Barua ya Vakorinto ya mbele 3 - MMA SHIYYA

¹ Nań, vanavama, nta nndemakii irera neeni sha vandu vawore mikae ya Mumuyo ndi, kake nsha vandu vawore mikae ya vvili, lingi nsha vana vannya va ki-Kristo.

² Nndemuniinga maruva, nta nndemuniinga shoonga shuumu ndi, fulya kitaare mwimakii mwikiseree. Ee na akwaa ni alli mumakii ndi.

³ Amu na akwaa ni alli mukee vandu va mikae ya vvili da. Amu kwakooya kwanu liifo iiria iriso na uṛiingi, a le mukee vandu va mikae ya vvili se mwiendaa kwa mikae ya kinndu?

⁴ Hi umwi akee irera: niń nkee wa Paulo, na ungi kanumbua: niń nkee wa Apolo, a le ini mukee va kinndu se?

⁵ A Apolo wwa ki? Na Paulo wwa ki? Vvaṛundi vandemulosha ikusura Nndumi, na nndu woose weru akee iṛunda sheeli andeavio̱ ni Nndumi.

⁶ Niń nndeveekya Apolo kanisa, kake Iṛuva yye andemirisa.

⁷ Kwa ikyo muveekya yye ndi ana nta munisa yye ndi, kake ni Iṛuva mumirisa.

⁸ Kake muveekya na munisa vavakani, na nndu woose aniingwaa maṛe amwi asumani na mikwatarie yamwi ye muni.

⁹ Amu ise tiṛundaa mashoṛa andu emwi na Iṛuva, ini mukee nrema ya Iṛuva, lingi mukee numba ya Iṛuva.

¹⁰ Na kwa uwoo nndeavio̱ ni Iṛuva niń nnderema mfulo kwanu sha mwaṛia awore uṛango lwa itana numba na nndu ungi kashetania kwa ule yayo. Kake nndu woose alle kasa ataniaa kwa ule yayo.

¹¹ Eefo nndu amakii irwaa-fo mfulo wa mikae ingi ndi kitaare ni ulya wammaa irawa-fo, nto Kristo Yesu.

¹² Kake kwakooya nndu atania kindo kwa ule ya mfulo uu sha saabu ana fesa ana findo fa uuru ana miri ana marava ana maṛe:

¹³ kyasia mashoṛa a nndu woose amanyikaa na baa. Nkonu ulya wa uumisio wavanisaa, fulya ukumanyisaa urie muro. Na muro ulya weleliaa ishoṛa lya nndu woose llya mikae ki.

¹⁴ Ishoṛa lya nndu andelisongosia likankaa litareke muroń aniingwaa maṛe amwi.

¹⁵ Ishoṛa lya nndu likanreka muroń atuṛaa maṛe amwi. Kake ye muni akiaa, na ikia lyamwi livaa sha lya nndu akia muroń.

¹⁶ Mwishi se sheeli ini mukee numba ya Iṛuva na sheeli Mumuyo Nsongori akaa kari kanu?

¹⁷ Kwakooya nndu akasheesaa numba ya Iṛuva, Iṛuva akasheesaa nndu to. Amu numba ya Iṛuva nshisongori, nayo ni ini.

¹⁸ Manya nndu atakulembe ye muni! Kwakooya nndu akulolia sheeli awore uṛango kari kanu na kari ka isanga li, ave sha ntondo, amu llyo akooyaa uṛango.

¹⁹ Amu uṛango lwa isanga li ni utondo mbele ya Iṛuva. Amu nkitisiṛe: ”Areyaa vaṛango ifo mitambweń yawo“.

²⁰ Na lingi: ”Nndumi eeshi makusaṛo a vaṛango sheeli ni a ruu“.

²¹ Kwa ikyo manya nndu atakuṅinise na nndu ungi!

²² Amu foose mfanu, kwakooya mPaulo ana Apolo ana Kefa ana isanga li ana muu ana ufu ana filya fiifo alli ana filya fivaa fishe, foose mfanu.

²³ Neeni mukee va Kristo, na Kristo wwa Iṛuva.