Barua ya Timoteo ya mbele 2 - MMA SHIYYA

¹ Kindo nkee imufunda kikee kwa ule nkyo iki: Veń vandu va iterevia vandu woose na ivaania kwa Iṛuva

² mwitereviaa na mamangi na vanini va uruka, amu tikaa na unambwe iteefo myaandu tiikusuraa Iṛuva na isumanika findoń foose.

³ Na mikae ii mminuru ikasenya Iṛuva Nkiṛa weru.

⁴ Amu Iṛuva afurie vandu woose vakiṛwa na ikooya imanya filya fikee fa dede.

⁵ Fulya eefo Iṛuva umwi, eefo na nsalaba umwi kari ka Iṛuva na vandu, yye Kristo Yesu andeva nndu

⁶ kakuniingia ye muni ave ntaua wa itaua vandu woose. Ii yyo mirambuye ikwaniswaa koose kyeeri kyayo kikamfika.

⁷ Nań kiimba kya ikyo nnderawa-fo vve nkwanisa wayo na nrumi na iva vve llosha wa vayavaṛumu vakooye ikusura na udede — nkee irera dede, nta nkee irera wongo ndi.

⁸ Kyasia mfurie womi vatereve andu woose veeimboo maako a windi liteefo ituṛuka ana ivingana.

⁹ Mfo kuro kyawara vaka nawo vakwambike na masaṛa asenye andu emwi na sonu shisha na nrima wa walio, nta vatakwishike na yoka nrwe ana masaa a saabu ana samana ana miseto ya utoṛe.

¹⁰ Kake vakuware na mitanie misha sheeli kyawara vaka vakee irambua weṛei lwa Iṛuva.

¹¹ Nndu nka akuloshe eearanyaa kya kisiria eekaa na windi lwa mikae yoose.

¹² Nta naniinga nndu nka muumu wa ilosha ndi ana wa ishilia nndumi ndi, kake ave na useli.

¹³ Amu Adamu yye aumbwaumbwa lya mbele na Eva kafurumia.

¹⁴ Ana nta Adamu alembika, kake nka yye alembwa kandeakia mikaeń ya ireko.

¹⁵ Kake akiṛwaa kwakooya aira vana, nawo vakaa na ikusura na ikunda na usongori andu emwi na mirima ya usaaṛo.