Лукара йибкьыд Шадды Хабар 5 - Лукаады Шадды Хабар

ГьӀасас джус хаӀаӀр даъасды мутагьӀлимер адыргара

¹ Сада ГьӀаса Геннисаретдид уьреде лузур ай илсанашды йыкьӀа ана, джуула тиниъ Аллагьара рухьура ад чӀел илсанашыы ливкьа ваъара.

² ГьӀасас кьӀваб геми къирхыда лузур гьабгура. Балугъмар халкьабише, гемимаа гъаъ йидкьыр, чилбыр силгъара ай.

³ Сабыйды гемиди аӀчӀур (гьа Симанды геми виъий), ГьӀасара гьа цӀам къирхыдаа хырыда кал йивигас вылцӀара. Джу араа гъаъ эдемиер хӀар даъара каӀбчӀура.

⁴ Бегьем йишир, рухьура Симанда: – Йивига геми хырыда кал. Кияъ чилбыр.

⁵ – МагьӀалим, – рухьура Симана, – е вышед йаӀквшир аа сыджыкьӀыр киере ай чилбыр, амма шешин агырдиш. Йидж Ва рухьунахъун, маа киеси.

⁶ Гьааса гьаъара гьабише – хьели халкьара чилбыр тикетке йикисдухъунды балугъмар.

⁷ Мибише ти гемидыы гъад юлдашешихда хылабыр лийир, тимбыр сес ваьара куьмгуьс. Тимбыр йидкьыр, гьабише кьӀваӀбси геми балгъура гьааса ацӀаъара, тимбыр араа саъ китӀесды кал руъумаа.

⁸ Гьа кар гьагуйне, Симан ГьӀасад улихьде кьвакьымыы сибхьура, рухьура: – Джан Иесси! Изды бейдаа тиниъ йиш! Зак гунаабыр кид и!

^9-10 Симаныс ки, джухьван гибишис ки – гьабишик Зеведийды духре Якьуб на Янан ки кий – гичӀ йывхӀыр ай мисед балгъуд гъӀырч гьувгуйне. Амма ГьӀасара рухьура Симанда: – ГичӀ мываъ! Мидыыла хъуъ ва илсанар ягъмиш даъаси.

¹¹ Геми хьидиклаа гъаъ кехъеэпӀир, гьабыр сиене ГьӀасахда хъуна дыхьыри, Гьанийды мутагьӀлимерне.

ГьӀаса на джузанды

¹² Сада ГьӀаса ай са шегьерди. Джузан йишир, сиене джан йыхӀынмыра ацӀыд са эдеми йиркьыри. ГьӀаса гьагуйне, гьа Минийды улихьде кьвакьымыы сирхьур, рухьура: – Гьай джан Иесси! Вас йигара йишихьна, Вадаа зас даваа ваъас йикиси! Вадаа зас са чараа!

¹³ Хыл хьуъ гьыъыр, ГьӀаса кийкьара минийк, рухьура: – Зас йигара! Темиз хъиш!

¹⁴ Гьааса гьухьур мадана йыхӀымбыр саъ сихъидхьури тинийыыла. ГьӀасара гьанийде «гьалысна ихтилат маъ» рухьура йишидиклаа: – Рых дибиред бегеде. Гьа вахда гакъыхь. Хьели Мыса-пайгъампарара гьухьуд садакьа вияъ вы хъишидыхъаъ, йидж ки гьа сиенебишис гьагвасна.

¹⁵ Амма ГьӀасаклаады ихтилатбыр баладире бала руъурай, халкь кӀабал кӀабална вуруъурай Минийихда хъавацус на джухьды ядлымыс даваа ваъас.

¹⁶ ГьӀаса Выдж кид-кине текды джигима йыхьыр, гьади дугьӀабыр кьыле гьаъарай.

ГьӀасахда йедед эдеми хылаала аъ йихире

¹⁷ Сада, ГьӀасара хӀар даъара ади, гьанийихда хъадабцудбишик кий фарисейер не Диндид магьӀалимер, Галилеядид не, Иудеядид не Иерусалимдид сиене мукъӀмаады. Гьанийхьван ай едебыр хъадаъади магьӀлим вуруъуд Аллагьад кьуувет.

¹⁸ Кут-кьутӀ йишир ад са эдеми хана дуруъура Минийхда илсанар. Мибыр чалыш дуруъура аъ хала йыгыр, гьа ГьӀасад улихьде сихьис.

¹⁹ Амма илсанашды арыдаа хьуъ ГьӀасад халыхда аӀгъӀаӀчӀус джишир, мибише эзерли лаъ къавыы леръир, кӀараметӀ ачых гьыъыр, къаваа саъ ГьӀасад гъилабырмыда силгара кьулаа гъана.

²⁰ ГьӀасас мибишды инаамишвалды гьувгуйне, рухьура Гьание эзерлиеде: – Вак кид гунаабыр вас багъыш гьаъара.

²¹ Диндид магьӀалимеше не фарисейеше йикӀиклаана фикир ваъара: «Ене выдж вышди, гьа чӀелбыр гьухьур, Йинчыы гьӀаси йикис? Гунаабыр Йинчыыла гъайри гьалдаа и багъыш гьаъас руъуд?»

²² ГьӀасара, гьабише ваъад фикирдиклаа хабар ана, рухьура гьабишде:

²³ – Гьис вахӀде гьаасад фикирбыр а? Шыв хьус рагьӀат и: «Гунаабыр багъыш гьаъара» име, «Луза рых?»

²⁴ МиссагьӀат ваӀс гьагуси, илсанашды Духарыхда ад кьуувет гунаабыр багъыш гьаъас руъуд накьудыы. – За рухьура вада, – сулкара Гьа кут-кьутӀ йишинийхда, – лаъ луза, лехъеш вы гъад кьул, хъирхьа хала!

²⁵ Сиенебишис гьабгура-гьабгура ти гьаади мадана лухъузур, лаӀхъӀаӀшур кьул ки, Йинчихьде шукур ваъара хала сухъулкара.

²⁶ Сиенебыр мат дишир гедылгара. ГичӀ йывхӀыр, Йинчихьде шукур ваъара, рухьура гьабише: – Гъиигъа ес гьӀаджайиб йишири.

ГьӀасара Левийехда джухьван сес ваъара

²⁷ ГьӀаса гьадыыла хъуъ хъӀаархӀыри. Гьанийс «Левий» хьур налуг сытӀа гьаъад эдеми гьагури, джуды йера сукьур ад, ГьӀасара рухьура минийде: – Захда хъуна йыкьа!

²⁸ Ти ки, сиене хьуъ хаагъур, руъура Минийхда хъуна.

²⁹ Левийе, джуды хала илсанар сес вьъыр, эккед люъун-рагъынбыр гьаъара ГьӀаса бадаана. Мийманашик кий балад кире сытӀа гьаъад на мадды илсанар.

³⁰ Фарисейеше не Диндид магьӀалимеше рухьурай, хъӀаӀл беъэре, Гьанийды мутагьӀлимешде: – Гьис ваӀ кире сытӀа гьаъабишихьван на мадды лак-лукахьван са устӀулахда сыкьӀыр а?

³¹ – Сагъдыбишис диш джерахӀ йигад, едебишис и, – джываб хъывылцӀара ГьӀасара. –

³² Зы Йинчыы уджагълиер суьдке даъас йиркьыр ад диш, гунаа кибыр суьдке даъас хьур йиъи.

Сив харкьадикляады ихтилат

³³ Гьа гедеэне тимбише рухьура Гьанийде: – ЯхӀйе-пайгъампарад мутагьӀлимер кид-кине сив халкьад на дугьӀабыр гьаъадбыр диъи, фарисейешдыбыр ки, са выдыбыр диъи улере не рагъара ад!

³⁴ Амма ГьӀасара рухьура гьабишде: – ВаӀдаа даватак язна киди йыкьамаъ мийманашде сив хакьас выс йикисиме?

³⁵ Амма йыкьаси йыгъ, ваӀдаа язна хӀаӀаӀшур ад, гьа гедеэне, гьа йыгъырма, сив ки хакьаси.

³⁶ ГьӀасара гьабишис мисед ихтилат гьаъара: – ЦӀинды валгыклаа зул куувулкьадиш, «йисдыдис кӀукӀал ваъас» хьур, дишди цӀинды ки чӀир йикиси, йисдыдис ки цӀинды парчидиклаады кӀукӀал кивикасдиш.

³⁷ ЦӀинды чахыр аъадиш йисды хирчиди, дишди сур гьаъаси цӀинды чахырара йисды хирче – чахыр ки саъ саӀчӀуси, хирче ки сур йикиси.

³⁸ ЦӀинды чахыр цӀинды хирчиди ыъыхь!

³⁹ Йисды чахыр рагъыдбишиклаа гьалысна цӀинды чахыр йигара йикисдиш, гьание рухьура: «Йисды йыха и».