Лукара йибкьыд Шадды Хабар 21 - Лукаады Шадды Хабар

Гъарсынид кьадар

¹ ГьӀасас, гакъыйне, ад-ахъыдбыр гьадубгура, гъарсыд садакьабыр силхъере ад.

² Гьарубгура Гьанийс хиндадый ки, гъывырсыр кьӀваб шийи сивилхьере ад,

³ хьели рухьура Гьание:

⁴ – Инаамиш диш, гьеми хиндадыйере сиенебишихъаъ бала выри гъарсыр ад. Мадды сиенебише лилхьере ай артухды, гьание, хьуйне, гьаасад касибере, ридж ешемиш риъидухъунды сиене гъарсыр а.

Диндыы гъигъе диш!

⁵ Аа-уу гидбыр Йинчид Халыклаа далгара каӀчӀуйне, шудаъ бытӀрад духлаклаа гьыъыр ади гьа, шудаъ багьад карбыр гьадис гъарсыр ади садакьадисне, ГьӀасара рухьура:

⁶ – ВаӀс гьааса бытӀраана гьабгуд сиене лука гьаъаси, Йыкьаси йыгъ, миди духул духлаа гъаджабгасды.

«Выхьды кьулуула са чӀар ки сипӀесдиш!»

⁷ – МагьӀалим, мыс йикиси гьааса? – хулкара ГьӀасадаа. – Ес гьидыыла гьацӀаси, гьа кар бейде йиъид? Шыв лышан йикиси?

⁸ – Гадакъ, ваӀ адарца даъас мылвыцӀ, – рухьура ГьӀасара. – Баладбыр дыкьаси изды дур хакьыр. Гьухьуси: «Гьа ми зы йиъиӀ», «Вахт ливкьыр а» МадугъӀ гьабишихда хъуна!

⁹ ДагьӀви, къал ад хабар вишийне, ГичӀ мырвыхӀ. Суьхьде гьааса йишир йигара, амма аахир гьааса кӀыбди выкьасдиш.

¹⁰ Хьели ГьӀасара рухьура гьабишде: – Халкь мадды халкьдыы вуруъуси, пагьӀчаалыгъ мадды пагьӀчаалыгъахьван киджибхъаси,

¹¹ эккед лыкьынбыр ситӀеси, гаӀш либхьуси, гьвабаъад эзер идхьуси. ХӀалмаа мыкьлад гьӀаламатбыр гьагваси.

¹² Амма гьаасад гвалахбыр руъумаа ваӀ илсанаше хадылкьара дикиси, дустах даъара, джыбра ана, синагогама диван ваъара, дустахма эдеси, ваӀ пагьӀчаагьашды на кӀайсарашды бегеде дыгыргаси Зы себеб вишир.

¹³ Гьа ваӀс Изды шигьидерне луьздесды вахт виъи.

¹⁴ Гъигъене йикӀыы хакьаъ: Шууна гьамма выхьды кьул эгъепӀесди улихьде мадана фикир мываъ.

¹⁵ За ваӀс гьассад миз не гьакьал выси, – гьалдаана выхьды уликлаа лаъ луьздес йикисдиш, выхьды хьураа лаъ лузас са душманадаа ки йикисдиш.

¹⁶ Дидабаше не шубаӀше ки кине ваӀ йыдылхӀаре дикиси, бейдедбише ки, хыдиймаше ки. ВаӀклаа са-садбыр йыдхӀыси.

¹⁷ Сиенебишис ваӀ Изды бадаана негь дикиси.

¹⁸ Амма выхьды кьулуула са чӀар ки сипӀесдиш.

¹⁹ Гьигъе диш – ваӀ выхьды кьул кьӀаряа эгъепӀеси.

Иерусалим шувна валхурди

²⁰ Иерусалимдид аа-уу гид эскерер гьадгуйне, гьацӀара йиш: шегьер вай-виран ваъасды вахт бегеде виъи.

²¹ Гьа гедеэне Иудеяди адбыр банымыы дахыхь; Иерусалимди адбыр кӀыбди араа гъаъ аӀгъӀачӀухь, Иерусалимдид аа-уу гидбыр аъ шегьерди ахъӀмадугъӀуй.

²² Гьис хьуйне, джываб ягъӀад вахт йибкьыр а, Диндид дахьвдарак кидбыр сиене кьулуу йыкьасды вахт йибкьыр а.

²³ Гьа гедеэне ухьне кидбишыы на тӀитӀ кывылцӀадбишыы йыгъбыр йыкьаси! Эккед къам на зулумбыр йыкьаси ми накьудыы, Йинчид завх сибхьуси ми халкьдыы:

²⁴ са-садбыр туруд кӀеъэлыы дыкьыркьаси, маддыбыр, лыкӀра кал, мадды уьлкема дыгыргаси. Кафиреше луьвшуси Иерусалим, таа ки джухьды вахт ладжваалтӀамаа.

Илсанашды Дух йыркьын

²⁵ Виргъиы на вазырыы на хӀадиймыы мыкьлад лышанбыр йикиси накьудыы гъад илсанашды йикӀбыр тӀулкьара йикиси дейрагьаа гъад лепебыр гьагуйне, дейрагьад сесед ун йишийне.

²⁶ Илсан ил киидхьур сатӀаси гичӀ йывхӀыр дуьнйадыы руъура ад гвалахбыр гьагуйне. Гьис хьуйне, хӀал кьалкьаси.

²⁷ Гьа гедеэне гьагуси: Илсанашды Дух йиъина а гыблиыла хьуъ, кьуувет не кьухьды ашгарвалды хана.

²⁸ Гьа гвалахбыр руъура каӀчӀуйне, Кьул лаъ кеэпӀе, йыкьӀ дуьз гьаъ Азадвалды бейде виъи!

Инжиред хук

²⁹ ГьӀасара гьабишис мисед ихтилат гьаъара: Гадакъ инжиред не мадды хукумыхда.

³⁰ Гьаммыра кьурукь гьаъад вахтинди гадкъыйне ваӀс гъӀылд бегеде йиъид гьацӀара руъура.

³¹ Миди ки гьааса: Гьа гвалахбыр руъура каӀчӀуйне, гьацӀ, Аллагьад ПагьӀчаалыгъ бегеде виъи.

³² Рухьура ваӀде, мибыйды арха угъӀувчӀусмаа ми чӀел игъибкьаси.

³³ ХӀал не чӀир хьаӀл саджабтыр тарг йикиси, Амма Изды чӀел игъджибкьыр абгасдиш.

³⁴ Иди гадакъ, дуьгъуьргъере, дирхьара, рагъара, кенчи гвалахмыра выхьды йикӀбыр юкьӀа маъ. Вахт ливкьыйне, ваӀ гьӀазырана адгын бадаана.

³⁵ ЧӀаӀнкӀ кал йикиси гьа йыгъ сиене дуьнйадыы гъад духъундыбишис.

³⁶ Некьиде хиджидхьур, мыс-га куб ваъ, дугьӀабыр гьаъ ваӀс гьа амзырмаа хьуъ аӀгъӀачӀус ягьӀ гъийкьын бадаана, Илсанашды духарды улихьде луьздес йишин бадаана.

³⁷ Йыгъадыхъаъ ГьӀасара Илагьиед хала хӀаар даъарай, нахӀ руъуд гедеэне йыхьыр, выш Елеон хьур дур гъад банаа лиерей.

³⁸ Сиене халкь йаӀкв кьатӀ йишир мадана Илагьиед хала вуруъурай, Гьанийхда хъавацус хьур.