Barua ya Vakorinto ya kavili 5 - MMA SHIYYA

¹ Amu tiishi ili numba ii yeru ikai kunu isangeń — yyo mivili yeru — iburulwaa, tikooyaa kirembo kisongosie ni Iṛuva, nkirembo kitaare kyasongosio̱ mmaako a vandu. Kikaa miṛeṛe na miṛeṛe ifo iṛuvewu.

² Iki nkyo kikee itiniinga kinangananga tikalanga ivikwa isaṛa lingi, mfo firembo feru fa iṛuvewu.

³ Amu tikammaa ivikwa tikilolikaa sheeli tikee kya ruu ndi.

⁴ Amu ise ili tikee kunu numba ii ya wili, tikee idia kiimba kya yeemio̱, fulya titafurie yutwa isaṛa, kake tifurie ivikwa, amu kilya kya mikae ya ifwa kimiṛwa nkya mikae ya muu.

⁵ Amu uu andetisongosia iki ni Iṛuva uu antiniinga Mumuyo ave nrendekye weru.

⁶ Kwa ikyo tikee vaami mikonu yoose tiimanyaa sheeli kyeeri tikee na mivili ii yeru kyeń kweru kukee kwaasha na kyeń kwa Nndumi.

⁷ Amu kindo kitirie ni ikusura, ni ilolia ndi.

⁸ Kake ngoo teru toore ifura tikalanga kya mmwasi ilakana na vvili na indekaa alya Nndumi akai.

⁹ Kwa ikyo tikee ikutomarisa tinsenye ye, ifo tikooya tikee na fa mivili ana ifo tikooya tallakana nafo.

¹⁰ Amu ise ti woose kyatiwara timanyike mbele ya kifumbi kya uumisio lwa Kristo, amu nndu woose atawa kilya andetana lia akee na vvili, akwaa fikee fisha ana akwaa fikee fikasha.

¹¹ Kyasia tikammanya yeṛea Nndumi, tikee yomua vandu, kake tikee irambulwa mbele ya Iṛuva. Nań nkusurie sheeli neese tanrambulwa ifo mirimiń yanu kuro da.

¹² Amu nta tikee ikushomba lingi mbele yanu ndi, kake tikee imuniinga kiteveto kya ikushomba kiimba kyeru, amu mukooye iva nakyo mbele ya valya vakee ikushomba kya mboni ta wooṛo da, ana kitaare nkiimba kya mboni ta mirima.

¹³ Amu kwakooya ngyuṛango teru tava ”sha uketo“, nkwa kiimba kya Iṛuva, ana kwakooya ”ngyuṛango teru tiishule“, nkwa kiimba kyanu amu mukooye mboṛa.

¹⁴ Amu ikunda lya Kristo likee itiitika ise tikakusaṛa kuro: Umwi andefwa kiimba kya woose, kwa ikyo woose vammaa ifwa.

¹⁵ Nae afwe kiimba kya woose, amu valya vakee na muu vatakaa na muu kiimba kyawo wo veni, kake nkiimba kya ulya andefwa kaṛutwa kiimba kyawo.

¹⁶ Kiimba kya iki kuuka alli ise nta nndu tikimwishi kwa mikae ya kiwili ndi. Na akwaa tammanya Kristo kwa mikae ya kiwili, kake alli tikimwishi kwa mikae ya kivvili lingi kuri ndi.

¹⁷ Kiimba kya iki nndu kankaa na Kristo avva nndu mwiya. Famwi fa mbele famiira, lla te foose favva fiiya.

¹⁸ Kake ifi foose fuukie kwa Iṛuva uu andetiitanisa nae ye muni, ili Kristo antivia ntaua, katiniingia uṛundi lwa ikwanisa witanu lu.

¹⁹ Fulya Iṛuva eekee na Kristo kaitanisa va isangeń nae ye muni, nta ivataalia mareko awo. Nae karwaa kirero kya witanu kari keru.

²⁰ Kyasia ise tikee varumi va ivaangia vandu Kristo, nkimwi sheeli Iṛuva ye muni akee ivaikimba kwa kana keru tiireraa: Tamutereva ini na Kristo: Mwitaniswa na Iṛuva!

²¹ Amaaṛua uu ateeishii ireko kava nrekwa kiimba kyeru, amu ise tive veni usumani lwa Iṛuva tikuwore nae.