Лукара йибкьыд Шадды Хабар 16 - Лукаады Шадды Хабар

«Секки нукарадаа йикисдиш кьӀвар иесси сакална хъыдгас»

¹ Джуды шагырташде ГьӀасара рухьура: – Са варлы эдемияхда ай къулашды кьухьды. Ми эдемияа хабарбыр леркьара, къулашды кьухьние джуды мал дагул гьаъара хьур.

² Сес выъыр, ми эдемиере хулкара къулашды кьухьнийдаа: «Ми шыв унбыр йиъи зас ваклаа рыхӀыд? Кихьир кагъат, гьака зада, ва шууна, кабгъура айди, маа вада кьухьвалды за хъывысдиш».

³ Гьа гедеэне тиние рухьура джу джуда: «Гамыъ за шыв гъаъасдий? Иессиере зы ередаа гьаъара а. Бер йыхӀыс задаа йичӀеддиш, кирхьас йикисдиш.

⁴ Зас гьацӀара гьамыъ шыв гьаъасди! Хьели, миние зы гвалахаала ихъийихьвна, манние джус гвалах ваъас гыргаси».

⁵ Сес ваъара миние са-сана джуды иессиед бырдж кидбыр. Сахьуснийдаа хулкара: «Шыв бырджли йиъи изды иессиес?» –

⁶ «Веш дыкӀый хӀаредид», – рухьура тиние. «Ма хъума выды бырдж кид кагъат, – рухьура гьанийде къулашды кьухьние, – аа сукьур, кӀыбди кихъихь „ХьуцӀцӀур“» хьур.

⁷ Тимбыйнийдаа хулкара: «Вы шудаъ бырджли йиъи?» – «Веш чивал кьирид» – рухьура тиние. «Ма хъума кагъат. Кихьяъ „МыйцӀыр“».

⁸ Иессиере йирзере дагулчи кьухьды, тиние гьакьаллы гвалах выъыри хьур. Йиъинеки, ми дуьнйадид илсанар джвершик кидикадбишихьванды гвалахмыс лап гьакьаллыер дуруъура, йаӀкваӀд хынимешихъаъ ки.

⁹ За ки ваӀде рухьура: ми чӀирид дуьнйадид шийибырмык хыдиймар даъас чалыш диш, хьеликана, вахӀде шийибыр мадишди, гьабише ваӀ эхиретдид хала адгъун бадаана.

¹⁰ Гьалыы цӀамды кардаа умуд гъади, гьанийыы балад кардаа ки умуд ваъас йикиси. Гьал цӀамдаа мыхьчаӀбыр гьаъаарди гъа кьухьдидаа ки умуд ваъас йикисды диш.

¹¹ Ваа дуьнйадид бына умуд ваъас джугъӀуд джигиди, гьакьды бына ваа гьал умуд ваъаси?

¹² Ваа вырды кар умуд ваъас джугъӀуд джигиди, гьал и вада выды высды?

¹³ Секки нукарадаа йикисдиш кьӀвар иесси сакална хъыдгас: са гьанийс хъыгара йикиси, са – кӀваӀчӀе; сынийдаа гьанийыы умуд ваъас йикиси, тимбыйды гьание гьӀасаба ки гьаъасдиш. ВаӀдаа ки садана кьӀунийс къуллух ваъас йикисдиш – Аллагъас ки, тангыдис ки!

Аллагьас йикӀе ад вацӀара

¹⁴ Гьа сиенемыд ун руъура фарисейешис, тангабыр хъыгад, – гьабише ГьӀасаа яхъӀбыр гьаъара кадгъӀуре.

¹⁵ Амма Миние рухьура гьабишде: – ВаӀс илсанашды улихьде миъминер не мисгинер кал гьадгва даъас йигара ваӀ, амма Аллагьас выхьды йикӀе ад вацӀара. Илсанашды арыди кьимет гъадбыйды мевт виъи Йинчид улихьде.

¹⁶ ЯхӀйе-пайгъампар руъумаа, ай са Къаанун на пайгъампарар. Гьадыыла хъуъ Аллагьад ПагьӀчаалыгъаклаа ихтилат гьаъара, сиенебише гьади дуруъус замгьӀат беъэре.

¹⁷ Амма хӀал не чӀир тарг йишин минкир виъи, Къаанундик кид са гьӀарф сугасдиш.

¹⁸ ГьӀар къариехьван кьатӀ хъишир, мадды хъараъадбыйды некягьӀахда хъаджацуд гьӀасаб йиъи. Сихъиргыдбыйды хъараъадние ки некягъӀ гьӀасаба джыъыдаа и.

Девлетли не Лазар

¹⁹ Ай сада пагьӀчаагьара кал валыг лаъад девлетли. ГьӀуьмир ки гьанийды мысгад байрам кал виъий.

²⁰ Са ки ай са кирхьаган, джан йиъидухъунды ниъидухбыр кид, – дур ки гьанийды Лазар йиъий. Гьа девлетлиед дарвазамыда лукур ай,

²¹ белки устӀулахьде тылыймашис хаабгъуд хьывад дилим джус ки сибхьуд хьур. Тылыймаше ки, руъура, минийды йыхӀынмыс миз вылцӀарай.

²² Хьели ми кирхьаган йикьире, малаикмаше ки гыргара гьа дженнетди, сабгъура йыхды джигиди, Ибрайим-пайгъампарад бегеде. Ти девлетли ки йикьире. Килхьере гьа.

²³ Джегъеллемдаа, мыкьлад зулумаа, улабыр хӀале гакъыд, гьанийс хырыдаа Ибрайим-пайгъампар гьабгура, бегеде ки Лазар хана.

²⁴ Девлетлиере лал ваъара: «Гьай Дид, гьай Ибрайим-пайгъампар! Захда язухъ гьаъ, Лазар сигаъ, тӀилиед ухьун хьидик кыхӀыр, изды букӀамыхда хъӀывхӀыхь. Шууды гьӀазаб а зас ми цӀе!»

²⁵ Амма Ибрайим-пайгъампарара рухьура: «ЙикӀыы хъыгаъ, джан дух, вас дуьнйадыы ешемиш руъуди сиене йыхды агыр ай, Лазарыс – сиене писды. Гьамыъ гьанийис миди рагьӀат йишир а, вас – четин.

²⁶ Гьадыыла савайинди, ихьды арыди кьиямат мамзил а: гьалыс-га мидаа тиниъ йыкьас йигара йиширки, йикисдиш. Я гьадаа мидиъ яхда ки гьалдаана йыкьас йикисдиш».

²⁷ Девлетлиере маа рухьура: «Гьай Ибрайим-пайгъампар иди, Лазар изды дидды хала гьадаана сигаъ.

²⁸ Захда дуьнйадыы хьур шу мада. Лазара йыкьасды йыгъырмыд ихтилат гьыъыхь. Дишди гьабыр ки ми зулумбыр ад джигиди идхьуси».

²⁹ Ибрайим-пайгъампарара рухьура: «Гьабишихда Мыса-пайгъампар ки а, мадды пайгъампарар ки. Хъадацухь!»

³⁰ Гьание рухьура: «Ваъ, джан Ибрайим-пайгъампар, са йикьидаа, лухъузунийыы инаамиш дикиси гьабыр, хьели гьабише тууба гьаъаси».

³¹ Амма Ибрайим-пайгъампарара рухьура: «Гьабыр Мысахда на мадды пайгъампарашихда хъадждабцуд джигиди, сыраа лухъузунийыы ки инаамиш дикисдиш».