Barua ya Vakorinto ya mbele 9 - MMA SHIYYA

¹ Ale niń nkee mboṛomue se? Niń nkee nrumi se? Nallolia Yesu Kristo Nndumi weru na miso akwa se? Mwawa siṛi ya Nndumi wwo mashoṛa akwa se?

² Kwakooya vengi vatashilolie nkee nrumi, kake kwanu ini nkee nrumi. Amu ini mukee myorusie ya urumi lwakwa mukee siṛi ya Nndumi.

³ Yyo myaṛue yakwa kwa valya vakee ishiuṛa kya mashoṛa akwa.

⁴ A le toore muumu se wa iwaria kya ilya na kya inwa?

⁵ Toore finya se ya ikualikia nka akee mfwamae wa kikristo sha varumi valya vengi na vanavamae va Nndumi na Kefa?

⁶ Ana naare? Nniń shi muni na Barinaba titawore muumu wa itia mashoṛa eru a maako a iluya muu weru?

⁷ Ni nseṛo ungau wa fira eende fireń na ikutaya maṛe amwi ye muni? Ni i awekyaa misabibu atalyaa nunda tayo? Ana ni i aisaa shoo atanwaa maruva a shoo yo?

⁸ A le nkee irera ifi kinndu? A mavavaso nawo akee irera ifo feni ndi?

⁹ Amu ifo mavavasoń a Mose nkitisiṛe: ”Manya kutafinge numbe ilya ikee ishunda ngano kana“. A Iṛuva yye akee illa mboni ya numbe?

¹⁰ Ana akee irera ifi kwa kiimba kyeru ndi? Ee kyatisiṛwa kiimba kyeru. Amu ulya akee irema shoonga nkisumani kwamwi areme eevereaa shoonga. Na ulya akee ikonunda mbeu kisumani averee ikooya wavi lwamwi.

¹¹ Kwakooya ise tindemuveekilia mbeu ya Mumuyo, a nkindo kinini, kwakooya tikee iilula fa findo fanu fa wiliń?

¹² Kwakooya vengi vvavikie finya ya ikuutia wavi lwawo kwanu, kyatiwara se ise kita iwo? Kake ise tindelakana na finya ii toore. Kake tikee isisiria findo foose, amu titashe ifungiṛia nrumi shisha ya Kristo itateendwa.

¹³ Mwishi se sheeli valya vaṛundaa mashora a numba ya Iṛuva valyee findo fa numba ya Iṛuva, na valya vaṛundiaa kiraa kya irasia vavee na wavi lwawo luukie kiraań kya irasia?

¹⁴ Mfo kuro na Nndumi avavasie sheeli valya vakee ikwanisa nrumi shisha vakooye kyawo kyukie mikwanisień ilya.

¹⁵ Kake niń nndetana kimwi kya mboni to ndi. Ana nta natisiṛa ifo, amu kive kuro kwakwa ndi. Amu ṅṅwana mfwe kita ili nndu umwi na kava i akasheesaa tikisi ii yakwa.

¹⁶ Amu na akwaa nkee ikwanisa nrumi shisha noore-wo nta kya ikwitikisa ndi, amu nanrwaywa ivavaso. Ushi niń kwakooya ntakwanisaa nrumi shisha!

¹⁷ Amu kwakooya ndundaa ishoṛa li kwa ikunda lyakwa, noore maṛe akwa. Kwakooya kitaare nkwa ikunda lyakwa, kake ishoṛa li nawavaswa.

¹⁸ Kyasia maṛe akwa wwo kiń? Wwo iva: sheeli ili nkee ikwanisa nkwanisaa nrumi shisha ntawore maṛe, kitaare naṛundia kwa yawutia lya finya yakwa nkee nayo ifo nrumiń shisha.

¹⁹ Amu lla kasa nkee mboṛomue kwa vandu woose, nndekwaṛua iketi lya woose, amu nkooye vandu veengi mmwasi.

²⁰ Nndevia Vayuda sha Muyuda, amu nkooye Vayuda. Valya vakee kwa si ya mavavaso nndevavia sheeli nkee kwa si ya mavavaso, amu nkooye valya vakee kwa si ya mavavaso, lla kasa niń shi muni ntakee kwa si ya mavavaso.

²¹ Valya vateeshi mavavaso nndevavia sheeli ntawore mavavaso, amu nkooye iwo vateeshi mavavaso. Nta niikai ntawore mavavaso a Iṛuva ndi, kake nkee muyamavavaso a Kristo.

²² Valya vatanyari nndevavia ntanyari shawo, amu nkooye vatanyari. Nndeva wa mikae yoose kwa vandu woose amu kwa shia toose nkooye ikiṛa vandu.

²³ Nań nkee iṛunda ifo foose kiimba kya nrumi shisha, amu ntaṅaṛie mboṛa yayo.

²⁴ Mwishi se, sheeli valya vakee irisha alya ṅṅaṛoń ya kitavanu varishaa woose da, kake ni umwi tubu akee iniingwa uvingo? Kyasia risheń sha ulya umwi, amu muniingwa uvingo (lwa Iniva)!

²⁵ Ulya woose akee ivingana kitavanuń akwimaa kindo kyoose kya intashalisa. Valya vengi vakwimaa, amu vawarie uvingo lusiaa, ise (Vakristo) takwima, amu tiwarie uvingo lutasiaa.

²⁶ Kiimba kya iki niń nkee irisha sha nndu atakee irisha kya ruu, niń nkee ikabana sha nndu atakee iwa si kya ruu.

²⁷ Kake nkee ituṛua vvili wakwa na milangie yayo na iuvinga, amu ntakwanisie vandu vengi mboni shinuru ta ivakiṛa, nań lleeke kwa Iṛuva.