Zaburi 97 - Bibliya Yera 1951 1967 (Burundi)

¹ Uhoraho arahangamye; isi n’ihimbarwe; Ibizinga vyo mu kiyaga binezerwe uko bingana.

² Ibicu n’umwiza biramukikije: Ukugororoka n’imanza zibereye ni vyo ingoma yiwe ihagazeko.

³ Umuriro umwitangira imbere, Uyigiza abarwanizi biwe impande zose.

⁴ Imiravyo yiwe yabonesheje mw isi, Ibihugu birabibona, bihinda agashitsi.

⁵ Imisozi iyagira imbere y’ Uhoraho nk’ibishashara, Imbere y’Umwami w’isi yose.

⁶ Amajuru atāngāza ukugororoka kwiwe, Amahanga yose yabonye ubgiza bgiwe.

⁷ Abasenga ibishushanyo bibājwe, Bakirata ivy’ ubusa, ni bamāramāre: Ibigirwamana vyose biramwunamira.

⁸ I Siyoni haravyumvise, haranezerwa, Abakobga b’i Buyuda bahimbarwa N’imanza zawe zibereye, ewe Uhoraho.

⁹ Kuko wewe Uhoraho, usumba vyose, ukaba uri hejuru y’isi yose, Ushizwe hejuru cane y’ibigirwamana vyose.

¹⁰ Yemwe abakunda Uhoraho, ni mwanke ibibi; Azigama ubugingo bg’abakunzi biwe, Abarokora mu maboko y’abanyakibi.

¹¹ Umuco urasira umugororotsi, Bo n’umunezero ku b’imitima itunganye.

¹² Munezererwe Uhoraho, yemwe bagororotsi; Kandi muhimbaze izina ryiwe ryera.