Barua ya Vakorinto ya mbele 5 - MMA SHIYYA

¹ Koose ifo kwanu kikee iitiwa kukwani waaisi, nalo wwaaisi luteefo na akwaa nkwa vayavaṛumu: sheeli nndu akee iva na nka wa ndee.

² Neeni mukee ikushomba, nta ikunaria nta kinnya, amu autwa kari kanu ito antana kindo kyo ndi.

³ Na akwaa ntakee kwanu na vvili wakwa, kake nrima wakwa ukee kwanu. Nań nammaa yumisia ito antana kikasha kya mikae yo sheeli niiyo.

⁴ Na irina lya Nndumi Yesu Kristo tikusaandi nrima wakwa neeni andu emwi na finya ya Nndumi weru Yesu,

⁵ tirambikie Satana nndu to, amu vvili uretwa, na nrima wamwi amu ukiṛwa ili nkonu ulya wa Nndumi Yesu ufikaa.

⁶ Ukushombi lwanu ni usha ndi. Mwishi se sheeli kidooka kinnya kidookisaa imbumbu lyoose?

⁷ Kyasia uteń-fo kidooka kilya kikuu, amu muve imbumbu iiya litawore kidooka. Amu na yaanri lyeru lya Pasaka lyammaa isikywa, yye Kristo.

⁸ Kyasia tile kisuku kyeru kiteefo kidooka kilya kikuu ana kiteefo kidooka kya ureti na ukasha. Kake tile kisuku kyeru kiwore findo fitadookie, yyo mirima myeelwa na udede.

⁹ Nndemutisiṛia ifo barueń ilya yakwa sheeli manya mutasangesange na vaaisi.

¹⁰ Niikai narera mulakani deń na vaaisi va isanga li ndi ana na manini ndi ana na fisoki ndi na ana na varasia vaṛumu ndi. Kifo nkuro kyeemmuwaraa muuke isangeń.

¹¹ Kake mboni to sheeli tikai nndemutisiṛia sheeli mutasangesange na nndu akee ivaangwa mwanamae, nae mmwaaisi ana llembi ana murasia vaṛumu ana nruma ana nnangwa ana musoka. Nndu wa mikae ii mutakunde nta iliana nae.

¹² Amu nkiki kyashitiṅa nuumisie iwo vakee wooṛo? Ini mmashoṛa anu se yumisia iwo vakee va siṛi yanu?

¹³ Kake iwo vakee wooṛo ni Iṛuva avaumisiaa. Somuteń nkasha ulya akee kari kanu.