Лукара йибкьыд Шадды Хабар 6 - Лукаады Шадды Хабар

«Кишды йыгъад ки иесси Илсанашды Дух йиъи»

¹ Сада кишды йыгъа ГьӀаса хуйяа хьуъ йиъина ай. Гьанийды мутагьӀлимеше гытӀбыр луулкьара, хыле ыйхӀаӀре, кьирид сукбыр улере ай.

² Фарисейеше рухьура: – ВаӀ шиви гьаъад? Кишды йыгъа гьааса гьаъас ихтияр ад диш!

³ – ВаӀ кьыле гьыъыд дишме, Давыд-пайгъампарара, шыв гьыъырди, джуу на джуды илсанашыы гаӀш йибкьыйне? – джываб хъывылцӀара ГьӀасара. –

⁴ Гьа Йинчид Хала йыхьыр, гъарсыд хьыв лаӀшур, джу ки луьъури, джуды илсанашис ки кывыри, амма гьа хьыв дибирешыыла гъайри гьалысна улес ихтияр ад диш. –

⁵ Хьели ГьӀасара рухьура: Кишды йыгъад ки иесси Илсанашды Дух йиъи.

⁶ Мирджед Кишды йыгъа ГьӀасара синагогади йыхьыр, илсанар хӀар даъара ай. Ай гьади са гьӀарчед хыл къуру йишир ад эдеми.

⁷ Диндид магьӀалимер не фарисейер макъыет диъий, ГьӀасара гьа кишды йыгъа хъаъарамыхь хьур, хьели гьа нагьакь гьаъас йигара.

⁸ Амма ГьӀасас гьацӀарай гьабишды фикирбыр, гьадыыла хыл къуру йишир ад эдемиеде рухьура:

⁹ – Лаъ луза, йыкьа мидиъ йыкьӀаӀ. За хулкара ваӀдаа, – сулкара тимбишихда ГьӀаса, – шыв гьаъас ихтияр а кишды йыгъа: йыхаъан име, – писвалды? Илсанас йикьис куьмег гьаъасиме, ешемиш йикис?

¹⁰ Сиенебишихда гакъыр, ГьӀасара рухьура эдемиеде: – Хьуъ гьаъ хыл!

¹¹ Тиние гьааса гьаъара – хыл ки хъӀугъӀуре. ГьӀасад душманаше хьуйне, хъӀал либкьыр, фикир ваъара, шыв гьаъасди ГьӀасак.

ГьӀасара кеетӀид цӀыкьӀваӀр шагырт

¹² Сада гьа йыгъырма ГьӀаса руъура банаа дугьӀабыр гьаъас. Вышед-йокшир Миние Йинчис дугьӀабыр гьаъара.

¹³ ЙаӀкв йишийне, сес ваъара Миние джуды мутагьӀлимешихда, хьели кеэделъэре гьабишиклаа цӀыкьӀвар, гьабишыы «шагыртар» хьур дур лирхьере.

¹⁴ Гьабыр диъий: Симан, Гьание «Петр» дур лихьир ад, гьанийды шу Андрей, Якьуб, Янан, Филипп, Варфоломей,

¹⁵ Матфей, Фома, Якьуб, Алфейды дух, Симан, Зелот хьур лакьаб гъад,

¹⁶ Джавыд, Якьубды дух, са ки Джавыд Искариот, Гьа хьели масак выд.

¹⁷ Гьабишихьван саъ хъиркьыр, ГьӀаса дуьзенаа лубзура, джуды мутагьӀлимешды кӀабал гид, са ки сиене Иудеядаады, Иерусалимдаады, дейрагьад къирхыы гъад шегьермаа Тираа на Сидондаа йидкьыд гьӀараасат гид джигиди.

¹⁸ Гьабыр сиене Гьанийхда хъадацус на эзримыс даваа ваъас йидкьыр адбыр диъий. ШийтӀамашде хабыр ки хъӀудирей,

¹⁹ гьадыыла сиенебыр ГьӀасак кедкьас чалыш диъий, гьис хьуйне Гьанийклаа каӀаӀбчӀурей сиенебишис даваа ваъад яхӀ.

ЙахъӀ на ишел

²⁰ ГьӀаса мутагьӀлимешихда гакъара, гьалгара кагъӀуре: – Шад диш, касибер! Аллагьад ПагьӀчаалыгъ выхьды виъи.

²¹ Гьамыъ гаӀше диъидбыр шад диш! Йинчире ваӀ тух даъаси. Гьамыъ дешедбыр шад диш! – ВаӀ яхъӀ гьаъаси.

²² Шад диш, ваӀ илсанашис кӀваӀчӀе диъиди, йидиргади, хатир адгаъади, выхьды дур тӀалхъаъади – йидж ки сиене Илсанашды Дух бадаана.

²³ Гьа йыгъа шад диш, шадваӀлире эли-аа сете! ВаӀ хӀалире эккене шад даъаси! Гьа илсанашды дидабар ки пайгъампарашихьван гьааса аӀчӀуд и.

²⁴ Амма пашмал диш, девлетлиер! ВаӀ тух гемаа шад дишир а.

²⁵ Гьамыъ тухдыбыр пашмал диш! ВаӀ гаӀш беъэси. Гьамыъ яхъӀ гьаъадбыр пашмал диш! ВаӀ дешере дыкьыркьаси.

²⁶ Илсанаше ваӀ дирзеди пашмал диш: гьааса дирзерей нагьакьды-пайгъампарар гьа илсанашды дидабаше.

Душман ки хъыгыр йыгара

²⁷ Амма ваӀде, захда хьадабцубишде, рухьура За: выхьды душманар хъыдгара диш, ваӀ кӀваӀчӀдыбишис йыхвалды ваъ,

²⁸ вахӀде къаргъышбыр гьаъабишихда алхышбыр гьаъ, выхьды хатир адгаъабишихъаъ дугьӀабыр гьаъ.

²⁹ Хьесымад са сур йыхӀыдбишихда ти сур хьуъ гьаъ, гьалга чухуй эгъелъэре анахъун, гьанийс выды ухун ки эгъепӀес куьмег гьаъ.

³⁰ Вадаа ягъӀыдухъундыбишис ви, Гьалга вадаа хӀаашухьна, – хъӀымыягъӀ.

³¹ ВаӀс шыв илсанаше ваӀ бадаана гьыъыр йигаарди, гьа ваӀ илсанашис гьаъ.

³² ВаӀ хъыдгабыр ваӀс ки хъыдганахъун, гьа выхьды гьунар диш. Гунаабыр кибишис ки хъыдгара джвер хъыдгабыр.

³³ ВаӀ куьмег са ваӀс куьмег гьаъадбишис гьаъанахъун, Гьили а выхьды гьунар? Гунаабыр кибише гьааса гьаъара.

³⁴ Нагагь ваӀ бырдж вылцӀанахъун са хъывыс йикиснийде, Выхьды гьунар гьили а? Гунаабыр кибише гунаабыр кибишде ки бырдж вылцӀара, хьели лаӀхъӀашус хьур.

³⁵ ВаӀ гьааса маъ! Выхьды душманар хъыдгара диш, куьмегбыр гьаъ, бырджбыр вияъ, гьидыына умуд гъадишне. Хьели ва хӀалире шад даъаси; ваӀ Йинчид духре дикиси, Аллагь писдыбишихда на хатир джацӀабишихда ки йикӀе рагьӀим ад и.

³⁶ ВаӀ ки, выхьды Дид кал, рагьӀим адбыр диш.

«Гьалды-га гьакь гьамабутӀ»

³⁷ Гьалды-га гьакь гьамабутӀ – выхьды ки гьатӀусдиш. Выш-га нагьакь маъ – ваӀ ки нагьакь даъасдиш. Хыл луьвуш – ваӀала ки хыл луьвшуси.

³⁸ Вияъ – ваӀс ки выси, гуг гъад кьадар выси: субда выъыр, аӀшур, уула ки лаъ либхьуд кьадар выхьды чухуед этеге ивхьиси. Шууды кьадарахьван ваӀ рацура ади, ваӀс ки гьааса гьацуси.

³⁹ ГьӀасара гьабишис мисед ихтилат гьаъара; БыркьӀынийдаа быркьӀынийды хьура гаӀчӀус йикисиме? КьӀваӀрси гьабыр хьвара идхьусдишме?

⁴⁰ МутагьӀлим магьӀалимехъаъ лаь руъуд диш. Кьыле выъын лаабтӀудка, гьанийдаа магьӀалимехьван сакал йикис и руъуд.

⁴¹ Бес гьис ва выды шуд уле ад чӀумлахда гакъара, Выдыди ад дал гьуджувгур?

⁴² Шууна вадаа выды шуда гьухьус йичӀере: «Гьай шу, йыкьа за выды уле ад чӀумул эхъетӀеси», выдыди ад дал гьуджувгади? Десмалчи! Суьхьде выхьды уле ад дал гъаъ эхъепӀе – хьели гьагуси, шууна шуд уле ад чӀумул гъаъ эхъетӀесди.

⁴³ Йыхды хукара писды емишбыр гыргадиш.

«Емишмыыла хук вацӀара»

⁴⁴ Емишмыыла хук вацӀара! Зазалмыд кулаала инджир сепӀес руъудиш, рукьӀуу уу тӀымлад къиркъ руъудиш.

⁴⁵ Йыхды эдемиере йыхвалды эгъвелъэре джуды йикӀе ад йыхваӀлид лакьаа, Писдыние писваӀлид лакьаа писвалды эгъвелъэре. Илсанашды ггаӀляа гъаъ руъуд джуды йикӀе адбыйды дишме?

Халбыр гьаъад кьӀвар эдеми

⁴⁶ Гьис ваӀ Захда «Илагьи, Илагьи» рухьура, Амма За гьаъ хьуд гьаъаардиш?

⁴⁷ Захда йиркьыдбыйды,

⁴⁸ Захда хъабцудбыйды, Гьалыхьван хилхьеэрди гьацӀарама? Гьа хихьис йикиси эдемиехьван, гьал, халбыр луза гьаъади, гьабтӀур ади деринды къандах, духлад хьеб сивир ад. Вуруъура нацӀура юх, дели вуруъура нацӀур, хъивилхьвара ми халыхда, амма гьа лукаъас руъурдиш, гьис хьуйне, гьа бытӀраана луза гьыъыр а.

⁴⁹ Амма изды чӀилмыд ун ана, гьаммыхда хьаджабцудбыйды, ара хихьис йикиси эдемиехьван, къандах джабтӀур, джиляа лаъ хал силхьере каӀчӀунийхьван. Хъивилхьвара гьадыхда нацӀур, Гьа ки гьассагьӀат лукури. Гьадиклаа гелгад харабыр и.