Лукара йибкьыд Шадды Хабар 12 - Лукаады Шадды Хабар

Гьидыыла гичӀ хывкьасди

¹ Гьа арыди ягъмиш дуруъура илсанар гьагъзырмыхьван, кӀабала сыние са йикьире ай. ГьӀаса суьхьде джуды мутагьӀлимешихьван гьалгара: – Фарисейешды тӀылымыыла агьӀдиет диш, десмалчиваӀлиыла!

² Са дагулды адиш Ашгара джикисды, са сир адиш, гъаъ лиджидхьусды.

³ ВаӀ мычӀахъваӀле гьухьудбыйды йыгъад йаӀкваӀ гъаъ лидхьуси, ваӀ архыйинды джигиди выъыд хьуш-хьуш хылымырмыыла лал ваъаси.

⁴ Рухьура а ваӀде, хыдиймар, беден йикье гьаъас руъунийыыла гимийичӀ, хьели гьанийдаа шыв-га хъаъас йичӀесдиш.

⁵ За гьагваъаси, гъалыыла гичӀ выъыр йигаарди: йикье гьыъыр, джегьеллемди сидигас руъуднийыыла гичӀ ваъ. Рухьура ваӀде, гьалыыла гичӀ ваъасди!

⁶ Бес хьуб ишкӀил кьӀунды чат кепекес дишме масак вылцӀад? Амма Йинчис гьаммыклаа секки йикӀыыла убхур адиш.

⁷ Выхьды хьуйне кьулуу гъадухъунды чӀарбыр ки кьыле гьыъыр а. ГичӀ мываъ! ВаӀ сиене ишкӀилмыхъаъ багьа диъи!

⁸ За рухьура ваӀде: Зы сиене илсанашды улихьде ачыхана агъмиш гьаъадбыйды малаикмыд улихьде Илсанашды Духара ки агъмиш гьаъаси.

⁹ Гьал Зы агъмиш джыъырды илсанашды улихьде, гьабыйды Аллагьад малаикмашды улихьде Илсанашды Духара ки агъмиш гьаъасдиш.

¹⁰ Гьал-га Илсанашды Духарыхда фитне выъыхьвна, гьанийс багъыш йикиси, амма гьалга Илагьиед РухӀуклаа иянатбыр гьыъыхьвна, гьанийс багъыш адиш.

¹¹ ВаӀ хьура гедир синагогама, кьухьдыбишихда на яхӀ адбишихда йидкьыйне, Фикир мываъ, ваӀ шыв гьаъасди не шыв гьухьусди.

¹² Илагьиед РухӀдире гьухьуси ваӀде шыв гьаъасди.

Камды варлыеклаады ихтилат

¹³ Илсанашды кӀабалаклаа сыние рухьура ГьӀасада: – МагьӀалим, гьихьяъ-мын изды шуда, захьван дидыыла хъуъ гедгыд мал гвал гьаъ хьур!

¹⁴ – Убур хъацв! Гьал йиъи Зас ихтияр выр ад выхьды диван ваъас, выхьды хъӀал-багьӀсбыр арыди хъыгас? – джываб вылцӀара ГьӀасара. –

¹⁵ Гадакъ, невсаала агьӀдиет диш – илсанашды гьӀумир ад-ахъынваӀлиылаа асыллы диш, гьанийхда сиене кар анахъунки, – рухьура ГьӀасара илсанашде. – Къаних мадугъӀ!

¹⁶ Хьели Гьание илсанашис мисед ихтилат гьаъара:

¹⁷ – Са девлетлиед хуйима йыхды еш руъура. «Гьамыъ шыв гьаъасдихь? – рухьура девлетлиере. – Захда еш сихьисды ер адиш».

¹⁸ Гьа гедеэне гьание рухьура:

¹⁹ «Гьамыъ за сиене изды мыхӀыдбыр на гъӀанды халбыр лука хъыъыр, кьухьдыбыр сихъихьиси, хьели сиене магьӀсил гьамма сихьиси. Хьели „гьамыъ захда ад девлет балад сыдырма гъивкьаси зас“ хьур, „уле, рагъ, лука, гьӀумир сивига“ рухьура сукьуси».

²⁰ Амма Йинчире гьанийде рухьура: «Лулум! ГъӀанахӀан выды ил лешус дыкьаси. Гьалыс адгаси ва хихьибыр?»

²¹ Гьааса йикиси сиене девлет джвер бадаана хивилхьедбишис, Аллагь бадаана хидживхьир.

Йинчыы инаамиш диш!

²² Джуды шагырташде ГьӀасара рухьура: – Гьадыыла йиъи За ваӀде рухьуд: ваӀс «ешемиш дикис улесды на валыг йигара» хьур дерде мадугъӀ.

²³ ГьӀумир ухьнихъаъ хьура виъи, беден валгыхъаъ багьа йиъи.

²⁴ Гадакъ хъӀадешихда: Я езеэрдиш, я еш гъаъаардиш, адиш гьаммыхда я мыхӀыдбыр, я гъӀанды халбыр, Амма Йинчире гьаммыс кывылцӀара а. ВаӀ шуркумашыхъаъ багьа диъи!

²⁵ Гьалдаа и ваӀклаа, шудаъ чалыш диширдики, джуды гьӀуьмир са сагьӀатаа ки хӀуляхӀа ваъас йикисды?

²⁶ Йидж гьадухъун цӀамды кар ки ваӀдаа лаӀджаӀбчӀуди, Маддымыд дерде аӀчӀур шиви гьаъасды?

²⁷ Гадакъ, шууна лилкьара ади бычӀбыр: гьаммыра я ылхӀаардиш, я тӀулкаардиш. Амма рухьура ваӀде, Силиймандаа, шудаа ад-ахъыд йиширдики, йиггад бычӀире кал валыг лаъас руъурдиш.

²⁸ Майданаа гъад бычӀыы, гъиигъа ад, быгаа лахак кихьисды, Йинчире гьааса лаъанахъун, ваӀа ки лаъаси, гьай инаамиш джудгъӀудбыр!

²⁹ Хумалук ваӀ ваӀдаа, шыв улесди, шыв рагъасди, гьадид дерде ки амадугъӀ.

³⁰ Гьа ми дуьнйадид сиене кафирешды фикир виъи. Амма выхьды Дидис гьацӀара, ваӀс гьа сиене лазимды.

³¹ Са кардид дерде эдиъ – Гьанийды ПагьӀчаалыгъад, мадды сиене Гьание Джу гьадиде ара хихьир выси.

³² ГимийичӀ, гьай кӀыъды нехир! Йинчид васи гьа виъи – ваӀс ПагьӀчаалыгъ пешкеш ваъасды.

³³ Масак вияъ ваӀхӀде ад-ахъыд, куьмег гъаъ касибешис, ваӀ ваӀс ладжаабтӀуд кудкунбыр гьаъ, хӀале ладжваалтӀвад девлет хивихь, – гьили я сырыхчи лийкьаардиш, я йисирире улеэрдиш.

³⁴ Гьис хьуйне, гьили выхьды девлет ади, гьади выхьды йикӀ ки йикиси.

³⁵ Мыс-га гьӀазырана сыкьӀа: выхьды валгыма чӀил ки ибтӀир а, выхьды пӀинтӀийбыр ки ликӀур а.

Гъил уьзенге йиший!

³⁶ Даватаклаа хъикьасды иесси гуьзет гьаъадбыр кал дикихь ваӀ: гьание рак йыхӀыр мадана аъасна.

³⁷ Бахтлыер диъи къулар, нагагь гьабыр хъиркьыд иессиеде мыс-га саджадхыр адылганахъун. Дуьзене рухьура ваӀде, гьание джу валыг лыъыр, улесды цухьрудыы сихьир, гьабыр улес аа садгъуси.

³⁸ Бахтлыер диъи гьабыр, нагагь гьанийде садхыр адждылганахъун, гьилды сагьӀатаа выдж хъиркьырдики: выше ма йыгъа.

³⁹ ГьацӀара йиш, халды иессиес гьацӀарайди, мыс сырыхчи йыкьасди, гьание сырыхчи хала аӀчӀус джикисне гъаъасий.

⁴⁰ Мыс-га гьӀазырана сыдкьӀаӀ: илсанашды Дух ваӀ гуьзет джаъад гедеэне хъикьаси.

Къийимды на къийимсызды къул

⁴¹ – Илагьи, ва гьа ихтилат са е бадаана гьаъад име, дишди сиенебыр бадаана? – хулкара гьанийдаа Петрара.

⁴² ГьӀасара рухьура: – ВаӀ гьакьаллы, умуд ваъасды эдеми гьӀасаб дикий, сиене къулашды кьухьдына садгъус йикисды иессиедаа, лазимды вахтинди гъахьун-гъара гъаъ выс умуд ваъас йикисды.

⁴³ Бахтлы йиъи къул, иессиеде, хъиркьыйне, гвалахак кине ахъылгад.

⁴⁴ Дуъзене ваӀде рухьура, гьание гьаасанийды хылихьде сиене джуды миче, джуды ад-ахъыд выси.

⁴⁵ Нагагь гуьре къулара гьухьухьна йикӀиклаана: «Гьамыъ кӀыбди хъикьасдиш иесси», – къулар на къаривышер детере каӀчӀухьна, улере, рагъара, гьулхъара йишихьвна,

⁴⁶ гьа къулад иесси хъикьаси джу елли гуьзет джаъад гедеэне, джу фикир джаваъад сагьӀатаа. Хьели, йетир къул, иесси елли умуд гъадишнийхьван кал гьалгаси.

⁴⁷ Иессиед васи вацӀара, гьа кьуле джывгади – ятал агаси.

⁴⁸ Нагагь къулас джавацӀанахъун васи, гьадыыла гьание ятал агасды гвалах выъыхьвна, гьанийс ятал цӀам йикиси. Гьалыс бала выр ади, гьанийдаа бала худкаси, гьалыы бала умуд гъади, гьанийдаа бала ягъӀаси.

ГьӀасара илсанашды арыди джуравалды ваъара

⁴⁹ ЦӀай хана йиркьыд и Зы накьудыы, шудаъ Зас гьа ликӀур йигара!

⁵⁰ ТӀагьаратахьван темиз йишин лазим и Зы, ул гивхьир а За гьа кьуле йидкьынихда! ВаӀс Зы дуьнйадис эслагьӀвалды хана йиркьыр ад калагуриме?

⁵¹ Ваъ, – рухьура За. – Джуравалды!

⁵² Мидыыла хъуъ, хала хьур анахъун, гьабыр джура дикиси: хьибыр са суруу, кьӀвар са суруу дикиси, мибыр тимбишихьван ута уьздеси.

⁵³ Дид духарыхьван гъеблесдиш, дух дидыхьван гъеблесдиш, нин рышехьван гъеблесдиш, гаӀнин сусухьван гъеблесдиш, сус гаӀниныхьван гъеблесдиш.

Мизан

⁵⁴ Элдиде рухьура ГьӀасара: – ВаӀс виригъ хӀуувгъӀуд суруула гыбыл йидкьыр гьагухьна, ваӀ гьади мадана йихьяъ «гьугъаси» хьур, гьааса руъура.

⁵⁵ Арандаабый хьыбыл либхьуйне, ваӀ гьихьяъ «сиггаси», гьааса йикиси.

⁵⁶ Десмалчиер! ЧӀирыхда на хӀалыхда гадкъара, ваӀдаа шууды гьаваа викисди гьухьус руъуд, шууды мизан йибкьыр ади мегем ваӀ гедыркьаардишме?

⁵⁷ ВаӀдаа ваӀс шыв йыха иди кеэтӀес руъурдишме?

⁵⁸ Месела, вак бырдж кид бырджехъанара вы диван ваъас хъӀыджыркыхьвна, ва сиене лягъӀуд гвалах выъыр йигара, гьанийхьван рыкъӀа гъехълебесне, дишди гьание вы гыргаси диванханыди. Гьадаа вы дустах гьаъаси.

⁵⁹ Дуьзене рухьура, гьадаа гъаъ вадаа са шийи кимабадухъунды гемаа хъикьас йикисдиш.