafingia vatakee ikwima nta kimwi, vakee vavaave vatakundie fisha.

⁴ Kake vavaa vakabanisa na va nkuushu na vakushombi na vandu valatiaa ilanga lya wili kita ikunda Iṛuva.

⁵ Vakworusaa sheeli vakusurie Iṛuva, kake valea ikuwara na finya ya nrima. Iwo nawo iwukana nawo.

⁶ Amu kari ka iwo veefo vakwataa numbeń ta vandu na iwara vaka valya varie maṛio a mareko, variwa ni ilanga lya mikae miingi,

⁷ veekuloshaa kyeeri kyoose, kake nta imakii ifikia uṛango lwa dede.

⁸ Na sha lia Yane na Yambire valemana na Mose, mfo kuro na iva valemanie na udede lua. Vvandu vankashaa ngyuṛango tawo vataare veelelio̱ findoń fa ikusura.

⁹ Kake veendaa mbele nnu ndi, amu utondo lwawo lulolikaa na baa kwa vandu woose, sheeli na utondo lwa valya lundelolika na baa.

¹⁰ Kyasia iwe kwalatia miloshie yakwa na weendo lwakwa na kilya niń mfurie andu emwi na ikusura lyakwa na ikunda na isisiria lyakwa.

¹¹ Lingi kwalatia na ngyukiva takwa na matuṛulo akwa alya natuṛulio̱ kulya Antiokia na Ikonio na kulya Lisitira. Mikae yoose ya ngatara nasisiria. Nae Nndumi ashikiṛa toose.

¹² Nkya dede iva vafurie isumanisa muu wawo veeindiaa Kristo Yesu vakooyaa ngatara woose.

¹³ Kake vandu vakasha na valembi veengeṛiaa yenda ukasheń veelembaa vandu na ilembika wo veni.

¹⁴ Kake iwe kuware na mifundie ilya kundefundwa na kilya kunderambikio̱, amu kwishi kwamanya ni i kundeloshio̱ kwamwi.

¹⁵ Nawe kwishi mitisiṛie misongori kuuka lia kukee mwana, nayo imakii ikuṛangusa kukooye ikiṛwa, kwakooya kukusuraa Yesu Kristo.

¹⁶ Mitisiṛie misongori yoose yanniingio̱ ni Iṛuva na mminuru ya ilosha nndu na imfunda na imwikimba na insongosia usumaniń.

¹⁷ Nkuro nndu wa Iṛuva asumaniswaa na itomariswa mitanień yoose ikee minuru.