Лукара йибкьыд Шадды Хабар 17 - Лукаады Шадды Хабар

АгьӀдиет диш!

¹ Джуды шагырташде ГьӀасара рухьура: – Аа сыджыдхӀыр йикисдиш, амма себеб вишинийды диван ваъаси!

² Гьаасад гьалысна джацӀад на ад джыгаа джацӀад эдеми гунаадыы гьеч силгад име?! Нагагь гардана дынгы-хаталад духул ивир дангызаа хаагъурийди гьанийс рагъӀат йиъий!

³ – Гадакъ, АгьӀдиет диш! Нагагь выды шура нагьакьды гвалах выъыхьвна, къӀывыхӀбыр гьаъ гьанийхда. Нагагь гьание вадаа «хыл лювуш!» гьухьухьна, багъышлемиш гьаъ.

⁴ Нагагь гьа са йыгьа йыва нагьакь йишир, йыва бегеде хъиркьыхьвна, выдж «икьрар йиъи» гьухьухьвна, багъышлемиш гьаъ.

Дин

⁵ – Ихьды инаамишвалды бала ваъ – рухьура шагырташе Илагьиеде.

⁶ – Нагагь ваӀ са сук духъунды инаамишвалды адбыр диъинехъун йикӀе, – рухьура Илагьиере, – ваӀ гьеми хукада гьухьухьвна: «Угъубкьа ва вы гъваб ки хъуна, хьели дейрагьак кивирше» – гьа ваӀс икьрар викиси.

⁷ ВаӀклаа гьалыхда-га ай-га йидзан ваъад я хӀыб ухӀуд къул. Ва гьанийде, гьа хуйяа хъиркьыйне «КӀыбди аа сукьа улесды улес» – гьухьусиме?

⁸ Бес ва гьанийде гьухьусдишме: «Зас улесды гьыъыр, цухьрудыы сихьяъ, хьели кьулухълаа лаъ луза за улемаа не рагъамаа, хьели, сукьур, вас ки уле!»

⁹ Ва къулас сагъулбыр гьаъара сукьусдиш эхир, гьание джу джуды гвалах лазим йиъид кал выъыри хьур.

¹⁰ ВаӀ ки гьааса: ваӀ гьыъыр йигад гвалахбыр гьыъыйне, ваӀ ки гьихьяъ: «Е къул духъунды кар и, – е ихьды гвалах виъи выъыр ад».

ЙицӀыр джузанды

¹¹ ГьӀаса, Иерусалимдыхдана йиъине, Самариядид не Галилеядид саргьӀатаала тиниъ йиъина ай.

¹² Сада, Гьа мукъӀа аӀбчӀуд вахтинди, Гьанийды рыкъӀаӀ гыдылхӀаре йицӀыр джузанды. Хырыда кал луьздуьр,

¹³ гьабише лал ваъара: – ГьӀаса Тербие вылцӀад! Яхда язухь гьаъ!

¹⁴ ГьӀасара, гакъыр, рухьура: – Дырых, дибирешде гахъадкъас вияъ! Тимбыр ки дуруъура, рыкъӀаӀ, диъине ад джигиди, темиз хъӀудире.

¹⁵ Гьабишиклаа са, хъишид гьагуйне, хъургъур, гъигъене Йинчихьде шукур ваъара,

¹⁶ ГьӀасад гъилаба ирхьур, сагъулбыр гьаъара. Гьа йиъий самаришура.

¹⁷ – Бес йицӀырси темиз хъидширдишме? – хулкара ГьӀасара. – Мадды гьучӀур гьили гьаадхӀыри?

¹⁸ Бес секки хъидкьырдишме Йинчихьде шукур ваъас, са ми вырды элдиклаадынийыыла гъайри? –

¹⁹ Хьели гьанийде рухьура ГьӀасара: – Луза, рых, вы выды инаамишваӀлире азад гьыъыр а.

Аллагьад ПагьӀчаалыгъвалды мыс выкьаси

²⁰ Фарисейеше ГьӀасадаа хулкара, мыс выкьасди Аллагьад ПагьӀчаалыгъ. – Аллагьад ПагьӀчаалыгъ ливкьыйне, гьа гьувгас вуруъуд диш, – джываб хъывылцӀара ГьӀасара гьабишис. –

²¹ Гьухьусдиш: «Мидиъ гакъ, гьа миди а», хьур, я «Ми гьавай!» хьур. Аллагьад ПагьӀчаалыгь гьамыъ ки выхьды арыди а,

²² Джуды шагырташде ГьӀасара рухьура: – Йыкьаси йыгъ, ваӀ илсанашды Духарды са йыгъ хъыгаӀдий рухьуд, Амма гьахъагусдиш.

²³ ВаӀде гьухьуси: «Мидиъ гадакъ» я «Тиниъ гадакъ!» Ледчир, хъимедурухь.

²⁴ ЦӀай рапыр, сиене хӀал ми суруула ти суруу йыкьамаа йаӀкв ибхьуд кал, – гьаасад йикиси илсанашды Дух выдж хъиркьыд йыгъа!

²⁵ Амма суьхьде гьанийис балад гьӀазабыр йикиси, ми къафлыдид илсанаше ки гьӀасаба гьаъасдиш.

²⁶ Шууна йиъийди НухӀды вахтинди, Гьааса йикиси илсанашды Духарды йыгъырма ки:

²⁷ илсанаше улере, рагъара, выгглис дуруъура, къари раъара ай таа ки НухӀ гемиди аӀбчӀуд вахтиндыы йыкьамаа, хьели либхьура хьед – сиене дыкьыркьара.

²⁸ Гьааса йиъий Лотды вахтинди ки: улере, рагъара, вылцӀара, лаӀбшура, езере, гьаъара ай,

²⁹ амма Лота Содом сабтыд йыгъа накьудыы цӀай на сер саӀбчӀура – сиене ки дыкьыркьара.

³⁰ Маа йикиси гьааса Илсанашды Духара выдж гьагва гьыъыд йыгъа ки

³¹ Выдж хылаа йишир, карбыр хала адгыдбыйды саъ саӀхъӀмаӀбучӀухь «гьабыр лаӀхъӀашус» хьур Хуйе адбыйды хъумаругъ!

³² Лотды къари йикӀыы харакь! Джу джуды гьӀуьмир азад ваъас хьуднийе гьадид кьулис ваъаси.

³³ Выдж джуды кьулид дерде джишидбыйды азад йикиси.

³⁴ Дуьзене рухьура ваӀде, гьа выше кьӀвар са месе дикиси – са гыргаси, са аргаси;

^35-36 кьӀвар хьыдылды са рухӀа дикиси – са лаӀршуси, са сартаси. Гьа гедеэне шагырташе хулкара ГьанийдааӀ:

³⁷ – Гьили кал йикиси гьа, Илагьи? – Къаджирмар джандакаа ягъмиш йикиси, – рухьура ГьӀасара.