Лукара йибкьыд Шадды Хабар 24 - Лукаады Шадды Хабар

Сагъды сагъдыбишик ки

¹ ГьӀафтидид сахьусды йыгъа, гьӀатирбыр на хӀаредбыр ки хана, йаӀкв кьатӀ йишир мадана, гьабыр дуруъура сырыы.

² Амма гьабишде сырыд ригихда хъивир ад духул хьуъ выъыр ана ывылгара.

³ Ара дыхьыйне, ГьӀасад майит ахъылгаардиш.

⁴ Хьыле суьтӀуьр гедгыр мадана, гьабишды уликлаа лаъ кьӀвар нур кеэреэдхьвад валыг гъад эдеми луьдуьлзере.

⁵ Хьылеше, гичӀ йывхӀыр, улабыр саъ гьыъыйне, тимбише рухьура:

⁶ – ВаӀ сагъдыбыйды дыркьыдбишды арыдаа ахтармиш гьидис гьаъад йиъи? Гьа миди адиш. Гьа сыраа лухъузур а. ЙикӀыы хъыгаъ, шыв хьурди Гьание ваӀде гьала Галилеяди марана.

⁷ «Илсанашды Дух гунаабыр кидбишды хыле выси, дар-агъаджаа реъэси, амма хьибыдхьусды йыгъа Гьа сыраа лухъузаси», хьур, гьухьур а.

⁸ Тимбишис ки йикӀыы хъӀугъӀуре Гьанийды чӀелбыр.

⁹ Сырыыла хъидкьыр, гьабише гьа ихтилат гьаъара цӀысыннийис не мадды сиенебишис.

¹⁰ Гьа хьыле диъий Мария Магдалина, Иоанна на Якьубды нин Мария. Мадды гьабишихьван гид хьылеше ки шагырташде гьааса рухьура ай.

¹¹ Амма гьабишды чӀелбыр шагырташис мыхьчаӀбыр калагури, хьылешыы инаамиш диширдиш.

¹² Петр гьади мадана сырыхда яхыри. Аъ гакъыд, гьанийс гьабгура са кафанбыр. ГьӀалаамат йишир, хъӀугъӀуре гьа хала.

Эммаусдид рыкъӀа

¹³ Гьа йыгъа мутагьӀлимешиклаа кьӀвар Иерусалимдид бегеде хад Эммаус хьур мукъӀа диъина ай,

¹⁴ йишид гвалахмыклаа далгара.

¹⁵ Гьабишды ихтилатмыд на гьӀаджетмыд арыди ГьӀаса выдж руъура гьабишды бейде. Бегеде йиркьыр, Гьа ки тимбишихьван йирхьара.

¹⁶ Амма тимбишды улабас бавыш йыхӀыд кал йиъий: гьабишис Гьа хъацӀаардиш.

¹⁷ ГьӀаса гьалгара гьабишихьван: – ВаӀ гьидиклаа и рыкъӀаӀ далгара ад?

¹⁸ Тимбыр луьдуьрзере, хьесымбыр ки пашмална, Сабыйние, «Клеопа» хьур, рухьура ГьӀасада: – Сиене Иерусалимдаа са вас име миди ми йыгъырма йишид кардимыклаа хабар адишды?

¹⁹ – Шиви йишид? – хулкара ГьӀасара. – Назарый ГьӀасас вишид гвалах, – рухьура тимбише. – Гьа Йинчид улихьде ки, илсанашды арыди ки кьуувет ад пайгъампар йиъий,

²⁰ амма ихьды сахьусды дибиреше не агъсакъаалаше Гьа йикьис выри: Гьа хачылыы риъири.

²¹ Ес хьуйне, Гьанийдаа Израилдис куьмег йикисды калагур ай. Гьадыхьван ки бегьем диш: гьа гвалах вишир ад хьибыдхьусды йыгъ йиъина ай,

²² ихьды хьылеше ес мадды гьӀалааматад ихтилат гьыъыйне. ЙаӀкв кьатӀ йишийне, дыхьыр а гьабыр сырыы.

²³ Амма майит аджыгыр, хъидкьыр, рухьура, джвершис малаикмар гьагури хьур. Гьаммыра гьухъури, хьва, «ГьӀаса сагъна мара» хьур.

²⁴ Ихьдыбишиклаа са-садбыр дыхьыйне сырыда, гьагур а хьылеше гьухьуд кал йиъид сиене. Амма выдж гьалысна гьагур адиш.

²⁵ – ВаӀ шудаъ гьакьалдаа сылды илсанар диъи? – рухьура ГьӀасара гьабишде. – Шудаъ четинене инаамиш дуруъурди гьай ваӀ пайгъампараше ваӀде гьухьудыы!

²⁶ Бес Мусудас гьа сиене гьӀазабыр гьагун лазим дишийме, Гьанийды дур идхьун бадаана?

²⁷ Хьели Гьание тимбишис джуклаа Диндид дахьвдарак кид духъунды джыгаабыр ачых гьаъара, Мыса-пайгъампараала каӀчӀур, мадды сиене пайгъампарашыы йыкьамаъ.

²⁸ Гьабыр диъина ад мукъӀуде ледыркьад гедеэне, ГьӀасара джуды рахъӀне хъӀугъӀус йигадбишдыбыр гьыъыри.

²⁹ Амма тимбыр сыдылхӀаӀре Гьанийыы, джвершихьван сукьа хьур: – Сукьа ехьван. Йыгъ лаабтӀура а, гъаъ ки нахӀ и. ГьӀаса хала аӀчӀур, гьабишихьван алгара.

³⁰ Гьабишихьван са устӀулахда сукьур, дугьӀа гьыъыр, кьатӀ выъыр хьыв, вылцӀара тимбишде.

³¹ Хьели тимбишды улабаала бавыш сихъиибхьура – гьабишис хъацӀара ГьӀаса. Амма гьамыъ ГьӀаса уликлаа сухъулгара.

³² Мибише са-сынийде рухьура: – Бес ихьды йикӀ гьулхьара адишийме, Гьа рыкъӀа ехьван гьалгад гедеэне, Диндид дахьвдар хӀаар гьаъара ади?!

³³ Гьабыр гьади мадана луьхъуьздуьр, хъӀудире Иерусалимди. Гьабыр цӀыса шагырт на мадды мутагьӀлимер ад джигиди аӀчӀуйне,

³⁴ тимбише рухьура мибишде: – Илагьи дугъридан лухъузур а сыраа. Гьа Симаныс гьагури.

³⁵ Хьели мибише ихтилат гьаъара, рыкъӀа шыв йиширди, шууна джвершис Гьа хъацӀырди Гьание хьыв кьатӀ ваъад джигиди.

ГьӀаса руъура джуды мытагьӀлимешихда

³⁶ Гьабише ихтилат гьаъара мадана, ГьӀаса выдж лубзура гьабишды арыдаа лаъ, мисе рухьура: – Ассаламу гьӀалейкум!

³⁷ ГичӀ вырыхӀыре мибишис, гьӀаламат гьабгуд калагур.

³⁸ – ВаӀс гичӀере гьидис руъуд и? – хулкара ГьӀасара гьабишдаа. – Гьис выхьды йикӀбыр шаклы руъура?

³⁹ Гадакъ Изды гъилабахда-хылабахда – ми Зы йиъи. Кийкьаъ хыл Зак, ваӀс гьагуси гьӀаламатахда як-кьырыб адишды, Захда ад.

⁴⁰ Гьааса рухьура, гьагва гьаъара ГьӀасара мибишис хылаб-гъиляб.

⁴¹ Тимбыр шадваӀлире инаамиш джидчӀир, гьӀаламат гьаъара гедылгара. Гьа гедеэне ГьӀасара хулкара гьабишдаа: – ВаӀхӀде миди шыв-га улесды ама?

⁴² Мибише Гьанийс йидже гьыъыр ад балгъуд тике вылцӀара.

⁴³ ГьӀасара лаӀшур, гьабишды улихьде улере.

⁴⁴ Хьели ГьӀасара рухьура гьабишде: – Зы ваӀхьван ад гедеэне За гьухьуд чӀилмыд натыдже гьеми виъи: Мыса-пайгъампарад Къаанундик Заклаа шыв киди, мадды пайгъампараше кихьир адбыр, дугьӀамык кидбыр – сиене кьулуу йыкьасды йиъи.

⁴⁵ ГьӀасара хьели гьабишис Диндид дахьвдарак кидмыхьде гедкьас куьмег гьаъара.

⁴⁶ Гьание рухьура: – Миди мисе ки: Мусудара джус кихьир ад гьӀазабыр летӀин лазим йиъи. Хьибыдхьусды йыгъа Гьа лухъузаси сыраа.

⁴⁷ Гьанийды дуруула гьухьун лазим йиъи сиене халкьмыда – Иерусалимдаа каӀчӀур: «гьӀумир кывырхӀа хъывыъыр, Йинчыы суьхъуьдкуьн лазим йиъи» хьур, Йинчире хыл луьвшун бадаана.

⁴⁸ ВаӀ сиене гьадид шийидер диъи.

⁴⁹ За хьуйне гьамыъ вылцӀара ваӀс Изды Диде выс хьур чӀел выр адбыйды. ВаӀ, хьуйне, шегьерди сыкьӀаӀ таа ки элаады кьуувет йибкьыр, ваӀс гудж вылцӀамаа.

ГьӀаса хӀалмыра йихире

⁵⁰ ГьӀасара гьабыр шегьердаа гъаъ дыгыр, гьабишихьван Вифаниядыы йыкьамаа руъура

⁵¹ Хылабыр лаъ гьыъыр, гьание рухсат вылцӀара мибишис. Рухсат вылцӀара-вылцӀара, Гьа хырыдадире хырыда руъура, хьели лаъ хӀале леръэре каӀбчӀура.

⁵² Мибыр Гьанийды улихьде джилимыс дырыхӀыре.

⁵³ Хьели, шадамерд дишир, гьабыр хъӀудире Иерусалимди. Балад гедеэне Йинчид Хала адылгара, Йинчихьде шукур ваъара.