Zaburi 73 - Bibliya Yera 1951 1967 (Burundi)

IGITABO CA GATATU

Iyi Zaburi n’iya Asafu.

¹ N’ukuri Imana igirira neza Abisirayeli, Abafise imitima itanduye.

² Ariko jeho, ibirenge vyanje kāri gato bigatirimuka, Intambuko zanje zari zishigaje gatoya zikanyerera.

³ Kuko nagirira ishari abībone, Aho nabona abanyakibi baguwe neza.

⁴ Kuko badasamba mw ipfa ryabo, Arikw amagara yabo arakomera.

⁵ Ntibagira amagorwa nk’abandi, Ntibaterwa n’ivyago nk’abandi.

⁶ Ni co gituma ubgibone buba nk’urudede mu mazosi yabo, Umuryano ukabambika nk’ impuzu.

⁷ Amaso yabo avanywe i mutwe no kuvyibuha, Bafise ibiruta ivyo umutima wokwifuza.

⁸ Baracokora, bakavugishwa ivy’ agahahazo n’ukugabitanya kwabo: Bavuga bīshize hejuru.

⁹ Bashize akanwa kabo mw ijuru, Ururimi rwabo ruyerera mw isi yose.

¹⁰ Ni co gituma abantu biwe bagaruka, Bakīrāngūza amazi yuzuye mu gikombe,

¹¹ Bakavuga, bat’ Imana ibibgirwa n’iki? Īsumba vyose har’ ico izi?

¹² Ereg’ abo ni bo banyavyaha: Kandi bama bīdibamiye, ubutunzi bgabo buragwira.

¹³ N’ukuri nogereje ubusa umutima wanje, Ukudacumura nagukarabiyemw’ ubusa.

¹⁴ Kuko natewe n’ivyago umusi ukīra, Ngahanwa mu gitondo n’ igitondo uko bukeye.

¹⁵ Iyo mba naravuze, nti Reka mvuge ntyo; Mba narahemukiye abana bawe.

¹⁶ Niyumviriye ingene noshobora kubimenya, Biba ibiruhije mu maso yanje.

¹⁷ Gushitsa aho nagīriye ahēra h’Imana, Nkībaza iherezo rya ba bandi.

¹⁸ N’ukuri ubashira ahanyerera; Ubakororera mu mahonero.

¹⁹ Erega bārahonnye mu kanya gato! Ubgoba bg’uburyo bginshi burabamaze.

²⁰ Nk’ukw inzozi zimeze, iy’ umuntu yikanguye, Ni ko nawe, Mwami, ni wikangura, uzobakēngēra nk’ibiravūswe.

²¹ Ah’ umushaha wanje wababara, Ngatēkerwa n’umubabaro mu mutima,

²² Nar’ ikijuju, nar’ imburabgenge, Namera nk’igikōko imbere yawe.

²³ Yamara rero namana nawe na ntaryo, Umfashe ukuboko kw’i buryo.

²⁴ Uzondōngōza inama ungīriye, Kandi hanyuma uz’ unyakīrane icubahiro.

²⁵ Ni nde mfise mw ijuru, atari wewe? Kandi mw isi nta we ngomba, atari wewe.

²⁶ Umubiri wanje n’umutima wanje bishira umunywera, Arikw Imana ni yo gitandara umutima wanje uhungirako, kandi ni yo mugabane wanje ibihe vyose.

²⁷ Kukw abakuja kure bazoranduka; Wahoneje abakuretse bose bagacika ibimaka.

²⁸ Ariko jeho kwēgēra Imana ni kwo kumbereye amahirwe: Umwami Uhoraho ni we ngize ubuhungiro, Kugira ngo namamaze ibikorwa wakoze vyose.