Zaburi 9 - Bibliya Yera 1951 1967 (Burundi)

Iyi Zaburi yahawe umukuru w’abaririmvyi: bavugira inanga mw ijwi ryitwa Muti‐labeni. Ni Zaburi ya Dawidi.

¹ Ndashimisha Uhoraho umutima wanje wose, Nderekana ibikorwa vyawe vyose bitangaza.

² Ndakunezererwa, nkiginagura; Ndaririmba ishimwe ry’izina ryawe, wewe Usumba vyose.

³ Kukw abansi banje basubiye inyuma, Baratsitaye, barandukiye imbere yawe.

⁴ Wampagarikiye mu manza zanje no mu miburano yanje, Uvyagiye ku ntebe uca imanza zibereye.

⁵ Wakankamiye abanyamahanga, wahoneje ababi, Wasibanganije amazina yabo gushitsa ibihe bitazoshira.

⁶ Abansi barayogeye, hasigaye imisaka ibihe vyose, N’ibisagara vyabo warabikomvomvoye, Mbere no kwibukwa kwabo kwarazimanganye.

⁷ Arik’ Uhoraho aravyagira ibihe vyose, Yiteguriye imanza intebe yiwe.

⁸ Azocira isi imanza zibereye, Azoshikiriza amahanga imanza z’ukuri.

⁹ Kand’ Uhoraho azoba ubuhungiro bg’abadenderezwa, Azoba ubuhungiro mu bihe vy’amagorwa.

¹⁰ Kand’ abazi izina ryawe bazokwizigira, Kuko wewe, Uhoraho, udahemukira abakurondera.

¹¹ Uhoraho aba i Siyoni mumuririmbire ishimwe; Mukwize mu mahanga ibikorwa vyiwe.

¹² Kuk’ ūhōra amaraso abibuka, Ntiyibagira ugutakamba kw’ abaciye bugufi.

¹³ Uhoraho, ngirira ikigongwe; Urābe umubabaro mbabazwa n’abanyanka, Ni wewe undūgana, ukankūra mu marembo y’urupfu,

¹⁴ Kugira ngo nerekanire ishimwe ryawe ryose Mu marembo y’umukobga w’i Siyoni; Kandi nzonezererwa agakiza kawe.

¹⁵ Abanyamahanga barokeye mu cobo biyimbiye, Mu mutego bateze, ni ho icabo kirenge gifatiwe.

¹⁶ Uhoraho yimenyekanishije, yarashikije imanza: Ategesha umunyakibi ibikorwa vy’intoke ziwe nk’ umutego. Higayoni. Sela.

¹⁷ Abanyakibi bazosubizwa i kuzimu, Mbere n’amahanga yose yibagira Imana.

¹⁸ Kuk’ umukene atazokwama yibagirwa, Kand’ ivyizigiro vy’abaciye bugufi bitazohora birashira.

¹⁹ Haguruka, Uhoraho we, abantu boye kuba ari bo bagira inganji; Amahanga n’acirwekw iteka mu nyonga zawe.

²⁰ Uhoraho, n’ubatere ubgoba; Amahanga yimenye kw ar’ abantu buntu. Sela.