Barua ya Vakorinto ya mbele 2 - MMA SHIYYA

¹ Kyasia vanavama lia niń nndesha kwanu, nta nndesha mmukwanisie Iṛuva na unini lwa firero ana nta lwa uṛango ndi.

² Amu niikusaṛiee nta imanya kirero kimwi kwanu ndi kita Yesu Kristo, nae yye akabio̱ nsalabeń.

³ Nań nakaa kwanu na mikae ya utanyari na weṛei na irerema iingi.

⁴ Na kirero kyakwa na mikwanisie yakwa nnderera nta kwa firero fa waṛia lwa ikangia ngyuṛango ta vandu ndi, kake nkwa finya ya Mumuyo,

⁵ amu ikusura lyanu litave lya uṛango lwa kivandu, kake live kwa finya ya Iṛuva.

⁶ Lingi fiifo fa uṛango lwa dede tikee iia valya vamakii yawutia, kake mfa uṛango lwa isanga li ndi ana fa iwo vashiliaa isanga li varekaa ndi.

⁷ Kake tarera uṛango lwa Iṛuva lukee kiṛisi, lukee ufise llua Iṛuva eemmaa iludeeṛia kuuka ilyo kala kitaare isanga lyeentanwaa, amu ise tikooye tikisi yeru.

⁸ Uṛango lu veetoṛio isanga li veelwishii nta umwi ndi. Amu kifo veelwishii, nta veekabiaa Nndumi muni unini nsalabeń ndi.

⁹ Nsheeli kyatisiṛwa: ”Filya kitaare iriso lyamfilolia ana kitaare kuri kwamfiita ana kitaare famaaka ngooń ya nndu, mfo Iṛuva eemmaa ideeṛia valya vankundie“.

¹⁰ Kake ise Iṛuva antirambuya lia atiniinga Mumuyo wamwi. Amu Mumuyo akee yavanisa foose na irambua fiṛisi fa Iṛuva.

¹¹ A naań eefo nndu eeshi mikae ya nndu kitaare mmumuyo wa nndu to ukee kari kamwi? Mfo kuro da fa Iṛuva fikai, nta nndu afimanyaa kitaare mMumuyo wa Iṛuva.

¹² Kake ise tanniingwa mumuyo wa isanga li ndi, kake tanniingwa Mumuyo aukie kwa Iṛuva, amu timakii imanya filya tamaavio̱ ni Iṛuva.

¹³ Nafo mfo tikee ifirera ana tikee ifirera kwa firero talloshwa ni uṛango lwa kivandu ndi, kake talloshwa mMumuyo. Na ifo mboniń ta Mumuyo mfo tikee ikooya firero fa Mumuyo.

¹⁴ Kake nndu akusurani na mikae yamwi meni awariaa fa miniingie ya Mumuyo wa Iṛuva ndi, amu kwamwi ye nsha fa utondo, amakii ifimanya ndi. Amu ifi kyawara fimanyike kwa finya ya Mumuyo.

¹⁵ Kake nndu wa Mumuyo akee imanya foose ana ye akee irambuywa ni nndu ndi.

¹⁶ Amu: ”Ni i ammanya makusaṛo a Nndumi amwie kindo?“ Kake ise tikee na mikae ya Kristo.