Лукара йибкьыд Шадды Хабар 19 - Лукаады Шадды Хабар

ГьӀаса на ЗагьӀый

¹ Иерихонди аӀчӀур, ГьӀаса кучимаа хьуъ йирхьара ай.

² Гьа шегьерди ай са «ЗагьӀый» хьур эдеми, варлы, кире ягъмиш гьаъадбишды кьухьды,

³ Гьанийис гьасса йигара ай ГьӀасахда гакъас, гьа шууды йиъиди, амма джишир ай гьӀарасатмыклаа, гьис хьуйне, гьа буйес джыкды йиъий.

⁴ Гьа гедеэне гьа, ГьӀасахда гакъас хьур, улихьде кал гаӀчӀур, хукаа лаӀбчӀура, «аала хьуъ ГьӀаса йиъиди гакъас» хьур.

⁵ ГьӀасара, гьа джигиди лийкьыйне, улабыр лаъ летӀир, рухьура: – ЗагьӀый, кӀыбди саъ сихъийиъ! Зы гъиигъа выды хала йыкьаси.

⁶ Ти телесыхана саъ саӀхъӀачӀур, хъыхьыр, шадана ГьӀаса хала гыргара.

⁷ Гьа кар гьагуйне, сиенебишис хъӀал либкьыр, рухьура: – Гьааса нагьакьды эдемиед хала ки руъуд име?!

⁸ ЗагьӀый Илагьиед уликлаа лаъ лузур, рухьура: – Илагьи, кьин гьаъара за: изды халды-малдид кьатӀ за касибешис гетӀва гьаъаси, гьалдаа за артухды лаӀшур ади, гьанийис юкьа хылис артухана хъывыси,

⁹ – Гъиигъа ми хала азадвалды йибкьыр а, – рухьура ГьӀасара, – Гьа ки бес Ибрайим-пайгъампарад дух дишме?

¹⁰ Илсанашды Дух, хьуйне, йиркьыр ад йиъи сугур адбыйды гьахъагур, аӀйлуьг хъаъас хьур.

Анийис мааки выси

¹¹ Гьадид ун йишидбишис ГьӀасара ихтилат гьаъара. Гьабыр гьамыъ Иерусалимдид бегеде ледкьыр ай, гьадыыла гьабишис Аллагьад ПагьӀчаалыгъ, ыхьаӀ джыъыр, магьӀлим викисды кал гьагур ай.

¹² ГьӀасара рухьура: – Са вазир руъура мадды уьлкиди пагьӀчаагьад тахаа джуды ихтиярбыр парчим гьаъаси хьур, хьели хъикьасна.

¹³ Сес ваъара гьание джуды бегеде йицӀды къулахда, вылцӀара гьабишде йицӀыб танга, мисе гьухьур: «Зы адишди йыкьамаа гьабыр ишлемиш гьаъ».

¹⁴ Илсанашис гьа кӀваӀчӀе йиъий, гьабише гьанийды джыбра сидилгара векилер «Ес гьа ихьды ПагьӀчаа йишир йигаардиш» гьухьус.

¹⁵ ПагьӀчаагьад тах ывгыр, хъургъур, хъиркьыйне, гьание сес ваъас вылцӀара джуды бегеде къулар, джу шийибыр выд, гьацӀара гьаъас, шудаъды шийи тимбише къазамиш гьыъырди джуды шийимыхьван.

¹⁶ Сахьусдыние йиркьыр, рухьура: «Джан иесси, выды къизилед манутара зас йицӀыб манут къазамиш выъыри» –

¹⁷ «Аферин, вы йыхды къул йиъи, – рухьура гьанийде пагьӀчаагьара. – Ваа цӀамдыдаа умуд ваъас руъуд, за выды хылихьде вылцӀара йицӀыб шегьер».

¹⁸ КьӀваӀрхьусдынийе, йиркьыр, рухьура: «Выды къизилед манутара зас хьуб манут уу хъывгыри». –

¹⁹ «Вы ки хьудды шегьердид кьухьды гьаъара», – рухьура гьанийде пагьӀчаагьара.

²⁰ Хьибырхьусдынийе йиркьыр, рухьура: «Джан иесси, ма хъума выды къизил. За гьа ялыхъа аркӀа гьыъыр, ухӀури,

²¹ ваала гичӀинире. Вы залым эдеми йиъи: сиджихьид джигидаа лаӀбшура ва, джезид джигидаа еш гьаъара».

²² ПагьӀчаагьара рухьура гьанийде: «Ва выды диван выъыр а, езид къул! Вас гьацӀарай, зы залым йиъид, сиджихьидаа лаӀбшуд, джезидаа еш гьаъад,

²³ Бес ва изды шийибыр гьис гьалдага бырджере гьадаана джывыд, белки гъиигъа зас цӀамдыбыр гьадаана уу гъана хъӀугъӀудийӀ».

²⁴ Хьели пагьӀчаагьара рухьура нукарашде: «ЛюхъӀувуш гьанийдаа гьа иъизилед манут, йицӀыб къизилед манут хаднийде хъиви», –

²⁵ «Гьай иесси, – рухьура тимбише, – бес гьанийде йицӀыб манут хана ки адишме?!» – «

²⁶ За рухьура ваӀде: анийис маа выси, адишнийдаа хад ки хӀаашуси.

²⁷ Изды душманар, хьуйне, зы ПагьӀчааваӀле джыгадбыр, миди дака, зы ки гине дар-агъаджаа деъ».

ГьӀаса Иерусалимды йыркьыдиклаа

²⁸ Ми ихтилат гьыъыр, ГьӀаса Иерусалимдыхдана рыкъӀа ахъӀагъӀуре.

²⁹ Гьабыр Вифагиедид не Вифаниедид бегеде хад гедеэне, Елеон хьур дур гъад банада ледкьыйне, ГьӀасара сидилгара кьӀвар мутагьӀлим,

³⁰ гьабишыы тапширмиш гьыъыр: – Ти суруу гид мукъӀа дырых. МукъӀук кадгъӀуд джигидаа ваӀс гьувгаси мукӀды йымаӀл, хакылык кид, гьадыы гьала вышне лаӀчӀур адиш.

³¹ КеэпӀир, миди вака. Гьалга худкухьна, гьидис кеэвелъэд виъи хьур, гьихьяъ: «Гьа Илагьиес лазим виъи».

³² МутагьӀлимер дыхьыр, гьухьуд кал ывылгара йымаӀл.

³³ Гьабише хъӀваӀнчӀ кеэвилъэд гедеэне, иессийше хулкара мутагьӀлимешдаа: «ВаӀ гьидис кеэвилъэре ад виъи ихьды хъӀваӀнчӀ?»

³⁴ Амма тимбише рухьура: «Гьа Илагьиес лазим виъи».

³⁵ Йибкьыр гьабише хъӀваӀнчӀ, сыъыр гьадыы джухьды чухуйбыр, ГьӀаса уу лабгъура гьадыы.

³⁶ Гьа йиъина ай, джвер джухьды валыг гьадид рыкъӀа саъара ай.

³⁷ Гьа Елеон-банаала саъ хъӀудид джигиди лийкьыйне, сиене мутагьӀлимешды кӀабал кувгъӀуре Йинчихьде шукур ваъара, джвершис гьагуд гьӀаламатмыхъаъ,

³⁸ мисе рухьура: – Шукур викий Аллагьад дур хакьыр рыкъӀа аӀчӀур ад ПагьӀчаагьас! Вас хӀале салам, Вас хӀаӀлма ашгарвалды!

³⁹ КӀабалак кид фарисейеше рухьура Гьанийде: – МагьӀалим, гиидхье даъ выды мутагьӀлимер.

⁴⁰ – Инаамиш диш, нагагь гьабыр гиидхьихьвна, духлымар гьалгаси, – рухьура Гьание.

Иерусалимдыхдад хул

^41-42 Гьабыр Иерусалимдид бегеде ледкьыйне, шегьер гьувгуйне, ГьӀасара гьадыхда ешел ваъара: – Угь! Джан шегьер, эгер гъиигъа гьадаана вас ки гьувгурийди архыйинваӀлихда виъид рахъӀ! Амма гьамыъ гьа рахъӀ выды улабырмыс гьувургара адиш.

⁴³ Йыкьаси са йыгъ, вы душманаше джухьды йыкьӀаӀ ивир ад, ара ивир, вы на выды илсанар накьудид уу суруула тарг даъаси,

⁴⁴ выды духул духлаа гъабтасдиш – сиене гьаасад гуджбыр ки, гьа йыгъбыр ки ваа йыкьаси вас вахтинди Йинчире вас гьувга выъыд азадваӀлид рахъӀ гьуджувгудыыла.

ГьӀаса Йинчид Хала руъура

⁴⁵ Илагьиед хала аӀчӀур, ГьӀаса савдагарар гъаъ йидилгара кагъӀуре,

⁴⁶ мисе рухьура гьабишде: – Диндид дахьвдарак кини и: «Изды хал кубад хал йикиси», ваӀ, хьуйне, гьадиклаа хъачахашды кӀухма гьыъыр а!

⁴⁷ ГьӀасара Йинчид Хала гьӀар йыгъа хӀаар даъарай. Сахьусды дибирешис, Диндид магьӀалимешис, мадды дур-ун ад илсанашис гьанийды кьулис ваъас йигара ай.

⁴⁸ Амма гьабишис шууна гьанийик кетесди джацӀыр ай, гьис хьуйне, гьӀар йыгъа Гьанийихьван халкь ай, тӀекьикьедыы ки Гьа са выдж саджатыр, Гьанийды гьӀар чӀел йикӀыы хывылкьара.