Zaburi 25 - Bibliya Yera 1951 1967 (Burundi)

Zaburi ya Dawidi.

¹ Uhoraho, ni wewe ncurūrira umutima.

² Mana yanje, ni wewe nizigiye, Noye kumāramāra, Abansi banje boye kunyihaya.

³ Ni koko, abakwiteze nta wuzomāramāra: Abahemuka ata nyanduruko ni bo bazomāramāra.

⁴ Uhoraho, nyereka inzira zawe, Nyigisha amarango yawe.

⁵ Undōngōre mu kuri kwawe, unyigishe: Kukw ari wewe Mana y’agakiza kanje; Ni wewe nirirwa niteze.

⁶ Uhoraho we, ibuka imbabazi zawe no kugira neza kwawe, Kuko vyahozeho, uhereye kera hose.

⁷ Ntiwibuke ivyaha vyo mu busore bganje, cank’ ibicumuro vyanje, Nk’ukw imbabazi zawe ziri, abe ari k’unyibuka, Kubgo kugira neza kwawe, Uhoraho.

⁸ Uhoraho ni mwiza, aragororotse: Ni co gituma azorangira abanyavyaha inzira.

⁹ Abīcisha bugufi azobarōngōra mu vy’ukugororoka, Abīcisha bugufi azobarangira inzira yiwe.

¹⁰ Inzira zose z’Uhoraho n’ imbabazi n’ukuri Ku bitondera isezerano ryiwe n’ibishingantahe vyiwe.

¹¹ Uhoraho we, kubg’ izina ryawe Umparire ukugabitanya kwanje, kuko gukomeye.

¹² Umuntu yubaha Uhoraho ni nde? Azomurangira inzira akwiye guhitamwo.

¹³ Umutima wiwe uzoba amahoro, Uruvyaro rwiwe ruzoragwa isi.

¹⁴ Ibanga ry’Uhoraho rifiswe n’abamwubaha, Azobereka isezerano ryiwe.

¹⁵ Amaso yanje ahora ahanze k’Uhoraho, Kukw azokūra ibirenge vyanje mu mutego.

¹⁶ Umpindukirire, ungirire ikigongwe, Kuko ntagira shinge na rugero, ndagowe.

¹⁷ Imibabaro y’umutima wanje uyiruhure, Nkūra se mu marushwa yanje.

¹⁸ Witegereze umubabaro wanje n’umuruho, Umparire ivyaha vyanje vyose.

¹⁹ Witegereze abansi banje, kukw ari benshi, Kandi banyanka urwanko rw’ inkazi.

²⁰ Zigama umutima wanje, unkize: Noye kumāramāra, kuko nguhungiyeko.

²¹ Ukugororoka n’ugutungana binzigame, Kuko nkwiteze.

²² Mana, cungura Abisirayeli, Ubakūre mu marushwa yabo yose.