Лукара йибкьыд Шадды Хабар 22 - Лукаады Шадды Хабар

Иблисед не Иудад меслагьӀат

¹ Калды Гундзмыд байрам бегеде виъий, гьадид дур Пасха йиъий.

² Сахьусды дибирешис не Диндид магьӀалимешис ГьӀасад кьулис ваъас йигара ай, амма илсанашыыла гичӀерей.

³ Гьа гедеэне Иблис увгъӀуре ЦӀыкьӀуннийклаа сынийде «Иуда Искариот» хьур лакьаб гъад.

⁴ Ти йиркьыр сахьусды дибирешихда на Йинчид Халды къаривылашихда, гьабишихьван меслагьӀат гьаъара, шууна джу ГьӀаса хакьас куьмег гьаъасди.

⁵ Тимбыр шад дишир, «шийибыр выс» хьур минийс чӀел вылцӀара.

⁶ Иуда рази йишир, илсанашис хабар дживикисне, Гьа масак высды йыхды мизан гьувургара.

ГьӀаса на шагыртар цухьрудыхда сыдыбкьӀыре

⁷ Руъура Калды Гундзмыд байрамад йыгъ, гьа йыгъа садакьадис гъывырсыр гел вуругад гьӀадат йиъий.

⁸ ГьӀасара сидилгара Петр на Янан, гьабишыы тапширмиш гьыъыр: – Дыхьыр, ес байрамад тӀиз гьӀазыр гьаъ.

⁹ – Вас гьили гьӀазыр гьыъыр йигара е тӀиз? – хулкара тимбише.

¹⁰ – Аъ шегьерди аӀчӀуйне, выхьды рыкъӀа гыхӀыси са эдеми гьанийде хана викиси хьед ад гыбытӀый, – рухьура ГьӀасара. – Гьанийхда хъуна дырых гьа аъ аӀчӀусды халыы йыкьамаъ.

¹¹ Халды иессиеде ваӀ гьихьяъ: «МагьӀалимере хулкара а вадаа: „Гьили а хал, Задаа на мутагьӀлимешдаа гундз вуъулес йикисды?“»

¹² Гьание ваӀс джиле чӀыхнад туьли гид хал гьагва гьаъаси, кьухьды тыв. Гьади гьӀазыр гьаъ.

¹³ Тимбыр дыхьыр, сиене Гьанийе рухьуд кал алгара. ГьӀазыр гьаъара гьади гундзмыд садакьа – тӀиз.

¹⁴ Вахт йибкьыйне, ГьӀаса на шагыртар сыдыбкьӀыре цухьрудыхда.

¹⁵ – Шудаъ йигарай Зас гьеми гундз ваӀхьван вуъулес изды гьӀазиетбыр каӀбчӀумаъ! – рухьура гьабишде ГьӀасара. –

¹⁶ Рухьура ваӀде, За гьа вуъулесдиш, гьа Аллагьад ПагьӀчаалыгъа кьуле вуруъумаъ.

¹⁷ Лювшур джем, шукур ваъад дугьӀа ки кьыле гьыъыр, Гьание рухьура:

¹⁸ – Ма, лювуш джем, чахыр ваӀс пай гьаъ. Рухьура ваӀде: мидыыла хъуъ Задаа чахыр хъарагъас хъикисдиш – таа ки Аллагьад ПагьӀчаалыгъ вуруъумаа.

¹⁹ Лювшур хьыв, кьатӀ выъыр, шукур выъыр, гьабишде вылцӀара, мисе рухьура: – Ми Изды джан йиъи, ваӀ бадаана вылцӀара ад. Зы йикӀыы хакьыр, мисе гьаъ.

²⁰ Гьааса Гьание улесды люъудыыла хъуъ Гьание гьабишде чахыр ад джем ки вылцӀара: – Ми джем ЦӀинды Ара хавалды виъи ваӀ бадаана сувгъӀуре ад Изды эбирехьван гъигъе выъыр ад.

²¹ Амма мидиъ гадакъ! Зы масак выснийды хыл Изды хылихьван са устӀулаа гъа!

²² Ий, Илсанашды Духарыы Джус Аллагьара кихьидбыйдыбыр сиене кьулуу йидкьын лазим йиъи. Амма Гьа масак вынийды джуды гьӀаюхь йиъи!

²³ Тимбише сыние сынийдаа хулкара, вышди Гьа масак выс гъилыы гъад.

Выш кьухьдына гьӀасаб гьыъыр йыгара

²⁴ МутагьӀлимешды арыди гьӀаджет руъура, джвершиклаа выш ти кьухьдына гьӀасаб руъурди.

²⁵ Амма ГьӀасара рухьура гьабишде: – Кафирешды пагьӀчаагьаше йиъи джухьды халкьдид кьул хывыркьад, гьабишды кьухьдыбише йиъи джвершихда «Хайирлиер» гьухьус вылцӀад.

²⁶ Выхьды арыди гьааса джишин лазим и! Выхьды арыди кьухьние выдж кӀыъды кал хакьыхь, ти кьухьние – къул кал.

²⁷ Гьис хьуйне, выш кьухьа йиъи? УстӀулахда хъуд кьухьа йиъиме, дишди гьанийис улесды вылцӀад? Бес устӀулахда хъудбыйды дишме?! Амма Зы выхьды арыди къул гьӀасаб йиъи!

²⁸ Захьван сытӀаъна ваӀ ки кьулуу йидкьыд духъундыбыр летӀир а.

²⁹ За ки ваӀс пешкеш ваъара Изды Диде Зас пешкеш выъыд ПагьӀчаалыгъ.

³⁰ ВаӀ Изды ПагьӀчаалыгъа Изды устӀулахда улере, рагъара дикиси, тахмыы сыдкьӀыр дикиси, цӀыкьӀваб Израилдид курд хылихьде гине.

³¹ Симан, Симан, гакъ, вы макъыет йиш! Иблиседе выхьды амзыр гьаъас на кьир гытӀаклаа джура ваъас вылцӀара а.

³² Амма За дугьӀа гьыъыр а, «вы диндидаа гъара магъӀуй» хьур. Хьели, вы Захда сухъукуйне, ва выды шубаӀ гъигъе даъ диндыы.

³³ – Илагьи! – рухьура Петрара ГьӀасада. – Выды джыбра хъуна зы гьӀазыр йиъи дустахди ки, джан выс ки!

³⁴ – Дуьзене рухьура вада, Петр, – рухьура Петрада ГьӀасара, – гъиигъа дадал валгасмаъ, ва хьиба «Зы гьацӀаддиш» хьур гьухьуси.

³⁵ За ваӀ сидилгад гедеэне – я хваб, я шийи, я гъилыыды хадишне, – ваӀ гьидыы-га магьӀатӀал дуруъурайме, аджыгыр? – хулкара гьабишдаа ГьӀасара. – Гьидыына, – рухьура тимбише.

³⁶ – Гьамыъ, хьуйне, – рухьура гьабишде ГьӀасара, – шийибыр ание шийибыр лешихь, хваб ки лювшухь, адишние валыг ки масак выр, тур лешихь.

³⁷ За рухьура ваӀде, Заклаа шыв киди Диндид дахьвтарак: «Гьа хъачахашды яцӀак киере», гьааса йикис ки йиъи. Гьис хьуйне, Заклаа шыв киди, сиене гьамыъ кьулуу йыкьаси.

³⁸ – Гьай Илагьи, миди кьӀвад тур ги! – рухьура тимбише. – Гъийкьаси! – рухьура Гьание.

Йидкьыд йыгъ лийес йишихь!

³⁹ Мыс-га кал, аӀгъӀачӀур халаа гъаъ, субкура Гьа Елеон-банахда. Гьанийды джыбра мутагьӀлимер ки дуруъура.

⁴⁰ Ериндыы йиркьыр, Гьание рухьура тимбишде: – «Йидкьыд йыгъ лийес йикихь», хьур, куб ваъ!

⁴¹ Выдж, хьуйне, гьабишдаа цӀар хуувгъуд духъунды мамзиляа йыхьыр, кьвакьымыы сукьур, куб ваъара:

^42-44 «Джан Дид, миннет виъи Вахьде, Зы гьеми Ва варагъас вылцӀара ад джемекляа геэяъ! Амма Ва гьухьудбыйды кьуле йыкьыхь, За гьухьуд ваъ!»

⁴⁵ Кубаала лаъ лухъузур, Гьа руъура мутагьӀлимешды бегеде, гьадубгура гьабыр хаджалатара некьик кидхьур ана.

⁴⁶ – ВаӀ гьидис садхыр адбыр диъи? – рухьура Гьание гьабишде. – Луьздуьр, куб ваъ, ваӀдаа «йыкьасды йыгъ лиес йикихь» хьур!

Иудад темени

⁴⁷ Гьание гьааса рухьура марана, магьӀлим вуруъура кӀабал, хьурабый «Иуда» хьур дур гъад ЦӀыкьӀурниклаа сабыйды гине. Гьа ГьӀасад бегеде руъура, «темени гьаъас» хьур.

⁴⁸ – Иуда, – рухьура гьанийде ГьӀасара, – уннанки высимихь ва Зы темени гьыъыр масак?

⁴⁹ Гьа гедеэне геэдылкьара Гьанийды аа-уу гид мутагьӀлимер, шивди миссагьӀатди йикисды, гьабише рухьура: – Гьай Илагьи, гьамыъ е турбыр, капырбыр лаъ летӀесиме?

⁵⁰ Гьааса гьухьур, сыние Сахьусды Дибиред къулад гьӀарчед убур куулкьара.

⁵¹ – Маъ, йишири! – рухьура гьабишде ГьӀасара. Хьели, убрук кийкьыр, китӀе хъаъара.

⁵² Сахьусды Дибирешде, Йинчид Халды къаривылашде не агъсакъалашде, джухда йидкьыр ад, рухьура: – Зы хъӀачах име, ваӀ Захда турбыр на кӀарбыр хана дыкьас?

⁵³ Зы гьӀар йыгъа выхьды Йинчид Хала ай, бес ваӀ зак гьис гьади кеджетедий? Гьамыъ выхьды вахт йибкьыр а, зулмат!

⁵⁴ Гьабише хакьыр ГьӀаса, гыргара. Йыгыри гьабише Гьа Сахьусды Дибиред хала. Петр джыбра кал хъуна йиъина ай.

⁵⁵ ГьӀаятдид йыкьӀа цӀай хъыъыр, илсанар сыдыбкьӀыре гьадид аа-уу, Петр ки субкьура гьабишихьван.

⁵⁶ Са къаривышере, цӀиде хад Петр гьагуйне, уртӀур гьанийды хьесыма, рухьура: – Гьеми ки Гьанийхьван ай!

⁵⁷ Амма Петра рухьура: – Зас Гьа гьацӀаддиш, гьай хьыдылды!

⁵⁸ ЫхьаӀ-ка манние, гьа гьагур, рухьура: – Вы ки гьабишды сабыйды йиъи. – Диш-ку, хыди, – рухьура Петра.

⁵⁹ Са сагьӀатаала кал са манние ки рухьура: – Дугъридан, ми ки гьабишихьван ай, ми ки Галилеяшура дишме бес?!

⁶⁰ – Хъац-гва, зас вы гьидиклаа иди гьалгад гьацӀаардиш, – рухьура Петра маа.

⁶¹ Гьание гьааса рухьура мадана, дадал валгара. Илагьи, хъуъ сукур, Петрыхда гакъара, хьели Петрыс йикӀыы хъӀугъӀуре Тиние джуда гьухьуд чӀелбыр: «Гъиигъа дадал валгамаа вы хьиба Заала хъуъ лухъузаси».

⁶² ГьӀаятдаа гъаъ хъиркьыр, йикӀ лиидхьур, ешере Петр.

Иянатбыр

⁶³ ГьӀасад къаривыл деъэре ад илсанаше Гьанийклаа иянатбыр гьаъара, яталбыр гьаъара Гьанийс.

⁶⁴ Гьанийды улабахда хъӀыр хъитӀир, хулкарай гьабише: – Пайгъампар, гьацӀара гьаъ, гьал иди вы йыхӀыд?

⁶⁵ Балад мадды ки иянатбыр гьаъара ай гьабише Минийклаа.

МеслагьӀат

⁶⁶ Йыгъ йишийне, ягъмиш дуруъура халкьдид агъсакъалар, сахьусды дибирер, Диндид магьӀалимер. ГьӀаса гъаъ эгъеръир, МеслагьӀатед улихьде луза гьаъара.

⁶⁷ – Джываб вияъ, Вы Мусуд йиъиме? – хулкара гьабише.

⁶⁸ – Нагагь За гьухьухьвна, ваӀ инаамиш дикисдиш, нагагь За суал выхьвна – ваӀ джываб хъывысдиш, – рухьура ГьӀасара. –

⁶⁹ Амма мидыыла хъуъ илсанашды Дух Кьууветли Аллагьад гьӀарчед хылыы сукьуси.

⁷⁰ – Иди Вы Аллагьад Дух име? – хулкара сиенебише.

⁷¹ – ВаӀ рухьура а «Зы йиъи» хьур, – джываб вылцӀара ГьӀасара.

⁷² – Маа еде шигьидер гьидисдыбыр диъи? – рухьура тимбише гьа гедеэне, – Ес Гьанийды джуды мизыыла сиенемыд ун йишири!