Лукара йибкьыд Шадды Хабар 14 - Лукаады Шадды Хабар

Фарисейед хала

¹ Сада кишды йыгъа ГьӀаса руъура гьанкьуудис са курдис гьацӀад фарисейяхда. Гьанийыы ул гъана выъыр ай.

² ГьӀасад къаншара сукьури са хьед гаагъӀуре ад эдеми.

³ ГьӀасара Диндид магьӀалимешдаа на фарисейешдаа хулкара: – Кишды йыгъа даваа ваъас ихтияр ама, адишме?

⁴ Тимбыр гиидилхьере.

⁵ ГьӀасара, лешур эзерли, хъыъыр, хала сихъилгара. Гьабишде, хьуйне, рухьура: – Выхьды гьалды-га дух я яц къуйе идхьухьна, ваӀ гьади мадана гьабыр гъаъ эхъетӀесдишме, гъаъ кишды йыгъ йиширки?

⁶ Тимбишдаа шешин хъухьус хъӀугъӀурдиш.

МийманваӀле йиркьыйне мыкьладкалды ера сукьа

⁷ ГьӀаса макъыет ий, гьал джус гьилды ер кеэвелъэре ади, хьели гьабишис ихтилат гьаъара:

⁸ – Нагагь вы туйек сес выъыхьна, йыхды ер кеэпӀес чалыш магъӀв, гьис хьуйне, минкир виъи иессияхда вахъаъ лаъ хъуд вышди йыкьаси.

⁹ Гьа гедеэне ваӀхӀде кьӀунисинийхда сес выъыд халды сагьӀиб меджбыр йикиси вада «Ми гьа ераа сагъв» гьухьус. Гьа гедеэне вы, рыхъӀ йишир, аа гид калды ераа сухъукьуныы сывхӀыси.

¹⁰ Аммане вы сес ваъади, вы йыхьыр, аа гид писды ераа сукьа. Хьели ваа дур сыхӀыд эдемиере гьухьуси вада: «Дуст, миди лаъ кал сукьа!» Гьа гедеэне мадды мийманашис ки выды къадри викиси.

¹¹ ГьӀар джу выдж лаъ гьаъадбыйды саъ йикиси, джу выдж саъ гьаъад – лаъ йикиси.

¹² Выдж хала сес выъыд фарисейде ГьӀасара рухьура: – Ва йаӀкваӀд я гьанкьуудид гъыъыр, мийманар сес ваъади, дур сымарыхӀ я хыдиймашыы, я шубаӀшыы, я бейдедбишыы, я варлы къумшийшыы. Гьис хьуйне, хьели гьабише джвер вы ки сес хъывыъыр, хатир кихъиидхьуси.

¹³ Мийманашис цухьра беземиш гьаъади, сес ваъ касибешихда, сур-хъӀырдыбишихда, бьӀркьӀыдбишихда на тӀыркьӀыдбишихда.

¹⁴ Гьа гедеэне вадаа шад йикис йикиси: гьабишдаа вас мыкьый хъаъас йикисдиш, гьадыыла уджагълиер сыраа луьхъуьздуьд йыгъа гьа кар выды хьура лузаси.

¹⁵ Гьа ихтилатад ун йишир, сабыйды мийманара рухьура ГьӀасада: – Йинчид ПагьӀчаалыгъа туйек йикисды бахтлы йиъи!

¹⁶ ГьӀасара хьуйне рухьура гьанийде: – Са эдемиере туй ваъара, балад мийманар сес ваъара ай.

¹⁷ УстӀулахда сыкьӀысды вахт йибкьыйне, гьание силгара къул, мийманашде гьухьус: «Дыкьа, сиене мыс иди гьӀазыр и».

¹⁸ Сиенебыр кьул геэвере кадгъӀуре. Сахьусдыние рухьура гьанийде: «За хуй лешур а, зы чараасызна гьадыхда йыхьыр гакъыр йигара. Багъышлемиш гьаъ».

¹⁹ КьӀвархьусдыние рухьура: «За йицӀыб яц луьвшуьр а, гьаммыра шууна гвалах ваъарди, гьала гакъыр адиш. Багъышлемиш гьаъ».

²⁰ Хьибырхьусдыние рухьура: «За къари рыъыр а, гьадыыла йыкьас йикисдиш!»

²¹ Къул хъиркьыр, рухьура гьааса иессиеде. Тинийс хъӀал либкьыр, рухьура къулада: «КӀыбди рых шегьерди, кучимаа на эвирмаа касибер не, чӀудукуд-чӀиридбыр на, быркьӀыдбыр на, тӀыркьӀыдбыр хана хъикьа».

²² Къулара рухьура гьанийде: «За ва гьухьуд кал гъыъыр а, амма гьала ербыр мада».

²³ Хьели иессиере рухьура къулада: «Рых рыкъӀмыда на масалмыда хадбыр ки сиене мидиъ сес ваъ. Изды хал мийманаше ацӀый.

²⁴ Амма ваӀде рухьура, суьхьде сес выъыдбишиклаа секки изды устӀулахда сукьусдиш!»

Шувна йикиси ГьӀасад мытагьӀлимне

²⁵ ГьӀасахьван йидкыри эккед илсанашды кӀабалбыр. Ругъур, Гьание рухьура мибишде:

²⁶ – Зы джуды дидыхъаъ, ниныхъаъ, къариехъаъ, хынимешихъаъ, шубаӀшихъаъ, ришиймашихъаъ, джуды гьӀумирдихъаъ балана хъыджыганийдаа, Зас мутагьӀлим йикисдиш.

²⁷ Джу джуды чӀир чӀеджеркӀванийдаа, Изды джыбра джугъӀунийклаа Изды мутагьӀлим йикисдиш.

²⁸ Нагагь ваӀклаа гьалыс-га тӀуьнтӀуьй лувза ваъас йиганахъун, гьание суьхьде сукьур йикисды харджибыр кьыле гьаъасдишме, «шийибыр гъийкъасиме» хьур гакъара?

²⁹ Дишди гедеэне, къандах йывхӀыр, бин гихьийне гвалах лаабтӀва ваъас йикисдиш. Хьели гьанийыы яхъӀ лагъуси,

³⁰ рухьура: «Мигьай, бин гихьир, бегьем гьаъас джишид!»

³¹ ПагьӀчаагьара ки, мадды пагьӀчаагьахьван дагьӀви ваъас гъилыы гъад гедеэне, суьхьде сукьур фикир вьыъын лазим и, «йикисимихъ джудаа йицӀыд гьагъзыр эскер хана къаад гьагъзыр эскер хад пагьӀчаагьахьван дагьӀви кеэпӀес» хьур.

³² Джикиснехъун, сидигыр векилер, гъехълебеси.

³³ Гьааса ваӀ ки диъи: вахӀде шыв ади ки хьуъ хаджаабгъумаа ваӀдаа Изды мутагьӀлимер дикис йикисдиш.

³⁴ Кьел йыхды кар виъи, амма кьел кьилирды дад кидне аджабгыхьвна, шыв каъаси хабыйек?

³⁵ Гьа гедеэне гьа гьидисне лазим хъӀувгъӀурдиш, гьадидаа накьв гъӀана ваъас ки йикисдиш. Гьа кьӀаарды хьуъ лывъара! Убрабыр кинийис ун йикий!