Barua ya Timoteo ya mbele 5 - MMA SHIYYA

¹ Nndu nsuṛi manya kutannaiye, kake mwikimbe sha vaava, na iva vakoo kuvarerie sha vanavamae.

² Iva vakyeku sha maa, vaka vakoo sha vamfwamae vafo na sonu shisha toose.

³ Misiketi iva vakee misiketi dede kuvaindie.

⁴ Kake kwakooya nsiketi uwore vana ana kishuku, wo vakuloshe mbele iṛunda filya fawara ifo kyeń kwawo na itaa vaande yawo. Amu iki kisenye Iṛuva.

⁵ Nka nsiketi nae asumani ni ulya akaa kyaanya kyamwi eekuwara na Iṛuva tabu na inkusura na intereva kio na nsanyiń.

⁶ Kake ulya alatiaa milangie ya waaisi ito amfwa nrima na akwaa akikee na muu.

⁷ Findo fo nafo fivavase, amu vatave na kya imurera.

⁸ Kake nndu woose atakee illa valya va kyeń kwamwi na kilanya va numba yamwi veni, ito ankana ikusura, lingi ni nkasha kita ulya atakusurie.

⁹ Nka nsiketi manya atatisiṛwa kitabuń kya misiketi ya iṛundia siṛi kitaare amaa myaka makumi arindaru, nae eekee nka wa nndumi umwi da.

¹⁰ Nae alolikie wwa mitanie minuru, ili allela vana, ili awwaria veeni, ili ansangya vasongori marende, ili ameelekia vakiva, ili allatia ishoṛa isha lyoose na utomari.

¹¹ Kake misiketi mikoo lea ivatisiṛa, amu ili vaṅinio̱ ni ilanga vatiaa Kristo valange yalikwa.

¹² Nawo vawore uumisio, fulya vantia ikusura lyawo lya mbooko.

¹³ Lingi andu emwi na ifo vakwishivisa irokua veeṛaaṛaa numba kwa numba. Ana nta vvaroko da ndi, kake vvaṛiingi na vafuluta vengi veereraa firero fitasumani.

¹⁴ Kyasia mfurie, misiketi itandekua yalikwa vaire vana na iṛundia kyeń kwawo, amu vataotoṛie kituva mwaanya wa ivaṛiinga.

¹⁵ Amu kiindi vammaa yaṛuka na ilatia Satana.

¹⁶ Nka akusurie kwakooya awore misiketi ufwariń lwamwi, avalele ye muni, amu siṛi iteemio̱, amu yo yelekie valya vakee misiketi dede.

¹⁷ Vasuṛi valya vaselelie siṛi kisha wo kisumani vaniingwa windi kavili, mmwasi iwo vakee ikwatara na ikwanisa na ilosha.

¹⁸ Amu mitisiṛie irerie: ”Numbe ikee iṛunda manya kutaifinge kana“. Na lingi: ”Ndundi aniingwa maṛe amwi asumani nae“.

¹⁹ Nndu nsuṛi kaṛiingwa kwafo manya kutawarie mwaandu vateefo varambua vavili ana vararu.

²⁰ Valya varekio̱ kindo kuvarerie kisanguń kya vasuṛi woose, amu na vengi vautie-wo yeṛea.

²¹ Nakuvavasa mbele ya Iṛuva na mbele ya Kristo Yesu na mbele ya vamalaika vasaue ringa ifo kitaare kwasuuya nndu ana kutatane kindo kwikundiaa nndu.

²² Kutaekeṛie nndu maako kwa tiń, manya kutakwate marekoń a vengi. Kuringe iwe ku muni kuve nnuru.

²³ Kuuka alli manya kutanwe mura da, nwa mfinyo munnya kiimba kva ndewu yafo na ndwaṛi tikuwaraa kyeeri kwa kyeeri.

²⁴ Veefo vandu mareko awo akworusie na baa, nawo avairiaa mbele avarwaa uumisioń. Na vengi mareko awo amanyikaa numa.

²⁵ Mfo kuro na mitanie minuru ikworusie na baa, na filya fitakee fa baa fimakii ikufisa ndi.