Barua ya Timoteo ya mbele 3 - MMA SHIYYA

¹ Kirero ki nkya dede: Kwakooya nndu akunda mashoṛa a illa siṛi, alanga mashoṛa manuru.

² Kyasia ulya woose allaa siṛi kyawara ave nndu wa mikae isenye na nndu wa nka umwi. Ave na nndu wa walio atawore tembeṛu, ave na nndu mwarutu awore sonu shinuru. Ave na nndu wa maako awariaa veeni, ave na nndu eeshi ilosha.

³ Manya atave nndu aṛemie na wari ana nndu wa nkuru. Kake ave nndu wwoo atawore myaandu ana unyuku.

⁴ Lingi ave nndu eeshi ishilia kyeń kwamwi ninsha na iishivisa vana vamwi ikaa na windi unuru mbele ya vanini vawo.

⁵ Amu kwakooya nndu atamakii ishilia kyeń kwamwi muni, naare amakii iṛundia siṛi ya Iṛuva?

⁶ Lingi atave nndu andesha siṛiń suku to sheni, kaaṛa atakushombe na ituulwa uumisioń nSatana.

⁷ Na lingi kyawara ave nndu akundio̱ wandu, na kitaare wa siṛi, amu atarerwa kikasha ana irey wa nSatana.

⁸ Mfo kuro na veelekia siṛi vave vandu va usuro vatawore ukavili, vatave vandu vanwa wari nnu, vatawore ilanga mbesa ta usutu.

⁹ Vaware kiṛisi kya ikusura nrimiń nnuru.

¹⁰ Iva kyawara veelelio̱ mbele, numa vakwatarie siṛi ili vallolika sheeli vatawore ilomi.

¹¹ Mfo kuro na vaka vawo vave na nsendo nnuru vatave vafingia. Vave na walio na utele findoń foose.

¹² Kya veelekia siṛi kyawara nndu woose ave na nka umwi. Lingi vave vandu veeshi isalalia vana vawo kinuru na numba tawo veni.

¹³ Na valya veeshi iṛundia siṛi kinuru vairikio̱o̱ wwoose, lingi vakooyaa finya ya irera na baa luteefo weṛei veekusuraa Kristo Yesu.

¹⁴ Nakutisiṛia ifi niiangusiaa isha kwafo kwa kyeeri kifui.

¹⁵ Kake nansinda, kumanye weendo kasa kyawara vandu veende ifo numba ya Iṛuva, nayo ikee siṛi ya Iṛuva muni muu, ikee ngo na mfulo wa udede.

¹⁶ Nkya dede kiṛisi kikee kinini kya windi. Nakyo nkyo iki: ”Uu andekworusa kwa wili wa nndu, kairikio̱ mMumuyo, kalolikia vamalaika, kakwaniswa kari ka vayavaṛumu, kakusurwa isangeń, karosio̱ uniniń“.