Barua ya Vatesalonike ya mbele 5 - MMA SHIYYA

¹ Kake, vanavama, kya mboni ta feeri na kiṛengo noore kiteveto mmutisiṛie ndi.

² Amu ini mu veni mwishi sheeli nkonu wa Nndumi ushaa sheeli inini lishee kio.

³ Ili vanumbuaa: lwifo unambwe na kibua, llyo ureti luvawoyaa kwa tiń sha kivawwo kiwoyaa nka ili eeiraa, nta vatamakii irisha.

⁴ Kake ini, vanavama, mukee llemiń na nkonu ulya umutambukie sha inini ndi.

⁵ Amu ini mu woose mwawa vana va langa na vana va nsanyiń. Ise tikee va kio ana va llema ndi.

⁶ Kyasia manya titalale sha valya vengi, kake tikaa kya umbuura na iva na kiṛengo.

⁷ Amu valala ruo valalaa kio, na akwaa vvanangwa vanangwaa kio.

⁸ Kake ise tikee va nsanyiń tive na kiṛengo tiiṛaa kya iringa mbafu nakyo ni ikunda na ikusura, na iṛaa kya iringa nrwe nakyo ni iverea lya ikiṛwa.

⁹ Amu Iṛuva andetikusaṛia uumisio lwa itireta ndi, kake naamu tikiṛwa ni Nndumi weru Yesu Kristo

¹⁰ ulya andetifiya, amu tive na muu andu emwi nae, kwakooya tikee kya umbuura ana tilele.

¹¹ Kyasia kukaariseń na yelekana oo nndu woose na uroe, sheeli mutanaa.

¹² Tamutereva, muṛe vanavama, indień valya vakee imuṛundia mashoṛa a siṛi na imushilia vakuwore na Nndumi na imufunda na imwikimba.

¹³ Muvakunde kilanya kiimba kya mashoṛa awo. Veń na unambwe mu veni na mu veni.

¹⁴ Tamutereva, vanavama, ikimbeń valya vatakee na useli, kaariseń valya vakee na nrima ntanyari, niingeń valemwa finya, veń na ulalamboo kwa vandu woose.

¹⁵ Lleń nnu nndu atataa ungi kikasha na kikasha, kake kutomariseń matika woose ikutania finuru ini mu veni na mu veni na itania vandu woose finuru.

¹⁶ Fureń mikonu yoose.

¹⁷ Tereveń Iṛuva manya mutalemwa.

¹⁸ Aaneń Iṛuva findo foose, amu yyo mifurie ya Iṛuva, fulya mwawa va Kristo Yesu.

¹⁹ Manya mutabaaye Mumuyo.

²⁰ Manya mutateende kyauyo.

²¹ Kake kyoose kyelelień, na kilya kikee kinuru kiwareń.

²² Iwukaniń na filya foose fikee fikasha.

²³ Na Iṛuva muni unambwe ye muni amwilise deń, na mumuyo wanu usumaniswa andu emwi na nrima na wili na iringwa liteefo ilomi, kumande Nndumi weru Yesu Kristo ashaa.

²⁴ Ito amuvaanga ye wwa usuro, nae atanaa.

²⁵ Vanavama, titerevień.

²⁶ Isaniń vanavamae woose mwikwongaa miimo misongori.

²⁷ Namwikimba na Nndumi, vanavamae woose vasomio̱ barua ii.

²⁸ Uwoo lwa Nndumi weru Yesu Kristo luve neeni.