Barua ya Vatesalonike ya mbele 3 - MMA SHIYYA

¹ Kyasia kwa ikyo tindekimakii isisiria kya kita ndi tikalolia nkinuru irewa ifo Atene ti veni.

² Tikaruma Timoteo mwanamae weru akee ndundi wa Iṛuva mashoṛeń a ikwanisa nrumi ya Kristo, amu amuumise ini na imukaarisia ikusureń lyanu.

³ Manya nndu atataṛaakiswa nngatara ti tanu ta kyeeri iki. Amu ini mu veni mwishi sheeli tirwaywaa ifo.

⁴ Amu lia tikee kwanu tabooka imuia sheeli tikooyaa mavaviso. Nkuro kindeva sheeli mwishi.

⁵ Nań ili kitaare nndemakii isisiria lingi nanruma, amu mmanye ikusura lyanu, kwakooya nreya ulya ammureya na yaaraa lyeru likava kya ruu kwanu.

⁶ Kake ili Timoteo antishea auka kwanu kateendie mboni shinuru ta ikusura lyanu na ikunda lyanu na sheeli mutikumbuye mikonu yoose kisha mwilangaa itilolia ise sheeli neese tilangie imulolia ini.

⁷ Kiimba kya ikyo, vanavama, mirima yeru yawiiṛio̱ muu na mboni ti ta ikusura lyanu, na tikaroywa ni yatarika na mavaviso eru oose.

⁸ Alli tikee na finya, kwakooya muselele kyumu mukuwore na Nndumi.

⁹ Amu yyaana ki timakii itaa Iṛuva ifura li lyoose tikee ifura kiimba kyanu mbele ya Iṛuva weru?

¹⁰ Tikee iiyaiya nae kio na nsanyiń tikwanie neeni kisangu kwa kisangu, amu timakii yengeṛia finya tanu ta ikusura Iṛuva akwaa aiyo andu taanguye.

¹¹ Kyasia Iṛuva muni akee Nde yeru na Nndumi weru Yesu atiniinge shia yeru ya imufikia.

¹² Na Nndumi amwengeṛie ikundana ini mu veni na mu veni na ikunda vandu woose, sheeli neese timukundie.

¹³ Amuumise ngoo tanu titomaa tikaa titawore ilomi, tive na usongori mbele ya Iṛuva Nde yeru kyeeri Nndumi weru Yesu ashaa andu emwi na vasongori vamwi woose.