Barua ya Vatesalonike ya mbele 4 - MMA SHIYYA

¹ Kyasia lingi tamutereva, muṛe vanavama, na imufunda, amu mukee va Nndumi Yesu: Mwengeṛie utomari na iṛunda sheeli tammulosha ikaa na iṛunda na isenya Iṛuva.

² Mwishi mavavaso alya tamuniingia ise, neese taaniingio̱ ni Nndumi Yesu.

³ Na mifurie ya Iṛuva yyo ii: Kusongoviseń ngoo mwiwukane na waaisi.

⁴ Nndu woose wanu akufunde isaua nka wamwi na insongosia na iṅṅinisa,

⁵ nta atansaue kiimba kya illanga tubu sha vandu vateeshi Iṛuva.

⁶ Nta nndu atafukye mwanamae wamwi na illemba kiimba kya mbusha, fulya Nndumi aumisiaa ifi foose, sheeli tamukwanisia na imurambuya.

⁷ Amu Iṛuva antivaangia ukwe ndi, kake antivaanga tive vailise.

⁸ Kyasia ulya abiṛie mifundie ii, abiṛie nndu ndi, kake abiṛie Iṛuva muni ammuniinga Mumuyo wamwi Nsongori.

⁹ Kya witanu lukee kari ka vanavamae mmutisiṛiaa ndi. Fulya Iṛuva muni ammulosha sheeli mwitanaa mu veni na mu veni.

¹⁰ Neeni mukee itania vanavamae woose kuri vakee urukefi lua lwa Makedonia loose. Kake tamufunda, vanavama, mwengeṛie iitana.

¹¹ Na lingi mukutomarise isia do na itana mashoṛa anu na iṛunda na maako anu sheeli tammuvavasa,

¹² amu mwitikiswa vvalya vateeshi Iṛuva, nta mutave vandu vaombaa findo kwa vandu kiimba kya uroko.

¹³ Vanavama, tindemufisa mboni ya valya veemfwaa ndi, amu mutaṛiike sha valya vatawore ba ya iṛuka lya vafu.

¹⁴ Ise tikusurie sheeli Yesu amfwe kaṛuka kwa vafu, kyasia mfo kuro Iṛuva arwaa na valya vandefwa veekusuraa Yesu kwamwi vakaa andu emwi nae.

¹⁵ Fulya mboni ii tikee imuia ikee kirero kya Nndumi muni tikamuia: Ise tikee na muu fiseere isangeń kumande Nndumi ashaa tiiriaa valya veemfwaa mbele ndi.

¹⁶ Amu Nndumi muni aolokaa iṛuvewu na kiṛoṛongyo kinini na ununga lwa mmalaika nnini, na wembe lwa Iṛuva lwivilio̱o̱ na valya veemfwaa veenkusuraa Kristo vabookaa iṛuka.

¹⁷ Numa tikurikwaa ise tikee na muu fiseere isangeń maṛumbeń andu emwi nawo tikwanie na Nndumi ringewu. Na numa tikaa kwa Nndumi matika woose.

¹⁸ Kyasia mukulembelembe mu veni na mu veni na firero ifi.