Лукара йибкьыд Шадды Хабар 8 - Лукаады Шадды Хабар

ГьӀасахьван диъид хьылешикляа

¹ Гьадыыла хъуъ са арыдыыла ГьӀаса руъура шегьерма на мукъӀма, Йинчид ПагьӀчаалыгъаклаа хабар ваъара. Гьанийхьван диъий джуды цӀыкьӀваӀр мутагьӀлим,

² са ки хьур-рыхьыр хьыдылды, Джу ядлымыклаа на шийтӀамашдаа азад дыъыд: Мария, «Магдалина» хьур лакьаб гъад, йывды шийтӀандиклаа Гьание гехъеэрид,

³ Иоанна, Хузад – Иродды управляющийед къари Сусанна, са ки маддыбыр. Гьабише джухьды джибяа куьмег гьаъарай ГьӀасас на Гьанийды мутагьӀлимешис.

Сук виед ладжбаракляа ихтилат

⁴ Са хылис, кьухьды кӀабал ягъмиш вишийне кал, – илсанар Гьанийхда гьӀар шегьердаа диъина ай, – ГьӀасара гьабишис са ихтилат гьаъара:

⁵ – АӀгъӀаӀбчӀура са кенчи ладжбар сук виес, виед гедеэне са-сад сукбыр рыкъӀыде саъ сибхьура, мыкӀмыхьде гибхьура, шуркумаше улере.

⁶ Маддыбыр сибхьура къат кид накъудыы, лилкьара, амма хьед джишир, къуру руъура.

⁷ Тимбыйдыбыр сибхьура зазалма – Лилкьара, амма зазалмыра лидхьус вылцӀаардиш.

⁸ Сабыйдыбыр силхьвара йыхды накьудыы, лидхьур, бытӀрад еш вылцӀара. Гьааса гьухьур, ГьӀасара лал ваъара: – Убрабыр кинийис ун йиший!

⁹ МутагьӀлимеше хулкара ГьӀасадаа, шыв рухьуд ихтилат иди гьа.

¹⁰ – ВаӀдаа йикиси Аллагьад ПагьӀчаалыгъад сирмыхьде гедкьас, – рухьура ГьӀасара, – маддыбишис Изды чӀелбыр хал-гийинбырна адгаси, гадкъара, гьаджагун бадаана, къадабцура, геджедкьын бадаана.

¹¹ Ихтилатара хьуйне, мисе рухьура; сук – Йинчид чӀел виъи.

¹² РыкъӀыде сидхьуд сукбыр – илсанар диъи ун ад, амма хьели Иблис йибкьыр, хъихире чӀелбыр гьабишды йикӀяа, гьабыр инаамиш джидшир, азад джидшин бадаана.

¹³ Къат кид накьудыы сидхьуд сукбыр – илсанар диъи, ун йишир, шадна хывылкьад чӀел, амма гъваб гидиш гьабишихьде, гьадыыла цӀамды гедеэне гьабыр инаамиш дуруъура, четинваӀле ыдхӀыр мадана хъуъ суьхъдуьбкуьре,

¹⁴ Зазалма идхьуд сукбыр – илсанар диъи, чӀилды ун йишир ад, амма гьӀумирдире, гвалахмыра, шигьимыра, пешемыра хьуъ гаджаадгъур ад, гьадыыла гьабишды гытӀ хъилкьаардиш.

¹⁵ Йыхды накьуди идхьуд сукбыр – илсанар диъи, ун йишир, джухьды йыхды, темизды йикӀе увухӀуд, – гьадыыла гъыд вихинире еш вылцӀара.

¹⁶ Гьална ки, пӀинтӀий луьвкӀва выъыр, гьадыы уу дыкӀый лихьисдиш, я чарпыехьде гивхьисдиш. Ваъ, гьа лаъ киидхьуд джигиди ливилхьере, йидкьыдбишис йаӀкв гьагун бадаана!

¹⁷ Гьис хьуйне, адиш гьаасад сир, эхир ашгара джикисды, Адиш гьаасад дагулды, эхир, гьацӀара йишир, гъаъ игъджидхьусды.

¹⁸ Иди хьваам гьаъ ваӀ выхьды, ваӀ шууна хъадабцурди. Гьис хьуйне, анийис маа выси, гьалыхда адишди, джус ад калабгуд ки хӀаашуси.

¹⁹ Сада дуруъура Гьанийхда нин не шубаӀ, амма кӀабалаклаа бегеде дуруъус руъурдиш.

²⁰ ГьӀасада рухьура: – Выды нин не шубаӀ ги гъара, вы гьагус йигара.

²¹ Амма Гьание рухьура тимбишде: – Изды нин не шубаӀ – Йинчид чӀилыхда хъадабцуд на гьадид хьаӀле ана дирхьадбыр диъи.

ГьӀасара тӀурхьван либхьудид хьед луза хъаъара

²² Сада ГьӀаса джуды мутагьӀлимер ки хъуна гемиди сукьур, рухьура гьабишде: – Дыкьа йаӀ-ваӀ ти суруу агъӀачӀус.

²³ Силгара геми къирхыдаа тиниъ. Хьидыыла тиниъ диъид джигиди ГьӀаса некьик кибхьура. Садахьурка либхьур тӀурхьван, геми араа саъ килъэре каӀбчӀура, гьабыр сиене четинваӀле ыдырхӀаӀре.

²⁴ МутагьӀлимер ГьӀасад бегеде дыхьыр, кеэйере Гьа. – МагьӀалим, магьӀалим, дыкьыркьара а е! – рухьура мибише. Гьание, киирхьур, гиивхье хъаваъара хьыбыл, луза хъаъара лепебыр. Гьабыр секин хъишир, гъӀыдилды гьаваа хъӀувгъӀуре.

²⁵ – Выхьды инаамишвалды гьили а? – рухьура ГьӀасара мутагьӀлимешде. ГичӀере йишир, гьӀаламат йишир ад мутагьӀлимеше рухьура са-сынийде: – Вышдихь Гьа, хьыблис не хьидис ки кине бииругъбыр вьлцӀара, тимбыр ки хъацва гьаъад?

ГьӀасара «Кьиямат» хьур дур гъад шийтӀан йивиргара

²⁶ Гьабыр ледыркьара Галилеядид къаншара ад Гергесийшды накьудид къирхыда.

²⁷ ГьӀаса къирхыы аӀгъӀачӀуйне, Гьанийды улихьде гырхӀаре – шегьердаады шийтӀамашде хад эдеми. Гьа мыс идаа хъуъ валыг гъадишне гъургъара ай. Хала ешемиш джишир, ешемиш руъурай сырымыы.

²⁸ ГьӀаса гьагуйне, гьа лал хъиибхьур, гьанийды гъилаба ибхьура, рухьура; – Вас закляа шиви йигад, гьай ГьӀаса, Йинчид Дух? Вахьде миннет виъи, заа йыгъ гымарыг!

²⁹ Гьанийе гилий ваъара ай, ГьӀасара гьанийды джанде ад шийтӀамашде «гъаъ ихъийиъ» рухьура. Шума иди иблисере гьа эдеми халкьара ай, гьа гедеэне зинджирмыхьван йиртӀе гьыъыр ки, къаривыл гьыъыр ки, гьа зинджирбыр тике-тике гьыъыр, хъахарай, иблисере хьура лийир, кеэйид джигима.

³⁰ – Выши выды дур? – хулкара ГьӀасара. – Кьиямат, – джываб хъывылцӀара тиние, джуды джанде балад шийтӀамар адыыла.

³¹ Гьабыр ГьӀасахьде джвер «ракьатди сихъмелыг» хьур, миннитдис гибхьура.

³² Ай гьа джигиди банаа йыхьара ад вакмыд кьухьды нехир. ШийтӀамар гибхьура ГьӀасахьде, джвершиде вакмыд джанде аӀчӀус вияъ хьур. ГьӀасара ихтияр вылцӀара.

³³ ШийтӀамар, эдемиед джандаа гъаъ хъидкьыр, аӀбчӀура вакашде, вакбыр ки дели йишир, хъутӀанаала саъ хьидыы лийчир, араа саъ килъэре.

³⁴ ХӀабаӀхъӀанер, йишидбыйды гьагуйне, хъадахыри шегьерди, гьади ки, аа-уу гид мукъӀма ки ихтилат гьаъара йишир ад кардыклаа.

³⁵ Илсанар дуруъура гадкъас, шыв гьыъыр ади, йидкьыр гадкъыд, – гъабгура шийтӀамар гъаъ ихъийир ад эдеми, валыг ки гъана, бытӀрана ихтилатбыр ки гьаъара ГьӀасад гъилабада сукьур ад. Гьабишис гичӀ вырыхӀыре.

³⁶ Шийидеше ихтилат гьаъара гьабишис, шууна ГьӀасара делид хъыъырди.

³⁷ Сиене Гергесийед илсанашис гьасса гичӀ вырыхӀыре, гьабыр гидибхьура ГьӀасахьде джухьды «еримыылы хъырых» хьур. Гьа ки, гемиди аӀхъӀачӀур, хъургъара.

³⁸ ГьӀасара шийтӀамар гъаъ ихъийид эдемиес Минийихьван йыкьас йигара ай. Амма ГьӀасара рухьура:

³⁹ – Хъырых выды хала, ихтилат гьаъ, Йинчире вы бадаана шыв гьыъырди. Ти ки гьаархӀыри, сиене шегьердис ихтилат гьаъара, ГьӀасара джус шыв куьмег гьыъырди.

Иаирды рыш

⁴⁰ ГьӀаса хъургъур хъиркьыйне, Гьанийис шадна салам выри, гьис хьуйне Гьа илсанашды гьӀараасатдире рыкъӀа гуьзет гьаъара ай.

⁴¹ Гьа гедеэне руъура Иаир хьур эдеми – гьа синагогадид кьухьды йиъий, – ирхьури ми ГьӀасад гъилаба, «джуды хала йыкьа хьур» гирхьур,

⁴² гьанийды ад са цӀыкьӀваӀд сен йишид рыш рикьире ай. ГьӀаса руъура гьанийихьван, илсанашды кӀабалмыд арыди ана.

⁴³ Са хьыдылды цӀыкьӀвад сен ий эбираа сирхьир ад. Гьание джухда адухъунды танга джерахӀашыы кувгъур ай, амма гьалдаана гьа хъараъас йиширдиш.

⁴⁴ ЙыкьӀахълаабый йиркьыр, гьа керыркьара ГьӀасад чухуйед этегек. Гьади мадана эбир хъабтӀури.

⁴⁵ – Выши зак кийкьыд? – хулкара ГьӀасара. Сиенебише джвер кедкьыд диш рухьура. Гьа гедеэне Петрара рухьура: – МагьӀалим, выды аа-уу илсанар ги, сиене суруумыла эчӀидхьыр а.

⁴⁶ – Ваъ, вышди зак кийкьыри, – рази руъурдиш ГьӀаса. – Зас изды джандаа гъаъ кьуувет гьаабхӀыд хабар вишири.

⁴⁷ Гьа гедеэне, гиркӀа гьаъас джикисды геркьыр, руръура хьуъ са хьыдылды, лакьалкьара, Минийды гъилябырма ирхьур, халкьдид улихьде ихтилат гьаъара, шыв себеб вишир ридж керкьырди Гьанийик, шууна ридж гьади мадана хъирширди.

⁴⁸ – Рыш, вы выды инаамишваӀлире хъырыъыд риъи. Хъырырых архыйинне, – рухьура минийде ГьӀасара.

⁴⁹ ГьӀасара гьааса гьухьур мадана, синагогадид кьухьнийды халаады эдеми йиркьыр, рухьура: – Рикьири выды рыш. Маа МагьӀалимяа йыгъ гымарыг.

⁵⁰ Амма ГӀасара, гьа чӀилмыд ун йишир, рухьура Иаирде: – ГимийичӀ, инаамиш йиш – гьа рикьисдиш.

⁵¹ Хала аӀчӀур, Гьание джухьван адубгъура са Петр, Янан, Якьуб, са рышед дид не нин.

⁵² Хала ад сиенебыр, риин гивхьир, мыхыр ветере, дешере ай рышахда. Амма ГьӀасара рухьура: – Медеш. Гьа рикьир адиш, сархыр а.

⁵³ Тимбыр Гьанийыы яхъӀбыр гьаъара каӀчӀури, рыш рикьид гьацӀара.

⁵⁴ Амма Гьание, хакьыр рышед хыл, рухьура: – Рыш, лухъурза!

⁵⁵ – Тинийде ил ахъабгъура, рыш гьади мадана, лухърубзура, ГьӀасара гьанийис улесды кывыс вылцӀара.

⁵⁶ Дид не нин дакьалкьара дишир ай. ГьӀасара хьуйне гьалысна джвершис гьагудид ихтилат маъ рухьура.