Barua ya Vakorinto ya mbele 7 - MMA SHIYYA

¹ Kyasia kiimba kya mboni tilya mundeshitisiṛia namwaṛua kuri: Llyo ṅwana nndumi atabaane nka.

² Kake kiimba kya ikwima waaisi nndumi woose ave na nka wamwi ye muni na nka woose ave na mmi wamwi ye muni.

³ Nndumi aniinge nka wamwi kilya kisumani nae, mfo kuro na nka nae aniinge mmi wamwi kilya kisumani nae.

⁴ Nka eetoṛio vvili wamwi ndi, kake ni mmi wamwi. Mfo kuro mmi eetoṛio vvili wamwi ndi, kake ni nka wamwi.

⁵ Manya mutakwime kitaare nkwa iirikiana mwaanya, amu mukooye nato kyeeri kya itereva. Numa mukwanie lingi, amu Satana atakooye mwaanya wa imuteveta kiimba kya ituṛa walio kwanu.

⁶ Kake nkee irera ifi, sheeli nammanya niń, ni ivavaso ndi.

⁷ Kake kilya mfurie nkuri: Vandu woose vave sheeli niń nkai. Kake nndu woose mmwavie wavi lwamwi muni ni Iṛuva, uu kuri na uu kuri.

⁸ Kake nkee iia valya kitaare vamaalika na misiketi: Llyo ṅwana vakaa sheeli niń nkai.

⁹ Kake kwakooya vatamakii isisiria, vaalike. Amu llyo ṅwana yalika kita ikoṛwa ni ilanga.

¹⁰ Kake valya vammaa ikwalikia navavavasa, ana nta nniń ndi, kake ni Nndumi: Manya nka atalakane na mmi wamwi.

¹¹ Kake kwakooya allakana nae, akaa kuri manya atakialikwa ana akwitanise na mmi wamwi. Lingi mmi manya atalakane na nka wamwi.

¹² Kake vandu vengi nkee ivaia niń ana nta ni Nndumi ndi: Mwanamae umwi wanu kwakooya awore nka wamwi atakusurie Iṛuva na nka to akundie ikaa nae, atalleye ndi.

¹³ Na nka awore mmi wamwi atakusurie na mmi to eerikie ikaa nae, ataleye mmi wamwi ndi.

¹⁴ Amu mmi atakusurie ailiswa ni nka wamwi, na nka ulya atakusurie ailiswa ni mmi wamwi. Kifo kitaare nkuro, vana vanu veevaa vesha ndi, kake alli vvasongori.

¹⁵ Kake ulya atakusurie kalakana akulakanie. Io nndu nkristo ave wa kiwomi ana wa kika ni mfinge ndi. Amu Iṛuva antivaangia unambwe.

¹⁶ Amu kumakii imanya are, iwe nka, akwaa kukiṛaa mmi wafo? Ana iwe nndumi kumakii imanya are akwaa kukiṛaa nka wafo?

¹⁷ Kake sheeli Nndumi andeavia nndu woose kyamwi na sheeli Iṛuva andevaanga nndu woose, aende kuro da. Nkyo ikyo nkee ivavasa siṛi toose.

¹⁸ Nndu llive kawaangwa ni Iṛuva akee nrine, manya atakiṛike. Nndu llive kawaangwa atakee nrine, manya atakirinwa.

¹⁹ Irinwa nkindo ndi na ilea irinwa nkindo ndi, kake ni iindia mavavaso a Iṛuva.

²⁰ Nndu woose akaa na mikae ilya eekee nayo ilyo andevaangwa.

²¹ A le kwavaangwa kukee iketi? Manya kutalolie nkikasha. Kake kwakooya kumakii ikutaua kutaue.

²² Amu ulya andevaangio̱ Nndumi akee uketiń avva ntaue wa Nndumi. Mfo kuro na ito andevaangwa akee ntaue ni iketi lya Kristo.

²³ Mundeuṛwa na uuru uumu, manya mutave maketi a vandu.

²⁴ Vanavama, nndu woose na mikae ilya andevaangwa nayo akaa na Iṛuva.

²⁵ Kya vana va sambuṛa noore ivavaso lyukie kwa Nndumi ndi. Kake nkee irera makusaṛo akwa nkee nndu andelilio̱ ni Nndumi nava mukusurwa.

²⁶ Kyasia kilya llolie kikee kinuru nkyo iki: kiimba kya ngyukiva ti tiifo kyeeri kya alli kivaa kisha nndu akaa na mikae akee nayo.

²⁷ Kwakooya kwalungwa na nka le, manya kutatiṅwa iboṛomulwa. Kwakooya kutandealika manya kutaṛuye nka.

²⁸ Kake kwakooya kwaalika kuwore ilomi ndi. Ana sambuṛa ikaalikwa yoore ilomi ndi. Kake vandu sha iwo vakooyaa mavina a vvili, nań mfurie imuringa ifo.

²⁹ Kake nanumbua kuri, vanavama: Kiṛengo kya kyeeri ki kyamaangua. Kyasia kuuka alli valya vawore vaka vave sha vatawore. Na valya vakee iiya vave sha vatakee iiya.

³⁰ Na valya vawore ifura vave sha vatawore ifura. Na valya vakee yuṛa findo vave sha vatawore kindo.

³¹ Na valya vakee ifuṛukania fa isanga vave sha vandu vakee ifuṛukana kya ruu. Amu isanga sheeli likai alli likee isia.

³² Nań mfurie muve na yatarika ndi. Ulya kitaare amaalika akee ikwareesa na mboni ta Nndumi kasa asenyaa Nndumi.

³³ Kake ulya amaalika akee ikwatara na mboni ta isanga li kasa asenyaa nka wamwi kava na mirwe ivili.

³⁴ Na nka atakee na mmi akee ikwatara na mboni ta Nndumi, amu ave nsongori vvili na nrima, na mwana wa sambuṛa mfo kuro. Kake ulya amaalikwa akee ikwatara na mboni ta isanga li kasa asenyaa mmi wamwi.

³⁵ Narera ifi amu mmwelekie. Namuia ifi nta ni imureya ndi, kake nkwa kiimba kya filya fisenyie, lingi naamu mumakii iṛundia Nndumi kitaare mwaomulwa mfindo fiingi.

³⁶ Kake nndu na kava i kalolia sheeli atakee itania mwana wamwi wa sambuṛa sheeli kinsenyie, na kwakooya ito ankilisa usha lwa ukoo lwamwi na kwakooya kitinye-fo kindo, kyasia atane sheeli akundie. Antana kikasha ndi. Avaniinge muumu vaalikiani.

³⁷ Kake ulya akee nsaari kyumu ifo ngooń yamwi ataare ikabiṛio̱ kamakii ishilia mifurie yamwi, lingi eemmaa ikusongosia nrimiń wamwi iringa mwana wamwi wa sambuṛa, antana kinuru.

³⁸ Kyasia mfo na ulya akee yorisa mwana wamwi wa sambuṛa antana kinuru. Na ulya atakee imworisa aengeriaa itana kinuru kita.

³⁹ Nka afingie ili mmi wamwi akee na muu. Kake kwalooya mmi wamwi amfwa, mmwotoṛe aalikwa ni nndu woose ulya amfurie, kive kari ka Nndumi da.

⁴⁰ Kake ṅṅwana ikaa sheeli akai, nkuro niń llolie. Nań nkusurie sheeli niń nań noore Mumuyo wa Iṛuva.