Barua ya Vakorinto ya kavili 9 - MMA SHIYYA

¹ Kiimba kya miningie ilya ya iṛundia vasongori valya ifo Yerusalemu nkimuiaa kingi ndi.

² Amu niishi ikudeeṛia lyanu nkee ilikwitikisia kiimba kyanu kwa Vamakedonia: Sheeli kulya Akaya veemmaa ikudeeṛia wansia mwaka umwi. Na utomari lwanu lundeniinga veengi vawo finya.

³ Kake nnderuma vanavamae wo veru, amu ikwitikisa lyeru kiimba kyanu litakashaa, kake amu mukudeeṛie deń sheeli neemmaa irera.

⁴ Amu ili nshaa nriani na Vamakedonia na imukooya kitaare mwankudeeṛia titashe isuka ise — manya ntarere neeni — mikaeń iyo teemmaa ikusura.

⁵ Kyasia nndelolia sheeli kyawara niikimbe vanavamae va vabooke ifika kwanu vabooke iitiṛimu miniingie ya ikunda lyanu mweenrekiaa kuuka mbele ikooye yammaa iitiṛimwa, amu ive miniingie ya ikunda lya dede itakee ya unyuku.

⁶ Kake nkee irera kirero ki: Ulya aveekiaa fa unyuku eelulaa fa unyuku. Na ulya aveekiaa fa usha mfo kuro nae eelulaa fa usha.

⁷ Nndu woose aniingie sheeli abooka ikusaṛa ifo nrimiń wamwi, ataniingie na unario ana ikabiṛio̱ ndi. Amu “ulya akee iniingia na kisangu kyeelwa ito yye Iṛuva artkundie“.

⁸ Na Iṛuva amakii imwavia mboṛa yoose kwa wiingi, amu mukooye foose fimutinye fa imufila mikonu yoose. Lingi na isaa fisaa fa iṛunda mashoṛa woose manuru.

⁹ Sheeli kyatisiṛwa: ”Eeṛa fiingi kaavia na iwo vakiva, na usha lwamwi lukaa miṛeṛe“.

¹⁰ Kake uu akee iniinga muveekia mbeu anniingaa na nkate wa ilya, yye amuniingaa neeni mbeu na iifumbuta, nae eengeṛiaa iilula lya usumani lwanu.

¹¹ Kuro muvaa vayamasaa findoń foose muve vandu va mirima iwore kirero kimwi tubu. Ii yyo iṛundiaa Iṛuva mashoṛa na itiniinga maakoń miniingie ya imwitikisa.

¹² Amu uṛundi lwa mashoṛa va lwawutiaa vasongori valya wavi lwa yanguywa da, kake lukwengeṛiaa nnu iva na mbusha waanuń wiingi lukee iniingio̱ Iṛuva.

¹³ Fulya mukee yelelio̱ uṛundiń ilo, nawo veetikisaa Iṛuva kiimba kya windi lwanu lwa irambua nrumi shisha ya Kristo na kiimba kya miniingie yanu ya ivalilia mundeelekiana nawo na vandu woose.

¹⁴ Nawo veni vamutereviaa veevaa na umuye kya uwoo lwa Iṛuva lufumbukie kwanu.

¹⁵ Iṛuva aanwa kya kiniingo kyamwi kikilie firero foose fa ikiṅinisa.