Лукара йибкьыд Шадды Хабар 18 - Лукаады Шадды Хабар

Кьади не хиндадый

¹ ГьӀасара гьабишис са ихтилат гьаъара, гьабишис гьацӀын бадаана, мысга дугьӀабыр гьаъара, джваӀр джудаа хиджиидхьун бадаана.

² – Ай са шегьерди диван ваъад кьади, гьанийис я Йинчыыла гичӀед диший, я илсанашыыла рыхъӀ руъуд диший.

³ Ай гьа шегьерди са хиндадый ки, мыс-га гьанийхда руръура, рухьуд: «Зас гьакь гьаъас куьмег гьаъ, ихьды гьӀаджетед кьатӀлаама гьаъ!»

⁴ Гьа балад гедеэне рази джишир ай, хьели рухьура джу джуда: «Зас Йинчыыла гиджичӀенехъунки, зас илсанашыыла рыхъӀ ки джугъӀунехъунки,

⁵ ми хиндадый хъӀахъӀраабчӀуд диш. Гьаъаси гьанийды кьатӀлаама, маа хьиджиркьыр, заа йыгъ хъыджыгын бадаана ки».

⁶ ВаӀс ун ама, шыв рухьура, ади ми рыхъӀ адишды кьадиере? – рухьура Илагьиере. –

⁷ Бес Йинчире джуды сур хакьыдбишды сур хакьасдишме, йыгьа ки выше ки джухьде дилегбыр гьаъара ад? Бес Гьание ыхьаӀ гьаъасиме?

⁸ Рухьура ваӀде: Гьанийды диван гьакьды на кӀыбди викиси. Амма илсанашды Духарда, выдж накьудыы хъиркьыйне, гьаасад инаамишвалды ыхъывгасимихь?

Фарисей не налугбыр ягъмиш гьаъад эдеми

⁹ Выдж джуды мисгинваӀлыы разидбишде не маддыбыр гьӀасаба джадаъадбишде ГьӀасара мисед ихтилат гьухьури;

¹⁰ – КьӀвар эдеми дуруъура Йинчид Хала куб ваъас. Са фарисей ий, са – налуг ягъмиш гьаъад.

¹¹ Фарисейере, лузур, мисе рухьура ай джу джуклаана: «Джан Йиниш, сагъул вас зы маддыбыр каалды дишдидыхъаъ – сырыхчи, нагьакьды, чуьруькчи, чӀилис гьеми кире ягъмиш гьаъанийк киджикадыхъаъ.

¹² За гьӀафтидыы кьӀуне сив халкьара, гъараа аъ руъуд ризкьыд йицӀыбхьусды пай гебтӀва ваъара».

¹³ Кире ягъмиш гьаъаднийе, хырыда кал лузур, улабыр ки хӀалихда лийес джишир, джу джуды мыхыр ветере, рухьура ай: «Гьай Йиниш, зак гунаабыр бала ки, заала хыл луьвуш!»

¹⁴ Рухьура ваӀде: гьа хъӀугъӀуси хала Йинчис гирамиг йишир, фарисей ваъ. Гьис хьуйне, гьӀар выдж лаъ гьаъас хьур хъичӀирхьыр ад саъ йикиси, выдж саъ гьаъад лаъ йикиси.

¹⁵ ГьӀасад бегеде дыгыргыра кӀаъды хынимер, Гьа гьабишик кийкьын бадаана. МутагьӀлимеше гьабыр гъаъ эхъедере чалыш дуруъура.

¹⁶ ГьӀасара, хынимер бегеде сес выъыр, рухьура: – Дыкьыхь захда хынимер, гьабишис рахъӀ гъигъе мываъ. Йинчид ПагьӀчаалыгъ гьабыр каалдыбишисды виъи.

¹⁷ Рухьура ваӀде, гьал Йинчид ПагьӀчаалыгъ, гьабыр кал, йикӀе уджувгъурди, гьа гьади агъусдиш.

Мыс-гад гьӀуьмир

¹⁸ Са дур ад эдемиере хулкара ГьӀасадаа: – РагьӀим ад МагьӀалим! Шыв гьыъыр йигара за, мыс-гад гьӀуьмир ывгын бадаана?

¹⁹ – Гьис ва захда рагьӀим ад рухьура? – хулкара ГьӀасара, – гьалыхдана адиш рагьӀим, Йинчиыла гъайри.

²⁰ Гьанийды васи вас вацӀара: некягьӀ ад месис иянат маъ, дыкьыркьа мадаъ, дагулды маъ, мыхьчаӀбаӀс шигьидне лумабуз, дидды на нинды гьӀуьрмет хывакь.

²¹ – Зы хыных гедаахъуъ гьааса гьаъад и, – джываб вылцӀара тиние ГьӀасас.

²² Гьасара, гьадид ун йишийне, рухьура: – Вас са кар кам и. Вахда ад сиене масак выр, касибешис гетӀва гьаъ. Гьа гедеэне вы хӀале варлы йикиси. Хьели йиркьыр, Захда хъуна йирхьа.

²³ Амма тинийис гьаммыд ун йишийне, хаджалат руъура: гьа лап бала ад варлы йиъий.

²⁴ ГьӀасара, гьанийис хаджалат йишид гьагуйне, рухьура:

²⁵ – Шудаъ четин йиъиди гакъ варлына Йинчид ПагьӀчаалыгъа аӀчӀус! Деве рубадаа хьуъ сивигас рагьӀат йиъи, варлы Аллагьад ПагьӀчаалыгъа аӀчӀусдыхъаъ.

²⁶ – Бес гьааса иди, гьалдаа азад йикис руъура? – хулкара хъадабцудбише ГьӀасадаа.

²⁷ – Илсанашдаа ляджагъӀудбыйды Аллагьадаа лягъӀуре, – джываб хъывылцӀара ГьӀасара.

²⁸ – Е, хьуйне, яхда аддухъундыбыр сатыр, выды джыбра диъи, – рухьура гьа гедеэне Петрара.

²⁹ – Дуьзене рухьура ваӀде, – хьури ГьӀасара, – гьӀар – хал, я къари, я шубаӀ, я дид-нин, я хынимер – Аллагьад ПагьӀчаалыгъ бадаана сатыднийис

³⁰ мибыйды девире гьадыхъаъ бала выси, мирджедбыйды девире – ладжваалтӀвад гьӀуьмир.

ГьӀасара маа выдж йикьидиклаа ихтилат гьаъара

³¹ ЦӀыкьӀвар са суруу сес выъыр, ГьӀасара рухьура гьабишде: – Гьамыъ йаӀ-ваӀ Иерусалимди диъина а, гьади пайгъампараше илсанашды Духарыклаа кихьир адухъундыбыр кьулуу йыкьаси.

³² Гьа кафирешды хыле выси, Гьанийклаа иянатбыр гьаъаси, себыр гьаъаси Гьанийхда, Гьанийыы ту лаъаси,

³³ гъивхьиси Гьанийс, хьели йикье гьаъаси. Амма хьибыдхьусды йыгъа Гьа сыраа лухъузаси.

³⁴ Гьабыр амма Гьанийды чӀилмыхьде гедкьырдиш. Гьанийды чӀилмыд натыдже гьабишис ачых виширдиш, шивди ГьӀасара гьухьуд, – гьабыр гедкьырдиш.

ГьӀасара быркьӀыд хъаъара

³⁵ ГьӀаса Иерусалимдиди лийкьад гедеэне, рыкъӀыде са быркьӀ гий, кирхьара ад.

³⁶ Бейдаа хьуъ илсанашды кӀабал виъид ун йишир, гьанийе хулкара, шивди гьыъыр ад.

³⁷ Гьанийде рухьура: «Гьа бейдаа хьуъ йиъид Назарый ГьӀаса йиъи» хьур.

³⁸ Гьа лал ваъара кугъӀуре: – ГьӀаса, Давыдды дух, захда язухъ гьаъ!

³⁹ Хьура гидбыр гьа гиихье гьаъас чалыш дишинире, руъурдиш. Тиние маабыйды гъигъене рухьура: – Давыдды дух, захда язухъ гьаъ!

⁴⁰ ГьӀасара, лузур, быркьӀыд бегеде сес ваъара. Бегеде йиркьыйне, ГьӀасара хулкара быркьӀадаа:

⁴¹ – Шиви За вы бадаана гьыъыр йигад? Вас шиви йигад? – Илагьи, маа гьагус! – рухьура тиние.

⁴² – Вас гьагуси маа! Вас выды инаамишваӀликлаа куьмег йишир а, – рухьура ГьӀасара.

⁴³ БыркьӀынийис гьади мадана гьахъабгура, хьели гьа ки ГьӀасад джыбра хъуна руъура, Йинчихьде шукур ваъара. Гьа гвалах гьувгуд сиенебише Йинчихьде шукур ваъара, Гьанийды гьӀайбатаа гьӀаламат гьаъара.