Лукара йибкьыд Шадды Хабар 23 - Лукаады Шадды Хабар

Пылатды кьатӀлаама

¹ Гьа гедеэне сиене джамагьӀат лувзур, гыргара ГьӀаса Пылатыхда.

² Гьабише Минийыы субут гьаъара кадгъӀуре: – Ес ми эдемиере халкьдик чыкӀ кийтере гьагури, – рухьура гьабише. – Гьание кӀайсарыс кире выс вылцӀаардиш, выдж ки «Мусуд йиъи» рухьура, ПагьӀчаа ене.

³ – Гьааса йишийне, вы – «джавыдашды ПагьӀчаа» йиъиме? – хулкара Гьанийдаа Пылата. – Гьааса ва рухьура а, – джываб вылцӀара ГьӀасара.

⁴ – Задаа минийклаа са тахсир ки алгаардиш, – рухьура Пылата сахьусды дибирешде не илсанашды кӀабалада.

⁵ – Гьание чӀирине хӀаар гьаъара сиене Иудеядид илсан, Галилеядаа каӀчӀури, гьамыъ миди ки йиркьыр а, – рухьура тимбише хъӀахъӀджаачӀур ГьӀасахълаа.

⁶ – Гьа эдеми Галилеяшура йиъиме? – гьадид ун йишийне, хулкара Пылата.

⁷ Гьа Иродды хылихьде гид вилаетдаады йиъид гьацӀыйне, хахъына ГьӀаса сихъдилгара Иродыхда, ти ки гьа йыгъырма Иерусалимди руъура.

⁸ Ирод, ГьӀаса гьагуйне, эккене шад руъура: гьанийс мысъидаа хъуъ йигара ад йиъий ГьӀасахда гакъас. Иродыы балад хабарбыр лийкьыр ай ГьӀасаклаа, гьадыыла тинийис Миние шыв-га гьӀунар гьаъад гедеэне гакъас йигара ай.

⁹ Ирода ГьӀасас балад суалбыр вылцӀара, амма Тиние гьанийс джываб хъывылцӀаардиш.

¹⁰ Сахьусды дибиреше не Диндид магьӀалимеше гьа арыдыы ГьӀаса нагьакь гьаъара гимадай, хъӀахъӀджаачӀур.

¹¹ Ирод ки, джуды эскерер ки хъуна, ГьӀасаклаа иянатбыр гьаъара кадгъӀуре, хьели лыъыр Гьанийыы бытӀрад валыг ки, Пылатыхда джухда сихъилгара.

¹² Гьа йыгъаала хъуъ садаки гъеджлебед Ирод на Пылат хыдиймар дуруъура.

¹³ Пылата, сес выъыр сахьусды дибирер, агъсакъалар, халкь,

¹⁴ рухьура гьабишде: – ВаӀ изды бегеде гьеми эдеми хана йидкьыр а, «гьание халкь чӀирине хӀаар ваъара» хьур, амма зада гьанийклаа са тахсир ки агырдиш, выхьды улихьде суалбыр выйне.

¹⁵ Иродда ки агыр адиш Гьанийклаа тахсир, гьадыыла гьание Гьа яхда хъургъа хъыъыр а. Гьа дар-агъаджаа реъэсды себеб адиш.

^16-17 За Гьанийис кӀар гъихьир, сихъигас выси.

¹⁸ Гьа гедеэне сиенебише, са ггаӀляа кал, лал ваъара: – Гумаъ гьа! Ес Варывый сихъигаъ! (

¹⁹ Гьа «шегьерди ад илсанар лаъ ледири» хьур на эдеми йыхӀыри хьур хакьыр ад эдеми йиъий.)

²⁰ Маа гьалгара гьабишихьван Пылат, ГьӀаса сихъигас йигара.

²¹ Амма тимбишды аӀъ ай: – Дар-агъаджаа реъ Гьа! Дар-агъаджаа реъ!

²² Хьибыдхьусды хылис рухьура гьабишде Пылата: – Йидж шыв писвалды виъи Гьание ваӀс выъыр ад? Зас Гьанийклаа уьлуьмес лейихды са тахсир ки гьабгурдиш. За Гьа етес выр, сихъигаси.

²³ Амма тимбишды хъӀахъӀджаачӀур, лал ай, «ГьӀаса Дар-агъаджаа реъ» хьур, аӀъаӀре Пылатды ун каджагъур.

²⁴ Пылата ки гьабишис выгад гвалах ваъара:

²⁵ гьабише хъӀагъӀаре ад эдеми йыхӀыд не шегьерди илсан лаъ лийидбыйды гъаъ сихъилгара, ГьӀаса джвершис шыв йигаарди гьаъас вылцӀара.

«Медеш захда!»

²⁶ ГьӀаса дар-агъаджаа хад гедеэне, Гьанийды джыбра хач йихис вылцӀара са Кирендаады «Симан» хьур эдемиеде, гьа арыди хуйяа хъиъид.

²⁷ ГьӀасад джыбра са гьӀараасат хъуй, гьади хьыле ки кий, джвер джухьды мыхыр ветере, кьвакь-кьул ветере, ГьӀасахда дешере ад.

²⁸ ГьӀасара, гьабишихда сукур, рухьура: – Медеш Захда, гьай Иерусалимдид хьыле! ВаӀхӀде не выхьды хынимешихда деш!

²⁹ Гьамыъ йиъина а йыгъбыр, мисе гьухьусды: «Шудаъ бахтлыер диъи велед джившидбыр на джуьдхуьдбыр на тӀитӀ кыджывыдбыр!»

³⁰ Гьа гедеэне банымыда гьухьуси: «Яа сыхӀ!» – тӀуьнтӀуьймыда гьухьуси: «Е гидиркӀа даъ!»

³¹ Емиш выгыргад хукас гьааса гьаъад, къурудис шыв гьаъаси?

Хыл лювуш гьабишыыла

³² Гьанийхьван сытӀаъна дар-агъаджаа хай мадды кьӀвар хъачах ки,

³³ гьабыр сиене «ГаӀвгаӀвый» хьур дур гъад джигиди ледкьыйне, дар-агъаджаа риъири гьади ГьӀаса, – хъачахар ки, са – Гьанийды гьӀарчед хылыы, са – гадыхъды.

³⁴ ГьӀасара рухьурай: – Джан дид! Хыл лювуш гьабишыыла, гьабишис джвер шивди гьаъара ад гьацӀара адиш!

³⁵ Лыдж ивир, гьабише ГьӀасад валыг ки джвершис гетӀва гьаъара. Халкь лувзур, гывкъара ай. Агъсакъалаше ки яхъӀбыр гьаъара Гьанийыы, рухьура ай: – Маддыбишис куьмегбыр гьаъарай, гьамыъ джу джус куьмег гьыъыхь мын, нагагь выдж Аллагьара кеэръир ад Мусуд йиъинехъун!

³⁶ Эскереше ки Гьанийклаа иянатбыр гьаъара ай. Бегеде дуруъура, гьабише ГьӀасас чӀырчӀыма хъишид чахыр вылцӀарай,

³⁷ мисе рухьура: – Нагагь Вы джавыдашды ПагьӀчаа йиъинехъун, ва вас куьмег гьаъ!

³⁸ Гьанийды уула гъаъ кихьир ай: «Ми джавыдашды пагьӀчаа йиъи!»

³⁹ Сабыйды хъачахара, Гьанийхьван хачылыы хъийхыр ад, Гьанийхда себыр гьаъара: – Гьаада, Вы гьакьды Мусуд йиъид гедеэне, ес ки вас ки куьмег гьис джаъад?!

⁴⁰ КьӀвархьусды гьа гиихье гьаъас чалыш руъура ай:

⁴¹ – Йишири, вас Йинчыыла гичӀеэрдишме? Вы ки хачылыхда хъудишме?! Амма ес гьааса йыха йиъи, еде ес лейихды йиъи выр ад. Гьание шешин нагьакьды гьыъыр адиш. –

⁴² Хьели гьание ГьӀасада рухьура: – ГьӀаса, Вы ПагьӀчаана хъиркьыйне, зы йикӀыы хъыгаъ!

⁴³ – За вада чӀел вылцӀара, вы гъиигъа мадана Захьван, сытӀаъна, дженнетди йикиси, – джываб вылцӀара ГьӀасара.

⁴⁴ Гъаъ гьанкьууды виъий. Садахьурка виригъ хывкьыри. Сиене дуьнйа мыӀчӀахъа вишири йыгъад сагьӀат хьибдыы йыкьамаъ духъунды.

⁴⁵ Илагьиед хала ад перде кьӀундиъне, чӀирх хьур, сур вишири.

⁴⁶ ГьӀасара гъигъене лал ваъара: – Гьай Дид! Выды хыле вылцӀара Изды рухӀ! – Гьа чӀилихьван ГьӀасад ил киибхьура.

Халкьдисды ух

⁴⁷ Центурионыс гьагуйне, шууды карбыр йиширди, хьесымаала саъ хыл йыгыр, рухьура: – Валлагь, гьеми эдемиек тахсир кидишды кал ий!

⁴⁸ Сиене гьӀараасат, тамашедис ягъмиш вишир ад, шыв йиширди гьагуйне, мыхыр ветере халма хъӀувгъӀуре.

⁴⁹ Сиене ГьӀаса гьацӀад духъундыбыр хырыда луьздуьр, гадкъара ай. Гьабишик Гьанийхьван Галилеядаа йидкьыд хьыле ки кий.

ГьӀаса кирхьере

^50-51 Гьади руъура «Йисухь» хьур эдеми, Иудеядид «Аримафея» хьур шегьердаады. Гьа гъӀыдилды йикӀ ад на гьакь гуьзет гьаъад эдеми йиъий, Аллагьад ПагьӀчаалыгъ мыс вуруъурди гакъара ад. Гьа, выдж ки МеслагьӀатмык кид сабыйды йиъийнехъунки, рази диший МеслагьӀатере гьыъыр адыы.

⁵² Пылатды бегеде йыхьыр, Йисухьа ГьӀасад майит кихьис ихтияр вагъӀаре.

⁵³ СехъетӀир майит, аркӀа гьыъыр кафныма, илхьере Гьа дагьра адхъӀур ад сыра, – гьади гьала вышне кихьир ад диший.

⁵⁴ Улджумад йыгъ йиъий, каӀбчӀура ай кишды йыгъад нахӀ.

⁵⁵ ГьӀасахьван Галилеядаа йидкьыд хьылешис, Йисухьды джыбра хъуна дыхьыр, сиене гьабгура – сыр ки, шууна Гьа кихьирди ки.

⁵⁶ Хъуьдуьргъуьр, халма хъидкьыр, гьабише гьӀатирбыр на бытӀрад ил кид хӀаредбыр гьӀазыр гьаъара. Кишды йыгъа гьабише шешин гьаъаардиш, Къаанунара рухьуд кал.