Лукара йибкьыд Шадды Хабар 7 - Лукаады Шадды Хабар

ГьӀасара юзбашиед къул хъыъыри

¹ ГьӀаса, халкьдиде гьухьур йигабыр гьухьудыыла хъуъ, Капернаумди хъӀугъӀуре.

² Са юзбашияхда ай джус бала гирамигды са къул. Къулас едере йишир, йикьире ай,

³ ГьӀасаклаа хабар вишийне, юзбашиере сидилгара Минийхда джавыдашды кьӀасдыбыр «йиркьыр къулас куьмег ви» хьур миннет хана.

⁴ Йидкьыр ГьӀасахда мибыр миннитдис гидилхьвара:

⁵ – Гьа эдеми куьмег вынис гид и, – рухьура гьабише. – Гьанийис ихьды халкь хъывгара, гьание и ес синагога лувза выъыд.

⁶ ГьӀаса руъура мибишихьван. Гьабыр ледыркьара ай центурионды халда, тиние джуды хыдиймашде хана хабар сивигыйне: – Джан Иесси, ва вас гудж мываъ. Изды хал Вы аӀчӀус лейих диш.

⁷ Гьадыыла и зы вахда джиркьыд – Выды хал зы калдыбыр дыкьасды диш. Ва гьихьяъ – изды къул гьади мадана хъикиси.

⁸ Зы ки маннийды хылихьде ги, амма изды хылихьде ки эскерер ги, за сынийде гьухьуйне; «Рых», гьа руъура; маннийде «Миди йыкьа» хьуйне, гьа руъура, къулада «Мисе гьаъ» хьуйне, гьание ки гьаъара.

⁹ ГьӀасас ми чӀилмыд ун йишийне, гьӀаламат руъура, ругъур Джухда хъуд илсанашде рухьура: – За рухьура ваӀде, Израилди ки кине мисед инаамишвалды Зас гьувгуд диш.

¹⁰ Векилешис, хала хъидкьыйне, къул ахъархьыр гьабгура.

ГьӀасара хиндадыед дух хъыъыри

¹¹ Бегедене ГьӀаса руъура Наин хьур дур гъад шегьерди. Гьанийихда хъуй мутагьӀлимер не эккед кӀабал илсанашды.

¹² Гьа шегьердид саргьӀатеде лийкьад гедеэне, шегьердаа гъаъ хай са хиндадыед ад са духарды майит. Гьанийихьван майитахда хъуй эккед илсанашды гьӀарасат.

¹³ Хьыдылды гьаргуйне, Илагьиес минийды гьӀаюхь руъура. – Мереш, – рухьура Миние.

¹⁴ Бейде йыхьыр, Ми майитек кийкьара. Майит хад илсанар луьдуьбзуьре. ГьӀасара рухьура: – Джигьил, рухьура вада, лухъуза!

^15-16 Джаназ лаъ хъишир, гьалгара кагъӀуре. ГьӀасара ми нинде хъывылцӀара. Сиенебишис гичӀ йывхӀыр, Йинчихьде шукур ваъара кадгъӀуре. – Кьухьды пайгъампар магьӀлим йишир а ихьды арыди, – рухьура гьабише. – Йинчире Гьа Джуды халкьдис куьмегне сигыр ад и.

¹⁷ Минийклаады ихтилат сиене Иудеядыы на аа-уу ругъури,

ЯхӀйе-пайгъампарад суал

¹⁸ ЯхӀйе-пайгъампарад мутагьӀлимеше хабар ваъара гьанийис ми сиене ихтилатмыклаа.

¹⁹ ЯхӀйере сес выъыр джуды кьӀвар мутагьӀлим, сидилгара мибыр Илагьияхда худкас: «Вы йиркьыр лазимдыбыйды йиъиме, дишди е маннийихда гуьдкуьн лазим име?»

²⁰ Гьабише, йидкьыр, ГьӀасадаа хулкара; – Хачилый ЯхӀйере сидигыдбыр диъи е худкас: «Вы йиркьыр лазимдыбыйды име, дишди е маннийхда гуьдкуьн лазим име?»

²¹ Гьа гвалах вишир ай ГьӀасара балад илсанар ядлымыклаа азад дыъыйне, шийтӀамашде хадбишды шийтӀамар йихъигыйне, балад быркьӀыдбишис йаӀкв гьагва хъыъыйне.

²² ГьӀасара джываб хъывылцӀара: – Дырых, хабар ваъ ЯхӀйе-пайгъампарас, ваӀс гьагумыклаа на ун хъӀыхӀымыклаа: быркьӀыдбишис гьахъабгура а, тӀыркьӀыдбыр хъидирхьара а, джузандыбыр темиз хъӀудире а, бышдыбишис ун хъӀугъӀуре а, дыркьыдбыр лаъ луьхъдуьбзуьре а, касибешис Шадды Хабарад ун хъӀырыхӀыре а.

²³ Заа, шаклы джишир, инаамиш йишидбыйды бахтлы йиъи.

²⁴ ЯхӀйед векилер хъӀаадхӀыйне, ГьӀасара рухьура халкьдиде ЯхӀйе-пайгъампараклаа: – ВаӀ гьидис къумди дыхьыдбыр диъи, Хьыблихьде сильэре ад? «НацӀалыхда гадкъас» хьур име?

²⁵ Бес ваӀ гьидис дыхьыд и къумди? БытӀрад валыгмар гъад эдеми гьагусды калагур айме? Бес бытӀрад валыг гъад эдемиер къалыма ешемиш дуруъуд дишме?

²⁶ Бес ваӀс выший гьагур йигад? Пайгъампарахда ийме? Ий, ваӀс гьагудбыйды пайгъампар и, За рухьура ваӀде, гьа пайгъампарахъаъ ки лаъ хъу.

²⁷ Гьанийклаа и Диндид дахьвдарак кид: «Ми За сигыд илчи йиъи Выды улихьде, Выды улихьде гаӀчӀур, Вас рахъӀ ачых ваъасды».

²⁸ Рухьура ваӀде, сиене илсанашды улмутдик кидиш ЯхӀйе-пайгъампарахъаъ лаъ хъуд, Амма Аллагьад ПагьӀчаалыгъа сиенебишихъаъ кӀаъды ки, гьанийхъаъ кьухьа и.

²⁹ Сиене халкь, ЯхӀйе-пайгъампарахда хъавалцвара ад, кире ягъмиш гьаъадбыр ки кине, Йинчид наятбыр дуьздыбырна гьӀасаб гьыъыр, вуруъура ЯхӀйехда хьед йыхӀыс выс.

³⁰ Фарисейер не Диндид магьӀалимер Йинчихда хъадацус джидчӀир, ЯхӀйе-пайгъампарада хьед йыхӀыс выс дичӀеэрдиш. ГьӀасара рухьура:

³¹ – Гьалыхьван хидхьис йикиси Задаа ихьды вахтиндид илсанар? Гьалык кидикара гьабыр?

³² Гьабыр гиме гид хынимешик кидикара, сабыйдыбише тимбыйдыбишде рухьура: «Е ваӀс тутул вырыхӀырей, ваӀ мукӀбыр гьыъырдиш». – «Е ваӀс хулбыр гьаъарай, ваӀ хаджалат гьыъырдиш».

³³ ЯхӀйе йиркьыри, – я улеэрдиш, я рагъаардиш – ваӀ рухьура; «Гьа делид и!»

³⁴ Йиркьыр а Илсанашды Дух, улере ки а, рагъара ки – ваӀ рухьура: «Тиниъга, шууды невс ади, кире ягъмиш гьаъадбишды на мадды лак-лукад хыди и».

³⁵ Амада Йинчид Гьакьал сиенебише гьакьдына гьӀасаб выъыри.

ГьӀаса Симан хьур дур гъад фарисейды хала а

³⁶ Са фарисейере ГьӀаса гьанкьуудыбыр гьаъас джуды хала сес ваъара.

³⁷ ГьӀаса йиркьыр фарисейды хала, улесдыбыр улед джигиди субкьура. ГьӀаса фарисейды хала ад хабар вишир, миди руръура са гунаабыр кид хьыдылды, гьӀатир ки къаба ана хана.

³⁸ ГьӀасад йыкьӀахда лурзур, решере ми хьыдылды. Нагъвбыр ки сагъӀуре ГьӀасад гъилабаа. Нагъвбыр джуды кьамчӀелиймыхьван темиз хъаъара, ГьӀасад гъилабас темени-теверзахӀ гьаъара, гьӀатир гъӀывхӀа вьаъара ай ми хьыдынийе.

³⁹ Ми гвалах гьувгуйне, ГьӀаса хала сес вьъыд фарисейере фикир ваъара: «Ми эдеми гьакьды пайгъампар йиъийди, Гьанийс гьацӀасий ми хьыдылды куч риъид».

⁴⁰ Амма ГьӀасара рухьура гьанийде: – Симан, зас вада са кар гьухьус йигара. – Гьихьяъ, МагьӀалим, – рухьура тиние.

⁴¹ – Са эдемияхда ай кьӀвар бырджехъан, са йиъий хьудвеш танга бырджли, са – хьцӀцӀур.

⁴² Амма бырдж хъывыс секкинийдаа руъура адиший, гьадыыла миние гьабишис бырдж багъыш гьаъара. Гьабишиклаа гьа эдеми балана хъыгара гьилнийис йикиси?

⁴³ – Зас гьацӀад, балад бырдж кинийис, – джываб хъывылцӀара фарисейере.

⁴⁴ – Ва дуьзене гьӀасаб гьаъара, – рухьура ГьӀасара. Хьели, ругъур хьыдынийихда, рухьура Симанда: – Вас гьаргварама ми хьыдылды? Зы выды хала йиркьыр а, ва зада гъилабыр сидгъасды хьед выр адиш. Гьание хьуйне джуды нагъвалмыхьван Изды гьилабыр силгъара а, джуды кьамчӀелиймыхьван къуру хъаъара.

⁴⁵ Вадаа Зас са темени гьаъас йиширдиш, гьание Зы йиркьыдыыла хъуъ Изды гъилабас теменибыр гьаъад хьур кьадар адиш.

⁴⁶ Вадаа Изды кьулуу хьӀаред гъӀыйхӀа гьаъас йиширдиш, гьание Изды гъилабас гьӀатирбыр йыхӀыри.

⁴⁷ Гьис иди гьухьуси за вада: гьанийис Зы гьааса хъыгара, джус балад гунаабыр За багъыш гьыъыдыыла. ЦӀамды гунаабыр багъыш гыъынийис цӀамна хъыдгад и. Хьели

⁴⁸ ГьӀасара хьыдынийде рухьура: – Выды гунаабыр багъыш йиъи.

⁴⁹ Мадды мийманаше йикӀиклаана фикир ваъара: «Гьа выши, гьание гунаабыр багъыш гьаъас?»

⁵⁰ Амма ГьӀасара рухьура хьыдынийде: – Вас выды инаамишваӀликлаа куьмег а. Хъырырых салам гъана.