Barua ya Vatesalonike ya mbele 2 - MMA SHIYYA

¹ Amu ini mu veni, vanavama, mwishi isha lyeru kwanu sheeli lyave lya ruu ndi.

² Kake lla ili tindevaviswa mbele na itanio̱ fa usanduru ifo Filipi, sheeli mwishi, tikakaṛia na Iṛuva weru irera nrumi shisha ya ifura kwanu na ivingania nnu.

³ Amu wikimbi lweru llwa ureti ana llwa ulembi ana llwa ntambwe ndi.

⁴ Kake sheeli teemiirikio̱o̱ ni Iṛuva tirambikio̱ nrumi shisha, nkuro tireraa, nta naamu fisenye vandu ndi, kake naamu tisenye Iṛuva uu eelelia mirima yeru.

⁵ Amu tindeva na firero fa ikushiisa nta kyeeri kimwi sheeli mwishi ndi ana na firero fa dua fa ifisa unyuku, Iṛuva ni nrambua.

⁶ Tindeṛuya unini kwa vandu ndi, nta kwanu ana nta kwa vengi ndi.

⁷ Tiimakii iṛuya unini da, amu tikee varumi va Kristo, kake tindeva vawoo kari kanu sha nka lleṛi alelaa vana vamwi muni.

⁸ Mfo kuro neese timukusurie na ikunda iingi tikafura imuniingia nta nrumi shisha ya Iṛuva da ndi, kake nna mirima yeru deń, fulya mwawa vakunde veru.

⁹ Amu, vanavama, mukumbue ngatara teru na yatarika lyeru, fulya tindeṛunda mashoṛa kio na nsanyiń, kaaṛa titasisiṛe nta nndu umwi wanu, ili tindemukwanisia nrumi ya Iṛuva kuro.

¹⁰ Ini na Iṛuva mukee varambua kasa tindekaa kwanu ini mukusurie na usongori na warutu na usaaṛi.

¹¹ Ikyo nakyo mwishi sheeli tindemuikimba ini na imukaarisa nndu woose kikwamwi, sheeli vaava alembalembaa vana vamwi,

¹² amu mwende sheeli kyawara kwa Iṛuva andemuvaangia umangi lwamwi na unini lwamwi.

¹³ Kiimba kya ikyo neese tiawuaa yaana Iṛuva, fulya kitaare mundewaria kirero kilya kya Iṛuva mundeitia kweru nta nsha kirero kya vandu, kake nsha kirero kya Iṛuva kikee kya dede. Nakyo nkyo kikee iṛunda mashoṛa kari kanu ini mukusurie.

¹⁴ Amu ini, vanavama, mwawakana na siṛi ta Iṛuva tikee ta Kristo Yesu ifo urukeń lwa Yudaya, fulya ini mwalliswa ngyukiva tilya sheni wandu va uruka lwanu sha lia wwo vandeliswa vVayuda.

¹⁵ Amu iwo wwo vandewaa Nndumi Yesu na akwaa vvaauya valya, lingi wwo vandetiumbuta neese. Ana nta vakee isenya Iṛuva ndi, ana nta veetani na vandu woose ndi.

¹⁶ Lingi vakatiima ise fiireraa na vayavaṛumu kirero kya ikiṛwa lyawo. Kuro Ilyo yawutia mareko awo kyeeri kyoose. Kake uvave lwa Iṛuva lwavafikia kumande ifurumia.

¹⁷ Kake ise, vanavama, ili tiikee kwaasha neeni kyeeri kyaangu kwa kisangu, nkwa nrima ndi, tindeengeṛia nnu ilanga imulolia fisangu fanu.

¹⁸ Nkyo kiteveto tikakudeeṛia isha kwanu, ee niń Paulo lya mbele na lya kavili, na Satana katiima.

¹⁹ Amu ni i akee iverea lyeru ana ifura lyeru ana nduma weru? A le ni ini se mbele ya Nndumi weru Yesu kyeeri ashaa?

²⁰ Amu ini ni ini unini lweru na ifura lyeru.