Zaburi 19 - Bibliya Yera 1951 1967 (Burundi)

Iyi Zaburi yahawe umukuru w’abaririmvyi. N’iya Dawidi.

¹ Ijuru ritāngāza icubahiro c’Imana, Itāzānure ryaryo rimenyekanisha igikorwa c’intoke zayo.

² Umurango uvugana n’uwundi murango urudaca, Ijoro rimenyesha irindi joro ubgenge.

³ Nta majambo cank’ ururimi biriho, Ijwi ryavyo ntiryumvikana.

⁴ Umugozi ubigera ushika mw isi yose, Bo n’amajambo yavyo ku mpera y’isi. Muri vyo yashingiye izuba ihema,

⁵ Rimeze nk’umukwe asohoka ava mu nzu i we, Rinezerwa nk’umunyenkomezi ryiruka mu nzira yaryo.

⁶ Riturumbuka riva ku mpera y’ijuru, Rikajana inzira ishika ku yindi mpera yaryo, Nta kintu gihishwa indugumba yaryo.

⁷ Ivyagezwe vy’Uhoraho biratunganye rwose, bihēmbūra ubugingo, Ivyo Uhoraho yashingiye intahe n’ivyo kwizerwa, biha umutungu ubgenge.

⁸ Ivyagezwe Uhoraho yigisha biragororotse, binezereza umutima, Ivyo Uhoraho yageze n’ibitanduye, bihwejesha amaso.

⁹ Ukwubaha Uhoraho kuratunganye, kwamah’ ibihe bidashira, Amateka y’Uhoraho n’ay’ ukuri, aragororotse rwose.

¹⁰ N’ivyo kwifuzwa kuruta izahabu, naho zoba izahabu, nyinshi zitarimw’ inkamba: Bisōsa kurusha ubūki, n’umutsāma w’ikigigu utonyanga.

¹¹ Kandi ni vyo bibūrira umusavyi wawe; Kuvyitondera harimw’ impēra nini.

¹² Ni nde ashobora kwimenyakw amafuti? Ntumparūrekw ivyaha vyanyinyegeje.

¹³ Kandi wame uzigama umusavyi wawe sinze nkore ivyaha ibigirankana, Ntibize binganze: ni ho nzobona gutungana rwose, Sinzotsindwa n’urubanza rw’ icaha gikomeye.

¹⁴ Amajambo yo mu kanwa kanje, n’ivyiyumviro vyo mu mutima wanje, bize bishimwe mu nyonga zawe, Uhoraho, gitandara canje, mucunguzi wanje.