Лукара йибкьыд Шадды Хабар 20 - Лукаады Шадды Хабар

Гьал и ГьӀасас ихтияр выд

¹ Эхир са йыгъа, ГьӀасара Илагьиед хала илсанар хӀаар даъара ад гедеэне, гьабишис Шадды Хабар вылцӀара, дуруъура Гьанийды бегеде Сахьусды дибирер не Диндид магьӀалимер агъсакъалар ки хъуна.

² Гьабише хулкара: – Гьихьяъ-гва еде, Ва шыв ихтияр ана гьааса гьаъара? Гьал выд виъи вас ихтияр?

³ – За ки выси ваӀс са суал, – рухьура ГьӀасара, – ваӀ ки зас джываб вияъ.

⁴ ЯхӀйе-пайгъампарад хьед гъӀыйхӀын гьалдаады йиъий? ХӀалире выд ихтияр виъиме, дишди илсанаше?

⁵ Амма гьабишды гьӀаджетбыр руъура са-сынийхьван: «Нагагь е „ХӀаӀлире“ гьухьухьна, гьание худкаси: „Бес ваӀ гьис гьанийыы инаамиш джидшид?“ хьур.

⁶ Нагагь е „Илсанаше“ гьухьухьна, сиенебише яа къат сийтеси, гьис хьуйне, гьабыр инаамиш диъи „ЯхӀйе пайгъампар йиъий“ хьур».

⁷ Хьели гьабише Гьанийде рухьура, джвершис гьацӀаардиш хьур, гьалдаады йиъиди.

⁸ – Ид гедеэне, за ки гьухьусдиш, шыв ихтияр ана За гьааса гьаъаарди, – рухьура ГьӀасара.

ТӀымлымыд багъдид иесси не багъманчиер

⁹ Хьели ГьӀаса халкьдис мисед ихтилат гьаъара кагъӀуре: – Кивилхьере са эдемиере тӀымыл, вылцӀара хьели тӀымлад багъ багъманчийшде, выдж балад геде руъура вырды уьлкиди ешемиш йикис.

¹⁰ ТӀымыл ягъмиш гьаъад вахт йибкьыйне, силгара гьание багъманчийшихда джуды къул тӀымлад багъдаа йишид руузи лаӀшус. Амма багъманчийше етере къул, шешине ки хахъдишне сихъилгара.

¹¹ Хьели тиние мадды къул силгара. Ти ки, етир, бейъабыр гьыъыр, йихъилгара, шешин джывыр.

¹² Иессиере силгара хьибырхьусды къул, маа, Ти ки йыхӀынед кьул гьыъыр, гъаъ хахъаабгъура.

¹³ Рухьура гьа гедеэне тӀымлад багъдид иессиере: «За шыв гьаъасдий? Сигас-гва изды гирамигды дух, белки хьели рыхъӀ руъуд».

¹⁴ Амма багъманчийше, гьа гьагуйне, са-сынийде рухьура: «Ми гьанийды быныдыы гъаргасды варис йиъи! Дыкьа гьа йыхӀыс! Сиене бына ес викисий!»

¹⁵ Гъаъ хахъаагъур ти багъдаа, рыхӀыре. Гьамыъ шыв гьаъаси гьабишис тӀымлад багъдид иессиере?

¹⁶ Гьа хъургъур хъиркьыр, багъманчиер дар-агъаджаа деъэси, тӀымлад багъ ки маддыбишде выси. – Йинчире хырыда гьыъыхь! – рухьура хъадабцудбише.

¹⁷ ГьӀасара, гьабишыыла улабыр эгъджетӀир, хулкара: – Бес гьааса иди, Диндид дахьвдарак кид ми чӀилмыд натыдже шиви: «Устараше хьуъ хуувгъуд духлаклаа вытыд духул вишири?»

¹⁸ ГьӀар гьадыхда хьура хъӀыхӀыднийдаа эбир ваъаси, гьалыы гьа духул сывхӀырди, ричӀеси.

«Пагьчаагьад пагьчаагьда хъивияъ, Йинчид – Йинчиде»

¹⁹ Диндид магьӀалимешис не сахьусды дибирешис хакьас йигара руъура ГьӀаса, ихтилат джвершиклаады йиъид гедкьыр, амма илсанашыыла гичӀ хывыркьара.

²⁰ Гьадыыла гьабыр ГьӀасаа ул гъана ваъара кадгъӀуре, сидилгара гьанийхда уджагълийшик кидикад каалды илсанар, Гьа чӀирид шыв-га рухьура хакьас руъуд хьур. Хьеликана «Гьа Рим-шегьердид пагьчаахда суд ваъас» выси хьур.

²¹ Тимбише хулкара ГьӀасадаа: – МагьӀалим, ес гьацӀара выды чӀелбыр ки выды мутагьӀлимер ки гьакь диъид, ва гьалысна кьул аа джаваъад, дуьзене, ачыхана хӀаар даъад, Йиниш бадаана шууна ешемиш дишин лазим йиъиди.

²² Гьихьяъ еде, е Римдид пагьчаагьас налуг вын лазим йиъиме, дишме?

²³ ГьӀаса гийкьара гьабишды нагьакьды фикирдихьде, рухьура гьабишде:

²⁴ – Гьувга ваъ зас танга. Гьалды шикил не дур гъа гьадыы? –

²⁵ Римдид пагьчаагьад, – рухьура тимбише. – Ид гедеэне, Римдид пагьчаагьад пагьчаагьда хъивияъ, Йинчид – Йинчиде, – джываб хъывылцӀара ГьӀасара.

²⁶ Руъурдиш гьабишдаа илсанашды улихьде Гьанийдаа шыв-га чӀел эгъепӀес, хиибхьур кар гьыъыхьвна. Гьанийды джывабаа гьӀаламат йишир, гьабыр гихъдиилхьере.

Йывды шуд къари

²⁷ Гьанийды бегеде дуруъура са шумур иди садукьыйер (гьабыр илсанада ил ахъагъуныы инаамиш дичӀеэр диший), вылцӀара гьабише ГьӀасас мисед суал:

²⁸ – МагьӀалим, Мыса-пайгъампарара Къаанундик ес мисе кихьир ай: нагагь гьалды-га къари гид шу велед джившир йикьихьвна, тимбыйды шура лаӀхъӀаршуй гьанийды къари, хьели йишид веледбыр шудбырна гьӀасаб гьыъыхь. Бес ми ихтилатак шыв гьаъаси:

²⁹ ай-адиший йывыр шу. Сахьусды, къари рыъыр, хынимер джидшир, йикьири.

^30-31 Гьанийды къари хъараъара кьӀваӀрхьусдыние, хьибырхьусдыние, гьааса, гьааса сиенебише, амма секкинийис велед вуруъурдиш.

³² Хьели рикьире хьыдылды ки.

³³ Эхир-кьияматаала хъуъ гьа хьыдылды гьилнийды къари гьӀасаб рикиси? Бес гьа йывдысинды шуд къари ришир ай эхир!

³⁴ – Ми девирдид сиенебише къари ки раъара, выгглис ки дуруъура, – джываб хъывылцӀара ГьӀасара. –

³⁵ Амма сыраа луьхъуьздес лейихдыбырна гьӀасаб даъасдыбишдаа на выкьасды девирди ешемиш дикисдыбишдаа я къари раъас йикисдиш, я выгглис дуруъус.

³⁶ Гьабишдаа маа дыкьыркьас ки хъикисдиш, малаикмар кал дикиси. Гьабыр Йинчид хынимер дуруъура, гьис хьуйне, Гьание луьзде хъадаъаси гьабыр сырымаа.

³⁷ Сыраа луьхъуьздедиклаа хьуйне Мыса-пайгъампарара джу гьаъад гьулхьвад кулуруклаады ихтилатак кий. Гьади гьание Йиниш Ибрайимды ки, Исакьды ки, Якьубды ки Йиниш йиъи рухьура.

³⁸ Амма Йиниш дыркьыбишды Йиниш диш, Гьа сагъдыбишды Йиниш йиъи. Гьанийды улихьде сиене сагъ диъи.

³⁹ Хьели Диндид магьӀалимеше рухьура: – Ва йыхана рухьура, магьӀалим.

⁴⁰ Маа гьадыыла хъуъ гьалдаана шыв-га хухъудкас руъурдиший гьанийдаа.

Мусуд на Давыд-пайгъампар

⁴¹ ГьӀасара рухьура гьабишде: – Шыв хьур рухьура илсанаше «Мусуд Давыдды куьлфет» виъи хьур?

⁴² Давыда джу бес рухьурдишме джуды нагьӀнимаа: «Аллагьара гьухьури изды Илагьиеде: Изды гьӀарчед хылыы сукьа,

⁴³ Таа За выды душманар Выды мыкӀмыхьде гедемаа».

⁴⁴ Гьын, гадакъ, Давыд-пайгъампарара Гьанийхда «Илагьи» рухьура, Бес шууна и Гьа гьанийды хыдыл руъуд?

«Диндид магьӀалимешыыла АгьӀдиет диш!»

⁴⁵ Илсанар сиене джухда хъадабцуд гедеэне, ГьӀасара рухьура джуды мутагьӀлимешде:

⁴⁶ – ХӀуляхӀды валыг лаъад Диндид магьӀалимешыыла агьӀдиет диш, гьабишис джвершис гимима гьӀуьрмет выъыр йигара, синагогама гьабыр сыдылкьӀаре сахьусды еримыы, туймык ки гьабыр йыхды джигима дуруъура.

⁴⁷ Гьабише и хиндадыймашды хьыв улере ад, хьели дугьӀабыр хъаъара! Гьабишды диван лап юкьӀды викиси!