Barua ya Vakorinto ya kavili 3 - MMA SHIYYA

¹ Naare? Tambooka lingi ikwitikisa ti veni? Ana tilangie sha vengi barua toore tikisi yeru tishe kwanu ana tuuke kwanu?

² Barua yeru yyo ini, nayo yantisiṛwa ngooń teru ilolikie na isomwa vvandu woose,

³ mumanyike na baa sheeli mukee barua ya Kristo yansongosio̱ ni ise, ili tindemuṛundia. Nta indetisiṛwa na winu ndi, kake nkwa Mumuyo wa Iṛuva akee na muu. Lingi nta indetisiṛwa maweń ndi, kake mmaweń akee ifo mirimiń yeru.

⁴ Na ikusurana lyo na Iṛuva tikee nalyo taniingwa nKristo.

⁵ Niikai tikufile ise ti veni ikusura nta kirero kimwi sheeli nkyeru ti veni ndi, kake ifilwa lyeru lyukie kwa Iṛuva.

⁶ Nae yye andetikaarisa tikava vaṛundi vasenye va mma shiiya, nta yyo ya mitisiṛie ndi, kake yya Mumuyo. Amu mitisiṛie innde ufu, kake Mumuyo annde muu.

⁷ Kyasia kwakooya uṛundi lurie ufu lua lwantisiṛwa na irawa maweń lwikee na unini na unini lua lukaima vana va Isiraeli veeimboo miso valle kisangu kya Mose kiimba kya ivarama lya kisangu kyamwi lindesia lingi,

⁸ a le uṛundi lwa Mumuyo luvaa na unini kita se?

⁹ Amu kwakooya uṛundi lu lwakooiya vandu ireka lukee na unini, na mmwasi uṛundi lu lwendee vandu usumani luvaa na unini, lukee unini lukilie lua deń.

¹⁰ Amu unini lua lwikee lwa kyeenga da ili tiluvakanisaa na unini ilu lukilie kutu, tinumbuaa: nta lua lwikee unini ndi.

¹¹ Amu kwakooya kilya kisiaa kiikee na unini, na mmwasi nnu kilya kikaa kikee na unini lukilie.

¹² Kyasia fulya toore iverea lya mikae ii, tikee iṛunda na utomari wiingi.

¹³ Nta ise tikee sha Mose lia arwaa kirami kisanguń kyamwi ndi, amu Vaisiraeli vatalle mmando wa filya fikee isia.

¹⁴ Kake makusaṛo awo akee yemeriswa. Amu na kumande nkonu wa nnu ili vakee isomio̱ mma ilya shikuu kirami ikyo kiiyo kisikie, nta iruukio̱, fulya ulya akiutaa-wo nKristo ye muni.

¹⁵ Kake kumande nnu ili mavavaso a Mose akee isomwa kirami kilya kikee isikia mirima yawo.

¹⁶ Kake kyeeri ikyo vaaṛukiaa Nndumi, Ilyo kirami kilya kyutwaa-wo.

¹⁷ Kyasia Nndumi yye Mumuyo to. Na alya Mumuyo wa Nndumi akai wwo na itaulwa likai.

¹⁸ Kake ise ti woose tilolie unini lwa Nndumi na kisangu kitaare nkisikie. Na kita ifi tiilashwaa tiivakaniswaa na fwana yamwi na yengeṛio̱ teengeṛio̱o̱ unini. Na ifi foose fuukie kwa Nndumi akee Mumuyo.