Barua ya Vakorinto ya kavili 13 - MMA SHIYYA

¹ Alli llya kararu niń niishaa kwanu. ”Kwa kana ka varambua vavili ana vararu kirero kyoose kirambukaa“.

² Lia nkee kwanu lya kavili nndebooka iikimba na alli ili nkee kwaasha neeni nkee iikimba lingi valya vandetana mareko kuuka io na vengi woose sheeli: Ili nshaa lingi lliliaa ndi.

³ Fulya mukee iṛuya myorusie ya finya ya Kristo uu alungani nań eereraa kari kakwa. Nae amuvia nta ntanyari ndi, kake awore imakii kwanu.

⁴ Na kwakooya akabio̱ nsalabeń arie utanyari da, kake eefo na muu arie finya ya Iṛuva. Na akwaa ni ise tikee vatanyari da tikuvavie nae, kake tikaa na muu fiwarani nae kwa finya ya Iṛuva na ikuorusa tikuorusaa kuri kwanu.

⁵ Kwelelień ini mu veni akwaa mukee ikusureń, kulolień ini mu veni! Ana mukwishi se ini mu veni sheeli Yesu Kristo akee kari kanu? Kwakooya kitaare nkuro mwallewa.

⁶ Kake noore ba mumanyaa sheeli ise takwa ndi.

⁷ Neese tikee itereva Iṛuva mutatane nta kikasha kimwi. Nta tikee itereva, amu ise tilolike sha vandu vesha ndi, kake naamu ini mutane kilya kikee kisha, neese tive sha vandu vakwa.

⁸ Amu ise timakii itana kindo kikee ivingana na udede ndi, kake mashoṛa eru ni ikabania udede.

⁹ Amu tikee ifura kwakooya ise tava vatanyari neeni mukava na finya. Lingi ifi nafo tikee itereva mukooye iselevendwa.

¹⁰ Kiimba kya ikyo nkee itisiṛa ifi kitaare namfika, amu ili vvaa ifo ntave na uvaave kwa kiṛengo kya imakii ilyo nanniingwa ni Nndumi live lya imusongosia, nta litave lya imureta.

¹¹ Ifurumia, vanavama, fureń, mukuselevende, mukwikimbe, mirima yanu ive kimwi, mukaa unambweń, llyo Iṛuva muni ikunda na unambwe akaa andu emwi neeni.

¹² Kwisaniń mwionganaa miimo sheeli vasongori veeshivie. Vasongori woose vamwisana.

¹³ Kaań ini mu woose na ililia lya Nndumi weru Yesu Kristo na ikunda lya Iṛuva na ilunganiswa lya Mumuyo Nsongori!