Zaburi 80 - Bibliya Yera 1951 1967 (Burundi)

Iyi Zaburi yahawe umukuru w’abaririmvyi: bavugira inanga mw ijwi ryitwa Amarebe y’Igishingantahe. Ni Zaburi ya Asafu.

¹ Ewe Mwungere w’Abisirayeli, tega ugutwi, Ni wewe urōngōra aba Yosefu nk’umukuku; Ewe uvyagira ku Bakerubi, kayangana.

² Kangura inkomezi zawe imbere y’aba Efurayimu n’aba Benyamini n’aba Manase, Uze kudukiza.

³ Mana utwigarurire, Umurikishe mu nyonga hawe, natwe turakira.

⁴ Uhoraho, Mana Nyen’ ingabo, Uzogeza ryari gupfunduka uburake urakira ugusenga kw’abantu bawe?

⁵ Wabagaburiye amosozi k’ umutsima, Wabahaye amosozi menshi yo kunywa.

⁶ Utumye ababanyi bacu baducuranwa; Abansi bacu batunegura bitwengera.

⁷ Mana, Nyen’ ingabo, utwigarurire, Umurikishe mu nyonga hawe, natwe turakira.

⁸ Wakūye umuzabibu muri Egiputa: Usohora amahanga, urawutera.

⁹ Urawurimirira, Na wo ushikana imizi kure, wuzura igihugu.

¹⁰ Imisozi itwikirwa n’igitūtu cawo, N’ibiti vy’amasederi vy’inganzamarumpu biterwa igitūtu n’amashami yawo.

¹¹ Ushamika amashami, ashika no ku kiyaga, Amasango yawo ashika no kuri rwa ruzi.

¹² N’iki catumye usambura inzitiro zawo, Ngw abahita bose bawamure?

¹³ Ingurube yo mu kibira irawonona, Ibikōko vyo mw ishamba birawona.

¹⁴ Garuka turakwinginze, Mana Nyen’ ingabo: Runguruka uri mw ijuru, ubirābe, ugendere uwo muzabibu,

¹⁵ Zigama ico ukuboko kwawe kw’i buryo kwateye, N’ishami wikomereje.

¹⁶ Uwo muzabibu waraturiwe, waratemwe; Bahonejwe n’igitsure co mu nyonga hawe.

¹⁷ Ukuboko kwawe kube ku muntu agushiriye mu buryo, Ku mwana w’umuntu wirereye.

¹⁸ Nuko natwe ntituzosubira inyuma ngo tukuveko; Duhēmbūre, natwe turambaza izina ryawe.

¹⁹ Uhoraho Mana Nyen’ ingabo, utwigarurire, Umurikishe mu nyonga hawe, natwe turakira.