Barua ya Vakorinto ya mbele 11 - MMA SHIYYA

¹ Kuvakaniseń nań sheeli nań nkee ikuvakanisa na Kristo.

² Kyasia nkee imwitikisa, fulya mushikumbue kya findo foose, neeni mukawara mavavaso akwa alya nndemuniingia.

³ Kake mfurie mumanye sheeli nrwe wa nndumi woose ni Kristo, na nrwe wa nka ni nndumi, na nrwe wa Kristo ni Iṛuva.

⁴ Nndumi woose ili eeterevaa ana eeongoyaa nae asikie nrwe wamwi, ansuta nrwe wamwi.

⁵ Kake nka woose ili eeterevaa ana eeongoyaa kitaare asikie nrwe wamwi, ansuta nrwe wamwi, amu avakani na nka wa shia ulya muute nrwe.

⁶ Amu nka kwakooya atasikiaa nrwe, usemwa mafuli deń. Ana kwakooya ni usutu nka isemwa mafuli amwi ana yutwa, asikie nrwe.

⁷ Nndumi dede kyawara asikie nrwe ndi, amu akee fwana ya Iṛuva na ya tikisi yamwi. Kake nka ntikisi ya nndumi.

⁸ Amu nndumi amilie kwa nka ndi, kake ni nka amilie kwa nndumi.

⁹ Ana nta nndumi atanwa kiimba kya nka ndi, kake nka atanwa kiimba kya nndumi.

¹⁰ Kwa ikyo kyawara nka ave na myorusie ya iitoṛio ni nndumi nrweń (kiimba kya vamalaika).

¹¹ Kake nka akee kindo kitaare eefo nndumi ndi, ana nndumi akee kindo kitaare eefo nka ndi, nkwa mifurie ya Nndumi.

¹² Amu sheeli nka auka kwa nndumi, mfo kuro na nndumi airiwa ni nka. Na findo fi foose mbooko yayo fuukie kwa Iṛuva.

¹³ Kusaṛeń mu veni kwakooya kisumani nndu nka atereve Iṛuva atasikie nrwe?

¹⁴ A uṛango lwanu lo weni lukee imulosha ndi sheeli nndumi kava na mafuli maasha ni usutu lwamwi?

¹⁵ Kake nka kava na mafuli maasha ni utoṛe lwamwi. Amu anniingwa mafuli maasha, amu ave andu a masaṛa amwi.

¹⁶ Kake kwakooya nndu afurie iira ngani, ise toore mikae sha iyo ndi ana nta siṛi ta Iṛuva ndi.

¹⁷ Kyasia kilya nkee imuia alli ni ivavaso lyakwa, fulya fiifo findo kwanu fitashisenye. Amu makusandio anu amwendee mboṛa ndi, kake ukasha.

¹⁸ Kya mbele naita sheeli ifo kwanu ili mukee ikwania siṛiń liifo ikuraua. Nań kwa kyeenga niirikie.

¹⁹ Amu kyawara ikuraua live-fo kwanu, amu valya vakee va dede kwanu valolike na baa.

²⁰ Kyasia ili mukee ikwania andu emwi nkimwi na ilya shoonga ya Nndumi ya waaṛo ndi.

²¹ Amu ili mwilyaa, nndu woose akee iimboo-wo miliyeń ilya shoonga yamwi yo sheni, na uu umwi awarwa nsoto na uu ungi anangywa.

²² A le muwore numba tanu se ta iliya na inuiya? Ana mukee iila siṛi ya Iṛuva na isuta valya vatawore kindo? Namuia are? Namuitikisa? Kiimba ikyo mmuitikisaa ndi.

²³ Amu niń kilya nndemurambikia naniingio̱ ni Nndumi, nakyo nkyo iki: Kio kilya Nndumi Yesu aṛiingio̱ kaimboo nkate kaana Iṛuva kaufukyafukya kanumbua:

²⁴ Ngyeń leń, uu ni vvili wakwa urawaa ufuń kiimba kyanu. Neeni veń vandu valyaa, amu mushikumbue niń.

²⁵ Mfo kuro kaimboo na umbata lua ili vandemaa ilya eenumbuaa: Umbata lu ni mma shiya ivikwa na usao lwakwa. Taniń kuro kyeeri mukee inwa, amu mushikumbue niń.

²⁶ Amu kyeeri kyoose mukee ilya nkate uu na inwa umbata lu mukee ikwanisa ufu lwa Nndumi kumande ashaa.

²⁷ Kyasia ulya woose alyaa nkate uu ana inwa umbata lwa Nndumi kitaare ankusongosia, ito ankuṛuiya mwaandu kiimba kya vvili wa Nndumi na usao lwamwi.

²⁸ Kake nndu akusaṛaani mbele ye muni. Kammaa amakii ilya kya nkate uu na inwa kya umbata lu.

²⁹ Amu ulya akee ikuliya da na ikuniya da ankuṛuiya mwaandu ye muni, fulya ataindie vvili wa Nndumi kisumani.

³⁰ Kiimba kya ikyo kwanu veefo veengi vakee vatanyari na valole na vandu kinga valele.

³¹ Kake kifo tiikusaṛanaa imanyiń lyeru ti veni, nta tiiumisio̱o̱ ndi.

³² Kake ili taumisio̱, neekai taikimbwa ni Nndumi, amu titashe iretwa andu emwi na va isanga li.

³³ Kwa ikyo vanavama, ili mukusandiaa kiliyoń kyawara mukuvere.

³⁴ Kwakooya nndu awore nsoto aliye mbele kyeń kwamwi. Manya ikusandia lyanu litamuvie uumisio. Na ifo fisaiye ili nshaa nndefisongosiaa.