Лукара йибкьыд Шадды Хабар 3 - Лукаады Шадды Хабар

ЯхӀйе-пайгъампарад гвалах

¹ ПагьӀчаагьашды ПагьӀчаа Тиберий кьухьды йиъид цӀухьудхьусды сыда Иудеядид кьухьды Понтий Пылат йиъид гедеэне, Ирод Галилеядид кьухьды йиъид гедеэне, гьанийды шу Филипп – Итуреядид не Трахонитидадид кӀайсар йиъид гедеэне, Лисаний – Абиленадид кӀайсар йиъид гедеэне,

² сахьусды дибирер Аннад на Кайафды вахтинди, Аллагьара къума Захарийды дух ЯхӀйе-пайгъампарахда ун гьыъыри.

³ Ти ки Иордандид аа-уу сиъин чӀирбыр йиъидухъунды гъургъара каӀчӀури, илсан Йинчыы инаамиш гьаъара, гьадид лышан бадаана хьед гъӀыйхӀаӀс вылцӀара, гунаабыр темиз хъишин бадаана.

⁴ Исайе-пайгъампарад китабак мисе кихьир ани йиъи: «Къума ад гыдзырад сес виъи: „Илагьиес рахъӀ ачых ваъ, дуьздыбыр гьаъ гьанийды джыгъырбыр:

⁵ дерема накьв ыхъывӀыхӀ, дуьз хьыъыхь кьӀырыкӀбыр, накьудид хъӀваӀрбыр дуьзды рахъӀ кал хьыъыхь –

⁶ гьа гедеэне гьагваси ешемиш дуруъудухъундыбишис Йинчид куьмег“».

⁷ ЯхӀйе-пайгъампарара хьед саъас хьур джухда кӀабал-кӀабална дуруъуд илсанашде рухьурай: – Ггарашды улмат! Гьал и ваӀде гьухьуд, ваӀ гиидхьуси хьур дивындиклаа?

⁸ ВаӀ йикӀидаана инаамиш дишир ад выхьды гвалахмыхьван гьагваъ! Гьухьусды камаъ йикӀиклаана: «Ихьды дид Ибрайим-пайгъампар йиъи» хьур! За рухьура ваӀде: Йинчире гьеми къатылмыклаа Ибрайим-пайгъампарас хынимер даъаси.

⁹ Балта, гьӀазыр гьыъыр, гине а хукумыд бегеде: йыхды емиш джывылцӀад хук кеэвир цӀиыы хуувулгъад и.

¹⁰ – Бес шыв гьаъаси е? – хулкарай гьанийдаа элдире.

¹¹ – КьӀваӀб ухун ание са адишнийс вийихь, – рухьурай ЯхӀйе-пайгъампарара. – Улесды ание ки гьааса гьыъыхь.

¹² Хьед гъӀыйхӀаӀс йидкьыри кире сытӀа гьаъабыр ки. Гьабише хулкара гьанийдаа: – МагьӀалим, е шыв гьыъын лазим йиъи?

¹³ – Лазим йиъидыыла балад мыягъӀ, – джываб хъывылцӀара ЯхӀйе-пайгъампарара.

¹⁴ – Е шыв гьыъын лазим йиъи? – хулкара эскереше. – Тараш маъ, хӀаӀмаӀаӀбуш. Дуллухаа рази дишир, гъийкьаъ.

¹⁵ Элдире Мусуд гуьзет гьаъара ай. Сиенебише йикӀиклаана фикир ваъара ай, яраб ЯхӀйе-пайгъампар Мусуд йиъимий хьур.

¹⁶ ЯхӀйе-пайгъампарара сиенебишды улихьде рухьура: За ваӀа хьед сыъыри. Амма йиъина а Ти, захъаъ гуджлид. Зы гьанийды шаламад багъ саагъус лейих диш.

¹⁷ Гьанийды хыле бер ха, йыггырыы язуб лувулхас, хьытӀ Гьание гъӀаӀнды хала ягъмиш ваъаси, пылбыр цӀе иеси.

¹⁸ Гьаасад на мадды балад чӀилмыхьван ЯхӀйе-пайгъампарара илсанашды кӀабалбыр хӀаӀаӀр гьаъарай.

¹⁹ Амма тетрарх Ирода, джуды на джуды шуд къари Иродиадад гвалахбыр ашгара гьыъыйне

²⁰ мадды джу гьыъыд бейабырвалдыбыр ЯхӀйе-пайгъампарара хьуъ лийийне, ЯхӀйе-пайгъампар дустахди ийири, ми белаа ки уу кыхъӀывхӀыр.

Илагьиед РухӀ ГьӀасаа руъура

²¹ Сиене халкь хьидик кувчӀудыыла хъуъ, ГьӀасара ки хьед гъӀыйхӀыри. Гьание дугьӀа гьаъад гедеэне, хӀал ачых йишири.

²² Гьанийыы хӀаляа саъ Илагьиед РухӀ сидхьури лирхьвадид дуьнди ана. ХӀаляа ки сесед ун йишири: «Вы изды гирамигды Дух йиъи, Вы Изды йикӀид панаа виъи».

ГьӀасад атабабыер

²³ ГьӀасара джуды къуллух ваъара каӀчӀуйне, Гьанийды хьибцӀыр сен руъура ай. Гьа йиъий, илсанашис гьагуд кал, Йисухьды дух, ти – Элид дух. Мадад Гьанийды атабабыер:

²⁴ МатӀатӀ, Леви, Малки, Яннай, Йисухь,

²⁵ Маттитья, Амыц, Наум, Хесли, Нагъай,

²⁶ МагьӀатӀ, Маттитья, Шимьи, Иосех, Иода,

²⁷ Иоханан, Реса, Зерубавель, Шеальтиэль, Нери.

²⁸ Малки, Адди, Косам, Эльмадам, Эр,

²⁹ Иошуа, Элиезер, Иорим, МатӀатӀ, Леви,

³⁰ Симан, Иуда, Йисухь, Ионам, Эльяким,

³¹ Малья, Минна, Маттата, Натан, Давыд,

³² Ишай, Овед, Боаз, Салман, Нахшон,

³³ Амминадав, Админ, Арни, Хецрон, Перец, Иуда,

³⁴ Якьуб, Исакь, Ибрайим, Терах, Нахор,

³⁵ Серуг, Реу, Пелег, Эвер, Шалах,

³⁶ Кеинан. Арпахшад, Сим, НухӀ, Ламех,

³⁷ Метушелах, Энох, Иеред, Махалалэль, Кеинан,

³⁸ Энош, Сет, Адам – Йиниш диъий.