Лукара йибкьыд Шадды Хабар 2 - Лукаады Шадды Хабар

ГьӀаса гьухуд йыгъ

¹ Гьа вахтинди Август-пагьӀчаагьад бииругъ йидкьыр ай, дуьни-дуьнйаадыы гъадухъунды илсанашды сиягь гьаъ хьур.

² Квириний Сириядид кьухьды йишидаа хъуъ гьа сахьусды сиягьбыр йиъий.

³ Сиенебыр джвер сиягьма эдес дуруъура – гьӀар выдж гьухьуд шегьерди.

⁴ Йисухь ки руъура – Назаретдид шегьер Галилеядаа Иудеяди, Вифлеем хьур дур гъад Давыдды шегьерди

⁵ Йисухь Давыдды цихилдиклаады йиъий, гьанийды хыдылашиклаады. Гьа сиягьма иес руъура джуды сус Майрам ки хъуна. Гьа ухьне кий.

⁶ Гьабыр Вифлеемди ад гедеэне, гьанийды рухуд вахт йибкьыри.

⁷ Гьухура гьанийс джуды сахьусды дух. АркӀа гьыъыри гьание дух, хьели малмыд тӀына илхьере, гьис хьуйне мийманханыди гьабишис ер ывгыр адиший.

ХӀабаӀхъӀанер не малаикмар

⁸ Гьа джигидаа цӀамна хырыда кал гий хӀабаӀхъӀанер, гьабыр чӀирыы ешемиш диъий, вышедыхъаъ мал ухӀуре ай.

⁹ Садахьурка гьабишды уликлаа лаъ лувурзара Аллагьад малаик, ХӀалаа саъ нур лугъури гьабишды аа-уу. ХӀабаӀхъӀанешис гичӀ йывхӀыр, паӀрт дуруъура.

¹⁰ Амма малаикере рухьура гьабишде: – ГичӀ мываъ! Зада ваӀс эккед хабар ха – гьа эккед шадвалды виъи сиене выхьды халкьдис.

¹¹ Гъиигъа Давыдды шегьерди ихьды Азадчи гьухур а, Ихьды Илагьи, Мусуд!

¹² ВаӀс гьа хъацӀасды лышан мисед йиъи: ВаӀде тӀына кийир ад аркӀыд хыных агаси.

¹³ Гьааса гьухьудка малаикед бейдаа лаъ сиене хӀаӀлды эскер-месгер лузури, мисе Аллагьахьде шукур ваъара:

¹⁴ Шукур Йинчихьде! Шукур Йинчихьде! Ассалам Гьанийс хъывгад накьудис не илсанашис!

¹⁵ Малаикмар хӀаӀле хъӀаадхӀыйне, хӀабаӀхъӀанеше рухьура са-сынийде: «Дыкьа Вифлеемди дуруъус, гадкъас, шивди гьади гьыъыр ад, гьидиклаады хабар виъиди Аллагьара ес сивигыд».

¹⁶ Гьабыр телесыхана рыкъӀаӀ аӀчӀур, дыхьыр, гадкъыд – адылгара Майрам на Йисухь тӀына ад хынхыхьван.

¹⁷ Дукар гьагуйне, хӀабаӀхъӀанеше ихтилат гьаъара, малаикере джвершде шыв хьурди.

¹⁸ Сиене хъадабцубишис гьӀаламат руъура хӀабаӀхъӀанешды ихтилатаа.

¹⁹ Майрама хьуйне сиене йикӀе ухӀуре, гьадиклаа фикир ваъара.

²⁰ ХӀабаӀхъӀанер хъуьдуьргъуьр, хъӀудире, Йинчихьде джвершис гьагудмыхъаъ на ун хъӀыхӀыдмыхъаъ шукур ваъара: сиъин карбыр малаикере джвершде гьухьуд кал йишир ай.

²¹ Мыйды йыгъаала, хыных суннат гьыъыр йыгад вахт ливкьыйне, Гьанийис вылцӀара дур ГьӀаса – малаикере гьанийыы выдж ухьне марана лихьид дур.

²² Мыса-пайгъампарад Къаанундире рухьуд кал, Майрамды на Йисухьды тӀагьарат хъаъад вахт ливкьыйне, гьабише дукар Иерусалимди гыргара, гьа Йинчис гъарсас хьур.

²³ Гьис хьуйне, Йинчид Къаанундик кини и: «ГьӀар сахьусды выггылды хыных Йинчис гъарсын лазим йиъи»,

²⁴ са ки садакьа гьыъын бадаана «я кьӀваӀб тыртыр, я кьӀваӀб мукӀды лирхьв» Йинчид Къаанундик кид кал.

Симана ГьӀасас йикисдиклаа ихтилат гьаъара

²⁵ Ай гьа гедеэне Иерусалимди Симан хьур дур гъад эдеми, гьа эдеми бала темизды на уджагъли кас йиъий, Израилдис азадвалды гуьзет ваъара ад. Ай гьанийде Илагьиед РухӀ.

²⁶ Симанда Илагьиед РухӀдире гьухьур ай, выдж таа Аллагьара сигыд кас гьабгумаа йикьисдиш хьур.

²⁷ РухӀдире хьура лийир, руъура ми Йинчид Хала. Гьадиъ дид не нин дукар ГьӀаса хана йидкьыйне, гьанийыы уу Къаанундире рухьуд гвалахбыр гьаъас хьур,

²⁸ Симана хыных хыле лешур, Йинчихьде шукурбыр гьаъара:

²⁹ – Гьамыъ Ва зы архыйинне сихъигаси, Зы, выды къаривыш, дуьнйадид Иесси Аллагь. Ва выды чӀел кьуле выгыр а:

³⁰ изды улабас гьагур а Ми, Ва

³¹ Азадчи йиъи хьур яратмиш гьыъыр ад сиене халкьбыр бадаана, –

³² Гьа кафирешик кагъусды йаӀкв йиъи, Гьа Израилдид халкьдид Нур йиъи.

³³ Хынхыд дид ки, нин ки Симана ГьӀасаклаа рухьудмыхда гьӀаламат йишир хъадабцура.

³⁴ Симана рухсат выри гьабишис, нин Майрамда ки гьухьури мисе: – Тини Гид гьай, гьанийды бадаана баладбыр Израилди луьдкеси, баладбыр луьздеси

³⁵ (выды ил ки турура кал кьатӀ йикиси). Гьа Аллагьад лышан йикисды йиъи, гьанийды хьураа лаъ баладбыр луьздес чалыш дикиси, гьааса джухьды йикӀима ад писды наятбыр ашгара гьаъара.

³⁶ Ай гьа джигиди хьвалчи Анна, Фануилды рыш, Ашер хьур тухумдиклаады. Гьа лап кьӀаӀсды риъий. Йывыд сен выгглихьван лидхьур,

³⁷ гьа хиндадый риширий, хиндадыйне гьание лийир ай мыйцӀыр на юкьуд сен. Гьа садаки Илагьиед халаа гъаъ руръуд диший, йыгъа-выше Йинчис къуллух ваъара кубахьван на дугьӀамыхьван.

³⁸ Ми гедеэне гьа ки йиркьыри мибишды бегеде, Йинчихьде шукур ваъара. Сиене Иерусалимдис азадвалды выгара адбишис гьание дукракляа ихтилат гьаъара ай.

ГьӀасад хыныхвалды

³⁹ Аллагьад Къаанундире рухьудбыр сиене гьыъыр, мибыр хъӀудире Галилеяди, джухьды Назарет-шегьерди.

⁴⁰ Хыных гьакьалдид иессине кьухьа руъура ай. Гьанийыы Йинчид салам гъай.

⁴¹ ГьӀар сыда ГьӀасад дид не нин Иерусалимди Пасха рухьуд байрамак дуруъурай.

⁴² Гьанийды цӀыкьӀваӀд сен атӀуйне, гьабыр мыс-га кал, байрамак дыхьыри.

⁴³ Байрамаала хъуъ джвер хала хъӀудире, ГьӀаса Иерусалимди алгара.

⁴⁴ Дидис не нинис Гьа марад хабар адиший, дирхьара адбишик кид калагур, хьели Гьа ахтармиш гьаъара каӀчӀури къумшийшды на бейдедбишды арыдаа.

⁴⁵ Ахъджыгыр, гьабыр Иерусалимди хъӀудире, гьади ахтармиш гьаъара кадгъӀуре.

⁴⁶ Ахъылгара Гьа хьибды йыгъаала Илагьиед халаа. Гьа магьӀалимешды арыди сукьур ай, гьабишихда хъабцура, суалбыр вылцӀара.

⁴⁷ Гьанийды ун йишид сиенебишис гьӀаламат руъурай Гьанийды гьакьалдыы на джывабырмыы.

⁴⁸ Дид не нин, Гьа гьагуйне, мат дишири. Нине рухьура Гьанийде: – Гьай дух, Ва гьис ес мисе гьыъыри? Гьабгурама, шудаъ хаджалат кывыр ади Ва выды дидис не зас, выды джыбра идхьур?

⁴⁹ – ВаӀ гьидис изды джыбра йидкьыдбыр диъи? – хулкара Гьание. – Бес ваӀс Зы Изды Дидды хала йикисды гьацӀаардишийме?

⁵⁰ Амма дид не нин гедылкьаардиш Гьанийды джывабахьде.

⁵¹ ГьӀаса хъӀугъӀуре гьабишихьван Назаретди, гьадыыла хъуъ мыс-га гьабишихда хъабцура. Нине ми сиенебыр йикӀыы халкьара.

⁵² ГьӀаса кьухьа руъура, джухьван джуды гьакьал ки бала вуруъура ай. Илсанашды на Йинчид суруула Гьанийис гьӀурмет ки бала вуруъура ай.