Лукара йибкьыд Шадды Хабар 4 - Лукаады Шадды Хабар

ГьӀаса на Иблис

¹ Илагьиед РухӀ ад ГьӀаса хъӀугъӀуре Иордандыыла. Хьели РухӀдире гыргара къума,

² гьади йогъцӀурды йыгъа Иблисере амзырбыр гьаъара Гьанийды. Гьа сиене йыгъырма ГьӀасара шешин луьъур адиший, эхир гаӀше йишири.

³ Иблисере рухьура Минийде: – Нагагь Вы Йинчид Дух йиъинехъун, гьихьяъ ми духлада, джукляа хьыв йиш хьур.

⁴ – «Са хьываа эдеми ешемиш йишир йигаардиш», рухьура Диндид Дахьвдарара, – джываб хъывылцӀара ГьӀасара.

⁵ Хьели Иблисере уула саъ садана гьагва гьаъара Гьанийс сиене дуьнйадид пагьӀчаалыгъбыр. –

⁶ За гьеми сиъин пагьӀчаалыгъбыр, хазнабыр ки хъуна, вас выси, – рухьура Гьанийде иблисере. –

⁷ Сиене гьабыр зас выр адбыр йиъи, задаа зас йигганийс выс йикиси. Икрам ви зас – сиене гьабыр Выдыбыр йиъи.

⁸ – Диндид Дахьвдарара рухьура, – джываб хъывылцӀара ГьӀасара: «Са выды Йинчис икрам ви, Са Гьанийды дур хакь».

⁹ Гьа гедеэне иблисере гыргара Гьа Иерусалимди, лабгъура Йинчид Халды эрахьваа, хьели рухьура:

¹⁰ – Нагагь Вы Йинчид Дух йиъинехъун, лийич мидаа саъ. Диндид Дахьвдарак кид шиви, Йинчире «Джуды малаикмашде „Вы ухӀ“ хьур ад и»,

¹¹ са ки «гьаммыра лаъ хылабырмыы лаӀхъӀаӀшуси Вы, Выды хьеб духлак кидживкьын бадаана».

¹² – Гьухьур а: «Амзыр маъ Аллагьад, выды Йинчид», – джываб хъывылцӀара ГьӀасара.

¹³ Иблисере, маа шыв хьусди джацӀыр, сагьӀалды гедеэне салтара Гьа.

¹⁴ Илагьиед РухӀдид яхӀ йишир, хъӀугъӀуре ГьӀаса Галилеяди. Аа-уу ивилхьвара ГьӀасад суфат.

¹⁵ Гьание хӀар даъара гьабишды синагогама, сиенебише ми йирзере.

Назарет-шегьердире ГьӀасад ихтилатбыр кьабыл гьыъырдиш

¹⁶ ГьӀаса хьӀугъӀуре Назаретди (гьа шегьерди Гьа экке йишид и). Кишды йыгъа, мыс-га кал, руъура синагогади.

¹⁷ Диндид Дахьвдар кьыле гьаъас хьур, Гьа лаъ лубзура. ГьӀасада вылцӀара Исайя-пайгъампарды кихьинбыр. Гъаъ лийир, гьабгура ГьӀасара мисед чӀелбыр кид джыгаа:

¹⁸ «Илагьиед РухӀ гъа Заа Зы Йинчире гьӀатир йывхӀыр, гьӀазыр гьыъыр а, касибешис ваъас Шадды Хабар, Гьание сигыд и Зы есирешис азадваӀлид хабар выс, быркьӀыдбишис йаӀкв гьахъагусдидиклаа хабар выс, Гьание сигыд и Зы лыкӀаӀр азад хъадаъас,

¹⁹ Аллагьад рагьӀимдид вахт ливкьыр ад хабар ваъас».

²⁰ Гъигъе хъыъыр, ГьӀасара хъывыри кихьинбыр дибиреде, хьели аа сукьури. Синагогади адухъундыбишды улабыр ГьӀасахда сукур ай.

²¹ ГьӀасара рухьура: – Гъиигъа ваӀс «салатӀ йикиси» хьур адбыр салатӀ йишир а.

²² Сиенебыр гьа чӀилмыы рази дишир, гьӀаламат гьаъара минийды гьакьаллы чӀилмыы. «Бес Гьа Йисухьды дух дишме?» – хулкарай гьабише.

²³ – ВаӀ гьухьуси ки гьамыъ Зада ихтилат: «ДжерахӀ, ва вы хъаъ», – рухьура мибишде ГьӀасара. – «Ес Капернаум-шегьерди йишидиклаа хабар виъи» хьур, «гьааса выды хыдыы ки гьаъ» хьуси.

²⁴ Дуьзене ваӀде рухьура: хыдис-магьӀлидис къадри вишид пайгъампар адиш, – рухьура ГьӀасара. –

²⁵ Гьадыыла саваайинди, Ильяс-пайгъампарад вахтинди бала хиндадыймар ай Израилди, хьибды сыда на сура гьугъалбыр джишийне не сиене дуьнйаады гаӀш либхьуйне дишир ад.

²⁶ Амма Ильяс-пайгъампар секки гьа хиндадыйяхда сигыр ад диший. – Сигыр ай гьа са хиндадыйхда Сидондид бейде хад Сарепта-шегьерди.

²⁷ Джузан дишидбыр ки бала ай Израилди Елисей-пайгъампарад вахтинди, амма даваа гьабишиклаа са Шамдаады Нааманыс выъыр ай.

²⁸ Ми чӀилмыд ун йишийне, синагогади ад эдемиер аджыгъламиш дишири.

²⁹ Ледчир, хъыджылкаӀре мибише ГьӀаса Назарет-шегьер гъад банад кӀеъэлыы, кьуляа саъ хаагъуси хьур ми.

³⁰ ГьӀаса, гьабишдаа хихъиирхьур, хъӀугъӀуре.

ГьӀасара шийтӀамашде хад хъыъыри

³¹ ГьӀаса руъура Капернаумди, Галилеяди ад шегьерди. Кишды йыгъа Гьание хӀаӀаӀр даъара илсанар.

³² Сиенебишис Гьание хӀаӀаӀр даъад услаа гьӀаламат руъурай – гьаасад яхӀ ай Гьанийды чӀилихда.

³³ Ай гьа синагогади са эдеми, шийтӀандире йыхӀыр ад, гьание гъигъене лал ваъара:

³⁴ – Гьей, вас еклаа шиви йигад, Назаретдаады ГьӀаса? Вас е белима эдес йигара ад име? Зас гьацӀара, Вы вышди. Вы Йинчид Уджагъли йиъи!

³⁵ Амма ГьӀасара мисе рухьура: – Лал виш! Гъаъ игъивиъ гьанийдыы джандаа! Синагогадид йыкьӀаӀ лука гьыъыр ти эдеми, иблис гьанийды джандаа гъаъ ихъвилчере, са хата ки джывыр.

³⁶ Сиъинбыр мат дишир гедылгара – Ми шиви? Гьанийхда гьаасад гудж не яхӀ а, иблисеше ки Гьание гьаъ хьуд гьаъара, – рухьура илсанаше са-сынийде.

³⁷ Гьанийклаады ихтилатбыр аа-уу ибхьура.

³⁸ Синагогадаа руъура Гьа Симанды хала. Симанды гаӀнинис цӀай гьаъара едере ай. Гьанийдаа куьмег ягъӀаре халдыбише.

³⁹ Ми хьыдыныйды уула хьуъ йишир, ГьӀасара ядал секин хъаъара, хьели ядал сухъулгара. ГаӀнин лухъурзур лаъ, улихьде хьыв гирхьере каӀрубчӀура.

⁴⁰ Виригъ хӀуувгъуд геде, хӀаӀдиес, гьӀар джура ядал бейдебишик кидухъундыбыр едебыр хана дуруъура ГьӀасахда. ГьӀар еденийды кьулуу хыл гъӀыйхӀаӀ гьыъыр, Гьание хъадаъарай.

⁴¹ Баладбишды джандаа иблисмар игъибхьурай, лалбыр гьаъара: «Вы Йинчид Дух и!» Амма ГьӀасара гьабыр гиихье хъаъарай, гьа ихтилат гьухьус джывыр: гьаммыс гьацӀарай Гьа Аллагьад Мусуд йиъид.

⁴² ЙаӀкв йишийне, ГьӀаса шегьердаа гъаъ ахъӀагъӀуре, са кеэйид джигиди сулкара. Илсанашды гьӀараасатбыр сулкара Ми ахтармиш гьаъас. Ахъыгыйне, мибыр чалыш дуруъура сихъджигас.

⁴³ Амма Миние рухьура: – Мадды шегьерма ки За Аллагьад ПагьӀчаалыгъаклаа хабар вихир йигара. Гьадид бадаана сигыр ад и Зы.

⁴⁴ Гьааса гьухьур, Гьа, хӀар даъара Иудеяди синагогамаа синагогама гыйгъӀаӀре.