Лукара йибкьыд Шадды Хабар 1 - Лукаады Шадды Хабар

Лукара Феофилыс гьыъыд ихтилат

¹ Баладбыр чалыш дишир а ихьды арыди йишид кардымыклаа ихтилат хитӀес

² Ес гьа кардымыклаа гьацӀыри шийидешдаа на Илагьиед Гафдид къаривышешдаа,

³ гьадыыла за ки, гьӀурметли Феофил, вы бадаана кихьиси хъуд хъуна ихтилат, сиене хьураа хъуъ дуьз йиъиме гакъара,

⁴ вас хӀаӀр гьаъад чӀилмыы вы инаамиш йишин бадаана.

Малаикере ЯхӀйе-пайгъампар гьухусдикла Захариес ихтилат гьаъара

⁵ Иудеядид пагьӀчаа Иродды вахтинди ай са дибир, Захарие хьур дур гъад (гьа Гьавыйды нубытди йыгъбыр лийедбишиклаады йиъий). Гьанийхда ай къари – Елизавета хьур, Ааронды цихилдиклаады.

⁶ Гьабыр кьӀваӀрси Йинчид улихьде темизды илсанар, миъминер диъий, сиене Йинчид рахъӀбыр кьуле гыргара.

⁷ Амма гьабишихда хынимер адиший, – Елизаветас хынимер дишир диш, кьӀваӀрси гьамыъ кьӀаӀсе ки дишир ай.

⁸ Са хылис Захариере дугьӀабыр гихьийне (гьанийды нубат ий дугьӀа гилхьед), гьанийды

⁹ лыдж игъибкьыри, дибирешды арыди ивед, гъарсыд кар лирхьед джигидыы гьӀатирбыр ликӀва гьаъас. Гьа Йинчид Хала аӀчӀури,

¹⁰ мадды сиене халкь, гьание гьӀатирбыр саъад вахтинди гъаъна лувзур, дугьӀабыр кьыле гьаъара ай.

¹¹ Садахьурка гьувургара миниийс Илагьиед малаик: гьа гъарсыд кар лирхьед джигидид гьӀарче хылыы лувзур ай.

¹² Ми гьувгуйне Захарие лагь-магь йишири, гьанийс гичӀ вырыхӀыре.

¹³ Амма малаикере рухьура минийде: – ГичӀ мываъ, Захарие, Выды гилий ливкьыр а. Выды къари Елизаветара вас дух гьухуси, Ва гьанийыы «ЯхӀйе» хьур дур лихьиси.

¹⁴ Гьание вас эккед шадвалды выси, гьа гьухуныы баладбыр шад дикиси.

¹⁵ Гьис хьуйне, гьа Илагьиес кьухьана гьагуси, Гьидидне укӀ варагъасдиш: я чахырад, я хӀаӀнед. Илагьиед РухӀ йикиси гьанийхьван гьа гьухудыыла хъуъ.

¹⁶ Израилдид халкьдиклаа баладбыр гьание Йинчыы суьдке хъадаъаси, джухьды Иессияхда.

¹⁷ Гьа Илагьиед хьура гаӀчӀуси, Гьанийды джуш на яхӀ Ильяс-пайгъампарад каалдыбыр йикиси, Гьание дидабашды на духрешды йикӀбыр са-сынийхда ругъа хъаъаси, Гьание чӀирид рыкъӀаӀ адбыр миъминешды-мисгинешды рыкъӀа эхъедеси, Гьание халкь Илагьиед рыкъӀаӀ вуруъус гьӀазыр ваъаси.

¹⁸ – Зас гьа дуьздыбыр ид шууна гьацӀаси? – хулкара Захариере малаикедаа. – Зы кьӀаӀсе йиъи эхир, къари ки джигьил диш.

¹⁹ – Зы Джибриъил йиъи, зы Йинчид улихьде ги, – джываб хъывылцӀара гьанийс малаикере. – Гьание сигыд и зы вахьван гьалгас, вас шадды хабар ваъас.

²⁰ Вахт ливкьыйне йикиси за вада гьухьудбыйды. Амма вы изды чӀилмыы инаамиш джишидыыла лал йикиси таа ки за гьухьуд кар кьуле руъумаа.

²¹ Ми арыди гъаъна гид илсанаше Захарий гуьзет гьаъара ай, гьис гьание ыхьаӀ гьаъаарди геджедкьыр.

²² Хъиркьыри Захарие, амма гьалгаардиший. Илсанар гедкьыри, гьанийс Йинчид Халаа гьӀаламат хьура лакъыр ад. Гьание илсанашис хылабахьван ишаарабыр гьаъарай, выдж лална на бышене алгара.

²³ Джуды нубутдид вахт либхьуйне, Захарие хала хъӀугъӀуре.

²⁴ Бейдене гьанийды къари Елизавета ухьне каргъӀуре, сахьусды хьудды вазыра халаа елли гъаъ руръурдиш.

²⁵ «Ми зас Илагьиед куьмег йиъи, заала илсанашды гьӀайиб не чӀел саъ сехъепӀес хьур», – рухьурай гьание.

Майрамыс йибкьыд хабар

²⁶ Рыхьыдхьусды вазыра Йинчире сивиргара Джибриъил малаик Галилеядид шегьерди Назаретди

²⁷ «Йисухь» хьур дур гъад эдемиед лышан гъад рышахда. Гьа Йисухь Давыдды цихилдиклаады йиъий. Рышед дур Майрам йиъий.

²⁸ Минийхда йибкьыр, малаикере рухьура: – Изды салам вас, Йинчире кеэръир ад! Вас Йиниш!

²⁹ Рыш, лагь-магь ришир, фикир ваъара, мидид чӀилмыд натыдже шивди.

³⁰ Малаикере маа рухьура: – ГимийичӀ, Майрам! Вы Йинчис гирамиг ришир а.

³¹ Ва, ухьне курчӀур, дух гьухуси, Гьанийыы лихьиси ва дур ГьӀаса.

³² Гьа кьухьа йикиси, Гьанийхда «Аллагьад Дух йиъи» – гьухьуси. Илагьиере выси гьанийде джуды атабаба Давыдды тах

³³ Гьа мыс-га Якьубды цихилдид кьухьды йикиси, Гьанийды пагьӀчаалыгъахда кьадар викисдиш.

³⁴ Амма Майрама хулкара малаикедаа: – Руъуд име гьааса? Гьала зы выгглихьде гидиш!

³⁵ Малаикере рухьура: – Илагьиед РухӀ йыкьаси вахда, Йинчид гудж ливкьаси ваа, гьадыыла вас гьухуд хыных Уджагъли йикиси – Гьанийхда «Аллагьад Дух йиъи» – гьухьуси.

³⁶ Выды бейдед Елизавета йикӀыы хъырга; кьӀаӀсе риъинехъунки, гьа ухьне ки, рыхьды вазырды хыных ухьне а, амма гьанийхда «Хынимер джудгъӀуд риъи» – рухьурай.

³⁷ Йинчидаа джугъӀуд кар адиш.

³⁸ – Зы Илагьиед хылихьде ги, – рухьура Майрама. – Сиене ва гьухьуд кал йикий. Малаик ки хъӀаабхӀыри.

Майрам на Елизавета

³⁹ Бегедене мидыыла хъуъ Майрам телесыхана банымыд Иудеяди ад шегьерди руръура.

⁴⁰ Гьа Захариед хала йиркьыр, Елизаветас салам вылцӀара.

⁴¹ Елизаветас Майрама выд саламад ун йишийне, гьанийды ичияа гьанийды хыных силъэре, Елизаветаа Илагьиед РухӀ сибхьура.

⁴² Миние гъигъене рухьура: – Гьай сиене хьылешикляа бахт гъад! Илагьиере выды хынхыс рухсат вылцӀара!

⁴³ Зы шыв кар риъи, захда изды Илагьиед нин рыкьас?

⁴⁴ Выды сес изды убрумыс йывхӀыр мадана, изды ичие ад хыных шадваӀлире лебчире каӀчӀури.

⁴⁵ Бахтлы риъи, Аллагьара джуда гьухьудыы инаамиш ришид!

Майрама Йинчис гьаъад наъни

⁴⁶ Майрама ки рухьура: – Изды йикӀ Аллагьад дур лаъ гьаъадбишиклаады йиъи,

⁴⁷ РухӀ шад йишир а зы урухӀуд Йиниш бадаана!

⁴⁸ Гьис хьуйне, Гьа захда гакъыр а, зы ки гьӀасаба рыъыр, мидыыла хъуъ захда «бахтдид иесси риъи» – гьухьуси сиене илсанашды улмутдире.

⁴⁹ ГьӀунар ад Йинчире зас эккед кар гьыъыр а, Гьанийды дур мисгин йиъи!

⁵⁰ Гьание джуды рагьӀим вылцӀара архаба архыди сиене джуды дур хакьыр адбишис.

⁵¹ Гьание джуды гудж хъуд хылихьван джуда выдж хьур хадухъундыбыр тӀартӀ дыъыр а.

⁵² ЯхӀ адбыр гьание тахаала саъ хаадгъур а, загьӀифдыбыр лаъ даъара,

⁵³ гаӀшдыбишис йыхвалды выри, тухдыбыр шешин хадишне сихъидгыри.

⁵⁴ Джус къуллух ваъад Израилдид халкьдис куьмег хана йиркьыр а, йикӀыы хъидкьыр куьмегбыр

⁵⁵ Джу атабабыйишис мыс-га гьаъас чӀел выр ад, Ибрайим-пайгъампарас на гьанийды хъуъ хъудбишис.

⁵⁶ Майрама Елизаветахьван хьиб ваз духъунды ливири, хьели хала хъиркьыри.

ЯхӀйе-пайгъампар гьухудиклаа

⁵⁷ Елизавета рухусды вахт йибкьыри, гьанийс гьухури дух.

⁵⁸ Къумшийише не бейдедбише, Аллагьара гьанийис выъыр ад рагьӀимдиклаа хабар вишир, нубарагбыр гьаъара минийис.

⁵⁹ Мыйедхьусды йыгъа гьабыр дуруъура хыных суннат гьаъас. Гьабишис хынхыы Захарие дур лихьис йигара руъура, джуды дидыы кал.

⁶⁰ Амма нине вылцӀаардиш: – Ваъ, гьанийды дур ЯхӀйе йиъи.

⁶¹ – Выды цихилди гьаасад дур гъад вышне аддиший! – рухьура тимбише.

⁶² Ишаарамыхьван хынхыд дидда хулкара кадгъӀуре, шыв дур лихьис тинийис йигаарди.

⁶³ Захариере, кьул ягъӀыр, гьадик килхьере: «Гьанийды дур ЯхӀйе йиъи».

⁶⁴ Сиенебишис гьӀаламат руъура.

⁶⁵ Гьади мадана гьанийдаа гьалгас ки кугъӀуре, хъалгыр, гьание Йинчихьде шукур ваъара каӀбчӀура. Сиене къумшийишис гичӀ йывхӀыри, сиене банымыы гъад

⁶⁶ Иудеяди мисед гьӀаламатмыклаа далгара ай. Ун йишидухъундыбише, фикирдик кидхьур, йикӀиклаана рухьурай: «Выш игъирхьусди ми хынхыклаа?» Рухьуд кал, гьанийхьван Йинчид кьуувет ай.

⁶⁷ Гьанийды дид Захариеде Илагьиед РухӀ аӀчӀури, гьа мисе гьалгара каӀчӀури:

⁶⁸ – Дыкьа Йинчихьде шукур ваъас – Израилдид Йинчихьде! Гьа ес куьмгуьс йиркьыр а, Ес азадвалды хана – джуды халкьдис;

⁶⁹ Гьание сигыр а яхда кьухьды Азадчи Джус къуллух ваъад Давыдды халаданаклаады,

⁷⁰ Джуды еде выд чӀел кьуле выгыр, Джуды уджагъли пайгьампараше гьухьуд кал;

⁷¹ сигыр а яхда душманашиклаа азад даъасды, е кӀваӀчӀдыбишиклаа гехъеэдесды.

⁷² Гьа ихьды дидабашде рагьӀим выс хьур ад йиъий, Гьание Джуды Васи йикӀыы хывкьас хьур ад йиъий,

⁷³ Кьинед кьин гьыъыд йиъи Гьание ихьды атабаба Ибрайим-пайгъампарас ихьды душманашиклаа е геэдес хьур.

⁷⁴ Гьалыылана гичӀ джывыъыр, е Гьанийс къуллух ваьаси,

⁷⁵ Гьанийды улихьде миъминер не мисгинер дикис хьур ес сигыр адухъунды йыгъырма.

⁷⁶ Вы, хьуйне, хыных, Эли Гъанийды пайгъампар йикиси, Вы Эли Гъанийды улихьде гаӀчӀуси, Гьанийс «рахъӀ ачых ваъаси» хьур,

⁷⁷ Гьанийды халкьдис хабар ваъаси хьур, Гьа азад хъикисды, гьанийды гунаабыр лаӀхъӀаӀшуси хьур.

⁷⁸ Ихьды Йиниш, илсанар хъыдгад на гьабишихда йикӀе рагьӀим ад, хӀаӀляа саъ ес йаӀкв сигасды йиъи –

⁷⁹ гьа йаӀкваӀре нур иеси, сиенебишик, мычӀахъваӀле ешемишды, нур кагъуси, сиене уьлуьмед ахъӀахьде гидбишис гьувга ваъаси секинваӀлихда вуруъуд рахъӀ.

⁸⁰ Хыных, хьуйне, кьухьа, гьакьаллы руъура ай. Гьа таа ки Израилдид халкьдид улихьде лузур йигад сагьӀат руъумаъ чулди ешемиш йишири.