Barua ya Vakorinto ya kavili 12 - MMA SHIYYA

¹ Ikuṅinisa shi muni niimakii ikuṅinisa da, kake kisheelekaa kindo ndi. Alli aranyiń mmurambue findo fa maṛiikiso, kasa naoruswa na irambuywa ni Nndumi muni.

² Niń niishi nndu umwi wa Yesu — kuuka kyeeri kyo yansia myaka ikumi na iini. Akwaa nndu to eembolo akee na vvili wamwi niishi ndi, ni Iṛuva eeshi. Akwaa ni nrima muni wakurikwa niishi ndi, ni Iṛuva muni eeshi. Nndu to afitwa ule kumande iṛuvewu lya kararu.

³ Nań niishi nndu to — akwaa eekee na vvili niishi ndi, akwaa eekee wooṛo ya wili niishi ndi, ni Iṛuva eeshi.

⁴ Nndu to eembolo kafitwa Paradiso bwań kaitia-fo firero fitavaa irera ana nndu atakaṛiaa nta ifirera.

⁵ Kiimba kya nndu to nkuṅinisaa, kake kya kiimba kyakwa shi muni mmakii ndi. Kindo kishikangiaa nkuṅinise ni utanyari lwakwa.

⁶ Na kikooye nafura ikuṅinisa, niivaa nantana kindo kya utondo ndi, amu iki niireraa kiivaa kya dede. Kake nkusembekaa kaaṛa nndu atashiitikise kilanya ya filya akee ilolia kwakwa na iita.

⁷ Kiifo na kindo kingi kikee ishiima niikuṅinisaa kya mirambuye ilya minini: Nanrwaywa mfifi wiliń wakwa, nato ukee ishituṛua wishiilikaa sha kivambo kyoi. Nakyo kikava sha nrumi wa Satana anderumwa amu ashikabe na ṅunde, kaaṛa ntakushombe.

⁸ Na kiimba kya ukiva lu namiiyaiya na Nndumi kararu kaase, amu ashuute.

⁹ Nae kashiia: ”Ililia lyakwa likufile, amu kwa nndu ntanyari mfo finya yakwa ikooyaa mwaanya wa iṛunda“. Kiimba kya iki kindo nkee ikuṅinisa nakyo ni utanyari lwakwa, amu finya ya Kristo ikooye mwaanya wa iṛunda kari kakwa.

¹⁰ Nań nkuumisaań koṛoń kyeeri kya utanyari ana kya usutu lwa vandu ana kya ngyukiva ana kya matuṛulo ana kya weṛei nkee iliswa kiimba kya Kristo. Amu kyeeri nkee ntanyari llyo noore finya ya nrima.

¹¹ Nawa nriṅani. Ni ini mwashikabiṛia. Amu kyeenshiwaraa niirikie ni ini, fulya kiteefo kyashirwaa numa ya valya vakulolie vakee varumi va dede, lla kasa ntakee kindo.

¹² Kilya kyorusaa nndu sheeli ni nrumi kyantanika kwanu kwa isisiria na kwa firingisio na myorusie na finya.

¹³ Nkiki mundetuṛa kita siṛi tingi? Amu nta niń nndemweemia. Mushililie ureti lu!

¹⁴ Lleń kyeeri ki nkya kararu niikwaliaa isha kwanu ana mmweemiaa ndi. Amu nkee iṛuya findo fanu ndi, kake ni ini nkee imuṛuya. Amu kisenye vana ifisa fuva ta vaande yawo ndi, kake waande vatifisia vana.

¹⁵ Kake niń kilya kishisenyaa nnu ni iniingia kilya kikee kyakwa, nkya dede na akwaa nniń shi muni nniingio̱o̱ kiimba kya mirima yanu. A le sheeli neengeṛia imukunda nnu, naanguywaa ikundwa?

¹⁶ Kyasia niń nammutuṛua ndi, kake veefo vakee inumbua, ni uṛango lwakwa ukasha nndemuwara nalo kwa ntambwe.

¹⁷ A le vandu valya nndevaruma kwanu veekee vavavase nniń vamuuṛe kindo?

¹⁸ Nndeikimba Tito nanruma andu emwi na mwanamae ulya ungi. A le Tito amuuṛa kindo? A Mumuyo ulya atikurikaa yye ulya muni ndi? Na mbayo tilya tilatiaa nto ito sheni se?

¹⁹ Mwabooka kuuka mbele itikusaṛia sheeli tikee ikushiisa mbele yanu. Mbele ya Iṛuva tikee irera tikuwore na Kristo, na ifi foose nkiimba kya imusongosia ini, muṛe vakunde.

²⁰ Amu neeṛee sheeli ili nshaa ntamuloliaa ini sheeli mfuraa imulolia, lingi sheeli neeni mutashiloliaa nań sheeli mufuraa. Nkee yeṛea kundo nkooyaa kwanu minaye na iriso na ituṛuka na inaa na ifingia na ikurera na ikushomba na kiṛoṛongyo.

²¹ Nań ili nshaa lingi, Iṛuva wakwa ashinyiisaa lingi ifo kwanu, nań ndiikiaa veengi vanderekio̱ kuuka ilyo vatandekurra ukasha na ukwe na waaisi vandelutana.