Zaburi 3 - Bibliya Yera 1951 1967 (Burundi)

Zaburi ya Dawidi y’igihe yahunga Abusalomu umwana wiwe.

¹ Uhoraho we, ereg’ abarwanizi banje baragwiriye! Abangararije ni benshi.

² Benshi baramvuga, Ngo Nta gakiza afise ku Mana. Sela.

³ Yamara wewe, Uhoraho, ur’ inkinzo inkīngira, Ur’ icubahiro canje, ni wewe ushira hejuru umutwe wanje.

⁴ Ijwi ryanje ritakambira Uhoraho, Na we akanyishura ari ku murwa wiwe wera. Sela.

⁵ Nararyama, ngasinzira, Nkīkangura, kuk’ Uhoraho ari we ampagarikiye.

⁶ Sinzotinya abantu ibihumbi vyinshi Vy’abankikije impande zose kugira ngo bantere.

⁷ Uhoraho we, haguruka: Mana yanje we, nkiza: Kuko wakubise abansi banje bose mu musaya, Wahongoye amenyo y’ababi.

⁸ Agakiza n’ak’ Uhoraho: Umugisha utanga ube ku bantu bawe. Sela.