Лукара йибкьыд Шадды Хабар 10 - Лукаады Шадды Хабар

«Еш бала и, ладжбарар адиш»

¹ Хьели Гьание ягъмиш дыъыр маа йийцӀыр на кьӀваӀр шагырт, кьӀо-кьӀоне сидилгара гьабыр сиене шегьерма на мукъӀма, джуды улихьде, Выдж руъус гъилыы гъадухъунды джигима.

² Гьание рухьура гьабишде: – Еш бала и, ладжбарар адиш. Бес гьихьяъ ешилды Иессиеде, Ешиле маа ладжбарар сихъидгыхь!

³ Дырых! Гадакъ. За ваӀ гелер ублешды нехирдик кал сидиргара а.

⁴ ЛаӀмаӀбуш я кудкун, я хваб, я гъилыыдыбыр, я гьалысна салам рыкъӀа мылвыцӀ.

⁵ Гьалды-га хала дыхьыйне, суьхьде йихьяъ: «Ассаламу гьӀалейкум!»

⁶ Нагагь гьади салам выс лейихды эдеми анахъун, выхьды салам гьанийхьван абгаси, диш – хъувургъур, ваӀхӀде хъивикьаси.

⁷ Гьа хала сыкьӀаӀ, уле, рагъ, гьабишихда шыв ади ки. Гьис хьуйне, ладжбарас кире вын лазим и. Халаа хала мадугъӀ.

⁸ Нагагь ваӀ гьилды-га шегьерди йидкьыр анахъун, гьади ваӀ кьабыл дыъыр анахъун, уле ваӀс выдбыйды,

⁹ хъадаъ гъабишды гьӀузир кидбыр, гьихьяъ: «Йинчид ПагьӀчаалыгъ бейде виъи!»

¹⁰ Нагагь ваӀ йидкьыр шегьерди, гьади ваӀ кьабыл джыдыъыхьвна, гьадид шееримаа хьуъ дырых, рухьура:

¹¹ «Выхьды шегьердаа ихьды гъилабак киджидхъыд руг ки кине ваӀде суда хъыъыр хъывылцӀара. Амма гьацӀ: Йинчид ПагьӀчаалыгъ бегеде виъи!»

¹² Рухьура ваӀде, гьа Йыгъа Содомдис рагьӀат йикиси ми шегьердыхъаъ!

¹³ Хаджалат вас, Хоразин! Хаджалат вас, Вифсаида! Тирди не Сидонди Выхьды джигиди йишид калды йиширий гьӀаламатбыр Гьабише мысъиди, батӀалма на рыхъӀа аӀчӀур, ГьӀумир кывырхӀа ваъасий,

¹⁴ Гьадыыла Эхир-Кьияматас Тирес не Сидондис ваӀхъӀаъ рагьӀат йикиси!

¹⁵ Ва ки, Капернаум, вы вирзед хьур фикир ваъарама? Вы джегьеллемди ывхӀыси!

¹⁶ – ВаӀхӀде хъабцудбыйды Захда хъабцуд гьӀасаб и, ВаӀ гъӀасаба джыдыъыдбише Зы гьӀасаба джаъадаана и. Зы гьӀасаба джаъание Аллагь гьӀасаба джаъадаана и.

¹⁷ ЙийцӀыр на кьӀваӀр шагырт хъуьдуьргъуьр хъӀудире, шадна. – Илагьи, – рухьура гьабише, – е Выды дур хакьыр бииругъ гьыъыйне, иблисмар ки кине ес икьрар руъурай!

¹⁸ – Зас гьагур ай, Иблис ХӀаляа цӀай рапыд кал саъ либхьур ай, – рухьура ГьӀасара. –

¹⁹ Гьагварама За ваӀде выр а яхӀ ггарашыы на акьрабмыы мыкӀ сывхӀыйнеки, душманашихьван ара йыдхӀыйнеки – гьидирене ваӀс зарар джывысды.

²⁰ Амма ваӀ иблисмар ваӀс икьрар руъура хьур шад мадугъӀ, выхьды дурубыр хӀалик кихьир а хьур шад диш.

²¹ Гьааса гьухьур мадана Илагьиед РухӀ аӀчӀури ГьӀасад ЙикӀе. Гьание рухьура: – Дид, хӀалды на чӀирид Иесси! Гьакьаллыдбишыыла дагулды Ва кьул кьухьваӀлик кидишдыбишис не кӀаъдыбишис ачых гьыъыдыхъаъ Вас аферин! Ий, Дид, гьаасад виъий выды йыхды ихтияр!

²² Изды Диде сиенедид ихтияр Зада выр а, Гьалысна гьацӀаардиш Дид, духарыыла гъайри, Са ки Духара ачых гьаъадбишыыла гъайри.

²³ Хьели, ругъур мутагьӀлимешихда. ГьӀасара са гьабишде рухьура: – Шадамерд йишин лазим и улабыр, ваӀс гьагудбыйды гьагуйне.

²⁴ Инаамиш диш Заа, балад пайгъампарашис не пагьӀчаагьашис ваӀс гьабгудбыйды гьагур йигара ай, йидж гьагурдиш, ваӀс ун адбыйдыдид ун йишир йигара ай, йидж ун хъӀыхӀырдиш.

Йихды самаритяныкляады ихтилат

²⁵ Ай гьади са Диндид магьӀалим, гьание ГьӀасад амзыр гьаъас хьур, рухьура Гьанийде, лаъ лузур: – МагьӀалим, за шыв гьыъыр йигара, таабатаа йыкьамаъ ешемиш йикис агын бадаана?

²⁶ – Шыв киниъи гьадиклаа Диндид Дахьвтарак? – хулкара гьанийдаа ГьӀасара. – Шыв кьыле гьаъара ва гьадаа?

²⁷ – «Хъыгара йиш йикӀидаана выды Илагьи, сиене джандаа, сиене кьууветехьван, сиене выды фикирмыхьван». Са ки «выды бейде хад хъыгара йиш вас вы кал», – рухьура тиние.

²⁸ – Ва дуьзене джываб хъывыри, – рухьура ГьӀасара. – Гьааса гьаъ – вы мыс-га ешемиш йикиси.

²⁹ Тиние хьуйне, выдж ГьӀасад улихьде темиз хъаъас хьур, хулкара ГьӀасадаа: – Изды бейде хад выши?

³⁰ ГьӀасара джываб рухьура: – Йиъина ай эдеми Иерусалимдаа Иерихонди, хьели ылхӀаре гьа хъачахашды хыле. Мибише гьа етир, хадбыр ки хӀаашур, хъӀудире, йикьисды гьӀаляа гъана ми гетыр.

³¹ Гьааса руъура, гьеми рыкъӀаа хьуъ йиъина ай дибир, амма ми гъариб гьагур, рыкъӀыд ти суруу гаагъӀуре.

³² Гьааса гьаъара левите ки: гьа джигиди лийкьыр, яраллы гьагур, ти суруу аӀгъӀабчӀура.

³³ Самаритянара, хьуйне, гьа рыкъӀа ад, бегеде йыхьыр, гьагур, гьӀаюхь гьаъара,

³⁴ уула хьура руъура тинийды, йыхӀынбыр темиз гьыъыр чахырахьван, гьаммыс хӀаред йыхӀыр, йитӀе гьаъара. Хьели джуды къатираа лагъур, гыргара мийманханади. Гьади ки гьанийды аӀйлуьг гьаъара, инсаф выъыр.

³⁵ Джыбра хъуд йыгъа, выдж хъӀугъӀуди, вылцӀара гьание мийманханыдид иессиеде кьӀваб манут, рухьура: «Дерде ийиъ гьанийды, нагагь ва миммыхъаъ баладбыр хардж гьыъыхьвна, хъиъиди за вада хъывыси».

³⁶ Хьибнийиклаа гьилды руъура, выды чӀилмыхьван, хъачахаше йыгъ йыгынийис бейде?

³⁷ – РагьӀим выъыдбыйды, – рухьура тиние. – Рых, ва ки гьааса гъаъ, – рухьура ГьӀасара.

ГьӀаса Марфахда на Майрамыхда йыхьыр а

³⁸ РыкъӀа аӀхъӀачӀур, ГьӀаса мутагьӀлимер ки хъуна руъура са мукъӀа.

³⁹ Гьади Гьа джуды хала сес ваъара са «Марфа» хьур хьыдыние. Гьанийихда ай «Майрам» хьур риши. Гьа, ГьӀасад гъилябада суркьур, хъарабцура ай Гьанийды чӀилмыхда.

⁴⁰ Марфа хьуйне, улесды-рагъасды гьӀазыр гьаъара, телесых риъий. Гьание бегеде йиркьыр, рухьура: – Гьай Иесси, вас ришире сиене гвалахбыр заа лийир ад гьабгурдишме? Гьанийде зас куьмег гьаъ хьур гьис джурухьуд?

⁴¹ – Гьай Марфа, гьай Марфа, – рухьура гьанийде ГьӀасара, – вы баладмыд дерде а, аа суджуркьур,

⁴² амма лазимды са кар йиъи. Майрама гьа ара кидбыйды кар кеэтӀир а, гьа гьалдаана гьанийдаа хӀаашус йикисдиш.